როცა სკოლაში ერთს ასწავლიან, სახლში - საპირისპიროს... გუშინ მომხდარ ტრაგიკულ ამბავს ასე ეხმაურება გამოცდილი მასწავლებელი მაია ქსოვრელი და შემთხვევას იხსენებს თავისი პედაგოგიური საქმიანობიდან:
"იყო შემთხვევა: პატარა მოსწავლემ მეორეს ხელი დაარტყა... ვისაუბრეთ მთელი გაკვეთილი ყველამ ერთად, მშვიდად...
უცებ ,,დამნაშავემ" ხმამაღლა ტირილი მორთო... რა გატირებს-მეთქი...
- ეგ ყველაფერი ვიციო... ჩემი კლასელი ძმასავით რომ უნდა მიყვარდეს, ვიციო... რომ არ უნდა დავარტყა, ეგეც ვიციო... თუ დამიშავა, ჯერ თქვენ უნდა გითხრათ, ეგეც ვიციო... მაგრამ მამა მეუბნება, ეგ ხელები რისთვის გაქვს, როგორ უნდა დაგჩაგრონ ამხელა კაციო... არავის არაფერი შეარჩინოო. ჩაშვება კი არ შეიძლებაო... რა ვუთხრა მამას, დამჩაგრესო?..
ტიროდა და ტიროდა გულამოსკვნილი...
ჩვენი შვილები ჩვენი სარკეა..."