"მივხვდი, რომ ბავშვმა უნდა იცოდეს, რომ იმას, რასაც ვერ ვხედავთ მშობლები და შეუძლია დაგვიმალოს, ვერ დაუმალავს ღმერთს!!" სამი გოგოს დედა ხატია სიჭინავა დღეს დედობის ტვირთზე კიდევ ერთხელ დააფიქრეს საკუთარმა შვილებმა. ბავშვების უცნაური კითხვების ამბები ყველა მშობელს მოეხსენება, მეტიც, ხანდახან ჩიხშიც კი შევდივართ უცნაური შეკითხვების გამო. რთული სიტუაციის გადასალახად ხატიამ მეუღლეს მოუხმო და წყვილმა ერთად მარტივად იპოვა გამოსავალი, რომელიც საკუთარ ფეისბუქ გვერდზეც დაწერა:
"გაბრიელა...
დედობა ეს ცალკე პროფესიაა. ალბათ ყველა დედა დამეთანხმება. დღევანდელი თაობა ბევრად სწრაფად ვითარდება, ვიდრე ჩვენი თაობა თავის დროზე. აქედან გამომდინარე ზოგჯერ ფაქტის წინაშე როცა მაყენებენ ჩემი შვილები, შეკითხვით, რომელსაც არ ველოდი, ვხვდები, რომ როგორი მონდომებულიც არ უნდა იყო, ბავშვს ვერ დაიცავ ზედმეტი ინფორმაციისგან (ინტერნეტი, სკოლა, მეგობრები). ამიტომ მუდმივად მზად უნდა იყო პასუხის გასაცემად! როგორ?!
ვინაიდან ბავშვების აღზრდაში ორივე ვიღებთ მონაწილეობას - დედ-მამა, რა თქმა უნდა, ამ თემაზეც ვიმსჯელეთ. მამამ ისეთი გამოსავალი მოიფიქრა, რაზეც სერიოზულად დავფიქრდი, მე რატომ არ მომივიდა თავში... ბავშვები ღმერთთან დავაახლოვოთ და რწმენაში გავაძლიეროთო. რა თქმა უნდა, ზედაპირულად ჩემმა შვილებმა იციან ლოცვა, იციან ღმერთის არსებობა, მაგრამ მივხვდი, რომ ბავშვმა უნდა იცოდეს, რომ იმას, რასაც ვერ ვხედავთ მშობლები და შეუძლია დაგვიმალოს, ვერ დაუმალავს ღმერთს!! რომ ყველა მისი საქციელის, სიტყვის შესახებ, პირველი ღმერთთან უნდა იყოს მართალი და მერე ჩვენთან. თუ საფუძველს ბავშვობიდანვე არ ჩავუყრით, დღევანდელი თავისუფალი თაობა, ჩვეულებრივად დაუმორჩილებელი იქნება გარდატეხის ასაკში. დიახ, მეგობრებო, მოულოდნელად მე მივხვდი, რომ ღმერთი მხოლოდ ძნელბედობის ჟამს კი არ გვეხმარება, ის არ გვაძლევს უფლებას, თუნდაც ერთმანეთს დავუშავოთ! რომ არა ქვეცნობიერი შიში, რა მოხდებოდა ისედაც გაავებულ სამყაროში!! ალბათ გავწყვიტავდით ერთმანეთს!!
ასე რომ, ბავშვობიდანვე საფუძვლიანად უნდა ავუხსნა და შთავაგონო ჩემს გოგოებს პასუხისმგებლობა მათი უხილავი მშობლის, მათი პატრონის წინაშე! ვფიქრობ, ზედაპირულად უბრალოდ არ გამოვა ეს ამბავი და წლების მერე უკონტროლო გახდება სიტუაცია...
თქვენ როგორ ფიქრობთ?"
თეკლა ჟვანია