ხელსაქმის საინტერესო მასტერკლასები „ბიბლუსი გალერეაში“ ხელსაქმე დღითიდღე პოპულარული ხდება საქართველოში და უფრო და უფრო მეტი ადამიანი ინტერესდება მისით. სწორედ ამიტომ „ბიბლუსი გალერეებში“ ხელსაქმის მასტერკლასები იწყება, სადაც მსურველებს შესაძლებლობა ექნებათ შეიძინონ ნებისმიერი მასალა სხვადასხვა ხელნაკეთი ნივთის დასამზადებლად, ხელსაქმის პროფესიონალები კი დაეხმარებიან და ასწავლიან მათ ამათუიმ ნივთის გაკეთებას. ხელსაქმისთვის განკუთვნილი მასალები გათვლილია როგორც ბავშვებზე, ასევე უფროსებზე, შესაბამისად, მასტერკლასებიც ორივე მიმართულებით ჩატარდება ხოლმე.
პირველი მასტერკლასი 23 დეკემბერს, 13:00–ზე „ბიბლუსი გალერეაში“ ბავშვებისთვის გაიმართება, სადაც ისინი საკუთარი ხელით, პროფესიონალების დახმარებით გააკეთებენ სანტას ირემსა და კიდევ სხვა ცხოველებს. მსგავსი ტიპის ღონისძიებები ბავშვის შემოქმედებითი უნარების განვითარებას უწყობს ხელს.
მასტერკლასი უფასოა. დასწრების მსურველებმა ადგილზე უნდა შეიძინონ მხოლოდ ნივთების დასამზადებლად საჭირო მასალები, რაც დაახლოებით 7 ლარს შეადგენს. საკუთარი ხელით დამზადებული ცხოველები კი პატარას ამ ლამაზი დღის სახსოვრად დიდხანს დარჩება.
იმისთვის, რომ მასტერკლასი იყოს ნაყოფიერი და ყველა ბავშვს სათანადო ყურადღება დაეთმოს, მონაწილეთა რაოდენობა შეზღუდულია. სურვილის შემთხვევაში, უნდა შეავსოთ ონლაინსარეგისტრაციო ფორმა და დაადასტუროთ, რომ მასტერკლასს დაესწრებით.
აღნიშნული აქტივობა რეკომენდებულია 5-9 წლის ასაკის ბავშვებისთვის, როგორც ბიჭებისთვის, ასევე გოგონებისთვის.
მის.: თბილისი, ჭავჭავაძის 7, ბიბლუსი გალერეა