ვინ არის პენსიონერი, რომელმაც ლას ვეგასში 59 ადამიანი მოკლა - მშობლები

სტივენ პედოკმა მოკლა 59 ადამიანი. დაჭრილია 527... ნევადელმა პენსიონერმა სტივენ პედოკმა ლას ვეგასში, ქანთრი ფესტივალზე დამსწრეებს ცეცხლი გაუხსნა. შედეგად, დაიღუპა 59 ადამიანი. ეს ამერიკის ისტორიაში ყველაზე მასობრივი მკვლელობაა. ქანთრის მოყვარულ, საკმაოდ უზრუნველყოფილ სტივენ პედოკს თან 23 ცალი იარაღი და უამრავი ტყვია ჰქონდა.

თავდასხმაზე პასუხისმგებლობა საკუთარ თავზე ისლამურმა სახელმწიფომ აიღო, თუმცა ამერიკის ფედერალური გამოძიების ბიუროს პედოკის ისლამისტებთან კავშირში ეჭვი ეპარება.

მკვლელი

პედოკი 1953 წელს დაიბადა. მას ჰყავს ორი ძმა. სტივენ პედოკის მამა, ბენჯამენი, ოჯახთან ერთად არ ცხოვრობდა, 1961 წელს 20 წელი მიუსაჯეს ბანკზე თავდასხმების სერიის გამო. იგი რამდენიმე წლის წინ გარდაიცვალა. დედა ბავშვებს უმალავდა მამის პატიმრობას და ეუბნებოდა, რომ იგი გარდაცვლილი იყო.

სტივენმა 1980 წელს დაამთავრა კოლეჯი და ერთ-ერთ კომპანიაში ბუღალტრად მუშაობდა. შემდეგ უძრავი ქონების ყიდვა-გაყიდვით დაკავდა და გარკვეული ქონებაც დააგროვა. ნათესავები მის ქონებას 2 მილიონ დოლარად აფასებდნენ. პედოკი საკმაოდ ხშირად იცვლიდა საცხოვრებელ ადგილს, ნევადაში კი 2016 წელს გადავიდა.

საქმიდან გამომდინარე მას ხშირად უწევდა სხვადასხვა ქალაქში სიარული, ასე რომ, ნევადაში ის იშვიათად ჩადიოდა. ახლობლების თქმით, სტივენ პედოკი პროფესიონალი მოთამაშე იყო და კვირებით შეეძლო კაზინოების სასტუმროებში ცხოვრება. ძმებს ერთმანეთთან საკმაოდ ნორმალური ურთიერთობა ჰქონდათ. ბოლოს ერთმანეთს სექტემბერში ეკონტაქტნენ, სტივენს 89 წლის დედის ამბავი ანტერესებდა, რომელიც ფლორიდაში ცხოვრობს.

მიუხედავად ორჯერ ქორწინებისა, სტივენს შვილები არ ჰყოლია. ახობლები, ნათესავები, მეგობრები სტივენს საკმაოდ თავდაჭერილ და გაწონასწორებულ ადამიანად ახასიათებენ, აგრესიულს მას ვერავინ უწოდებდა. იგი ცხოვრობდა თავისთვის, არასდროს არავის უშლიდა ხელს. ძალიან უყვარდა ქანთრის სტილი და ხშირად ესწრებოდა კონცერტებს.

იარაღის ტარებასთან დაკავშირებული პრობლემები არასდროს ჰქონია. ცნობილია, რომ ბოლო დროს ფილიპინელ ქალბატონს ხვდებოდა. ეს ქალი ძებნილად არის გამოცხადებული, თუმცა პოლიცია დარწმუნდა, რომ ამ ტრაგედიასთან მას არანაირი კავშირი არ ჰქონია და საერთოდ, იმ დროს ამერიკაში არც კი იმყოფებოდა.

ახლა გამოძიებამ უნდა დაადგინოს, რა მოტივები ამოძრავებდა მილიონერ პენსიონერს, რომ მოულოდნელად ასე სერიოზულად შეიარაღდა და სასტუმროს ნომრიდან ნამდვილი ჟლეტა დაიწყო...

...სტივენ პედოკმა მოკლა 59 ადამიანი. დაჭრილია 527. სულ კი ამ ფესტივალს 22 ათასი ადამიანი ესწრებოდა.