მთავარი ნაძვის ხე საახალწლო განათებებთან ერთად 15 დეკემბრიდან აინთება
მართალია, საახალწლო სამზადისი დედაქალს უკვე დაეტყო, თუმცა როგორ ახალი წლის ღამეს ჰპირდება თბილისის მერია მოქალაქეებს, ამის შესახებ დღეს გახდა ცნობილი. როგორც კახა კალაძემ ბრიფინგზე განაცხადა, დედაქალაქის საახალწლო კონცერტები გლდანში, სამგორსა და ძველ თბილისში გაიმართება.
თბილისის მერის ინფორმაციით, მთავარი ნაძვის ხე საახალწლო განათებებთან ერთად 15 დეკემბრიდან აინთება და წელს თბილისს არა მხოლოდ ყველაზე განსხვავებული, არამედ ყველაზე სახალხო ახალი წელი ექნება.
”დარწმუნებული ვარ, ყველა თბილისელს გაახარებს ის სიახლეები, რომელსაც თბილისის მერია სთავაზობს ჩვენს მოსახლეობას. ახალი წელი ყოველთვის და ყველასთვის ასოცირდება საოცრებებთან, ყველას პატარა ბავშვივით გვიხარია ახალი წლის მოახლოება. წელს თბილისს არა მხოლოდ ყველაზე განსხვავებული ფორმატის, არამედ ყველაზე სახალხო ახალი წელი ექნება. დედაქალაქში მთავარი ნაძვის ხე 15 დეკემბერს გაიხსნება და ახალი საახალწლო განათებებით ქუჩები გაახარებს ყველას. წელს პირველად მთავარი საახალწლო ღონისძიებები ჩატარდება თბილისის გარეუბნებში. ჩვენი გუნდის გადაწყვეტილებით, სადღესასწაულო კონცერტები გაიმართება დედაქალაქის სამ რაიონში - ეს არის გლდანი, სამგორი და ძველი თბილისი”, - განაცხადა კალაძემ.