"მსურს ბევრი შვილი მყავდეს... ბავშვთან ზედმეტად მკაცრად მოპყრობას უარეს შედეგამდე მივყავართ" - ეკო ფანგანი ოჯახზე - მშობლები

ეკო ფანგანი მუდმივად არაჩვეულებრივ ფორმაშია, რასაც საუკეთესო გენეტიკას უმადლის ყოფილი მოდელი და ტელეწამყვანი – ეკო ფანგანი მუდმივად არაჩვეულებრივ ფორმაშია, რასაც საუკეთესო გენეტიკას უმადლის. სურს, წლების შემდეგ ისევე შეუდარებლად გამოყურებოდეს, როგორც დღეს მისი დედა, დეიდა, მამიდა... მიუხედავად იმისა, რომ მეტად გადატვირთული რეჟიმი აქვს, მაინც ახერხებს ოთხი ძმიშვილი დიდი ყურადღებით გაანებივროს... როგორც თვითონ ამბობს, ოჯახი მისთვის ყველაფერს ნიშნავს და თვითონაც სურს, ბევრი შვილი ჰყავდეს...

- 90-იან წლებში ჩვენი ოჯახი გარკვეული წლები თურქეთში ვცხოვრობდით. მამაჩემი იქ დიპლომატიურ სფეროში მოღვაწეობდა. საქართველოში ურთულესი წლები იყო, თბილისში რომ ეზოებში ცეცხლს ანთებდნენ და ჩაიდნებით წყალს ადუღებდნენ, არ იყო – შუქი, გაზი, წყალი... ჩვენ ამ დროს თურქეთში კარგი პირობები გვქონდა, მაგრამ მაინც არ მსურდა იქ ყოფნა. ჩემი სკოლა და მეგობრები მენატრებოდა. ამიტომაც ვერ ავიტანე იქ ყოფნა და ცოტა ხანში წამოვედი. დავბრუნდი უშუქობაში, ყინვაში და უბედურებაში... ბებიასთან და ბაბუასთან ვცხოვრობდი. ორი ბებია და ბაბუა მყავდა და თანაბრად ვიყავი ხან ერთგან და ხან მეორეგან. მოგეხსენებათ, რაც არის ბებია-ბაბუას წეს-ჩვეულება და მეც ბევრად უფრო მეტად მანებივრებდნენ, ვიდრე მშობლები. უფრო მეტად ბებია-ბაბუების გაზრდილი ვარ. თურქეთში მხოლოდ ექვსი თვე ვიყავი. ჩემი მშობლები ხუთი წელი იქ ცხოვრობდნენ და მე ზოგჯერ ჩავდიოდი ახალ წელს ან საზაფხულო არდადეგებზე.

- რას ნიშნავს თქვენთვის ოჯახური გარემო?

- სითბო, სიმშვიდე, სიყვარული, შინაგანი კომფორტი... ჩემი ძმა ჩემზე უმცროსია და უკვე ოთხი შვილი ჰყავს. 18 წლის ასაკში დაქორწინდა. მგონიაб რომ ძალიან კარგი მამიდა ვარ. ბავშვები ჩემზე გიჟდებიან. ერთ-ერთი ძმიშვილი ჩემს გულზე გაიზარდა, სულ გულზე მეწვინა. ძალიან ხშირად არიან ჩვენთან და ბავშვებთან ერთად ხან სად დავდივარ, ხან სად. დამყავს ჩემი მეგობრის შვილებთან, სხვადასხვა საბავშვო დღესასწაულებზე... ერთი გოგოა და სამი ბიჭი. გოგო ყველგან ამბობს – ეკო ფანგანს თუ იცნობთ, მისი ძმიშვილი ვარო. ძალიან ამაყობს ჩემით!

- როგორც ვიცი სახლს იშენებდით ცალკე გადასასვლელად...

- ახლა ერთად ვცხოვრობთ მე, დედაჩემი და მამაჩემი... მალე ვაპირებ ცალკე გადასვლას. თუმცა რამდენად შევძლებ, არ ვიცი. დედაჩემი ხუმრობს, მაინც სულ აქ იქნებიო. ჩვენ სადაც ვცხოვრობდით ვაკეში, იქ ახლა ჩემი ძმა ცხოვრობს. ჩვენც ვაკეში ვცხოვრობთ ახლოს და ჩემი ახალი სახლიც იქვეა...

ეკო ფანგანის მშობლები

- გსურთ წლების მერე ისევე შეუდარებლად გამოიყურებოდეთ, როგორც ახლა არის –დედა, დეიდა მამიდა... როგორია მათი ცხოვრების წესი, თავის მოვლაზე განსაკუთრებულად დიდ დროს ხარჯავენ?

- მართლაც ძალიან გამიმართლა იმ მხრივ, რომ დედაც, დეიდაც და მამიდაც გადასარევად გამოიყურებიან. მათ ხშირად ვეუბნები, წლების შემდეგ თქვენ ხომ დაგემსგავსებით-მეთქი... არანაირი განსაკუთრებული წესები არ აქვთ თავის მოვლის, არც ვარჯიშობენ და არც დიეტაზე არიან. ჩვენს ოჯახში არ არის შეზღუდვები, მაგრამ მაინც ყოველთვის ყველა ფორმაშია... მეც მხოლოდ ღორის ხორცს და მაიიონეზს არ ვჭამ, რადგან არ მიყვარს. არ იღებს ჩემი ორგანიზმი.

- ბევრი ალბათ ვერ წარმოიდგენს, თქვენ რომ სამზარეულოშიც გიყვართ ფუსფუსი...

- დედაჩემი ცნობილი კულინარია. ცოტა მიჭირს ჩემებზე ასე ვისაუბრო, მაგრამ ამას ყველა აღიარებს, ვინც იცნობს. საქართველოში ახლა გამოჩნდნენ პროფესიონალი მზარეულები, მაგრამ მე რომ ჯერ კიდევ პატარა ვიყავი, მაშინ აკეთებდა დედაჩემი, რასაც ახლა აქ ზოგჯერ სიახლედ მიიჩნევენ... მასთან ერთად არ ღირს რამეში ჩარევა და მე მონაწილეობას არ ვიღებ... თუმცა არის პერიოდები, როდესაც მარტო ვარ აგარაკზე ან სახლში და მაშინ კარგ რამეებს ვამზადებ...

- თუ გსურთ გქონდეთ ოჯახი, ბევრი შვილი გყავდეთ?

- რასაკვირველია! ამაზე მიფიქრია და იმედია, ბევრი შვილი მეყოლება... ალბათ, დედაც ისეთივე ვიქნები, როგორიც მამიდა... იშვიათად, მაგრამ როცა საჭიროა, ძმიშვილებთან მკაცრიც ვარ. ვუბრაზდები კიდევაც, როცა გასაბრაზებელია... თუმცა პატარა ბავშვებთან ზედმეტი სიმკაცრე და დასჯის ფორმები არ მომწონს. ჯერ პატარები არიან. ერთი არის მხოლოდ 13 წლის, შემდეგ გოგო 7 წლის და მომდევნო ბიჭები 6 და 5 წლის... ერთ-ერთი ბიჭუნა ძალიან ცელქია, მაგრამ ჩემი ფსიქოლოგიური დაკვირვებით, ბავშვთან ზედმეტად მკაცრად მოპყრობას უარეს შედეგამდე მივყავართ და ამიტომაც ზომიერებას არაფერი სჯობს!

მანანა გაბრიჭიძე