რა დასკვნა გამოიტანა ლაბორატორიამ "სელიასთან" დაკავშირებით? - მშობლები

"პროდუქტს, რომელიც ჩვენს ქვეყანაში შემოდის, არც ერთ სხვა ქვეყანაში და მათ შორის საქართველოშიც არ გამოუწვევია ბავშვთა ავადობა..."

დეკემებრის დასაწყისში საფრანგეთში წარმოებულ ბავშვთა კვების პროდუქტების რამდენიმე პარტიაში (Picot Lait Picot SL sans Lactose 350 გ., Milumel Bio 1 900g, Picot peptide junior sans Lactose 460g) ეპიდემიოლოგიური კვლევის შედეგად ეჭვი მიიტანეს სალმონელა აგონას არსებობაზე (Salmonela Agona). სალმონელა იწვევს დიარეას და ცხელებას (იხილეთ სტატია). აღსანიშნავია, რომ ბრენდ „პიკოს“ და „მილუმელის“ პროდუქციის იმპორტი არ ხდება საქართველოში. 11 დეკემბერს მსოფლიო ჯანდაცვის ორგანიზაციამ გაავრცელა რეკომენდაციები ყველა იმ ქვეყანაში, სადაც ხდებოდა პროდუქციის ექსპორტი. მათ შორის საქართველოს მასშტაბითაც სურსათის ეროვნული სააგენტოს მიერ შეჩერდა „სელიას“ პროდუქციის გარკვეული პარტიების რეალიზაცია და ხდება მათი ამოღება სააფთიაქო ქსელიდან.

ჟურნალისტებისთვის გამართულ პრესკონფერენციაზე „CTN ჯორჯიას“ სამართლებრივმა წარმომადგენელმა იმედა დვალიძემ საქართველოში "ლაქტალ ინტერნეიშენალის" იმპორტირებულ პროდუქციასთან დაკავშირებით გააკეთა განმარტებები და აღნიშნა, რომ კონკრეტულად "სელია", რომელიც საქართველოს სააფთიაქო ქსელში იყიდებოდა, სოფლის მეურნეობის სამინისტროს აკრედიტირებულ ლაბორატორიაში შემოწმდა და 21 სინჯის აღების შედეგად არც ერთ შემთხვევაში ბაქტერიოლოგიური დაბინძურება მასში არ დადასტურდა.

"კონკრეტულად იმ პროდუქტს, რომელიც ჩვენს ქვეყანაში შემოდის, არც ერთ სხვა ქვეყანაში და მათ შორის საქართველოშიც არ გამოუწვევია ბავშვთა ავადობა. არსებობობს სხვა პროდუქტებზე ეჭვი, ეს არის "მილუმელი" და "პიკო", რომლებიც საქართველოში არც გვაქვს იმპორტირებული. ამის მიუხედავად, კომპანიამ მიიღო გადაწყვეტილება სრულად ამოიღოს "სელიას" პროდუქცია სადისტრიბუციო ქსელიდან და ის დააბრუნოს ბაზარზე მას შემდეგ, რაც საფრანგეთში მსოფლიო ბრენდი მიიღებს უსაფრთხოების იმ ზომებეს, რომლებიც დადგენილია ევროკავშირის სტანდარტით და ჯანდაცვის მსოფლიო ორგანიზაციის მოთხოვნებით. ჩვენ ვფიქრობთ, რომ პროდუქცია ბაზარზე დაბრუნდება დაახლოებით 3 თვეში".

რუსკა კილასონია