"მინდა, ამათ იცოდნენ, რომ მათი სიმღერა ამ ქვეყანაში ვინმეს უხარია... მინდა იგრძნონ რომ სამშობლოს ესენი(ც) უყვარს და სჭირდება..." თბილისის ბიჭუნათა კაპელამ და ახალგაზრდულმა გუნდმა, რომელიც "ნიჭიერის" ფინალში გადავიდა, სერიოზულ შედეგებს მიაღწია - 25 დღეში (სწორედ ეს დრო გავიდა ფილარმონიის სცენაზე მათ მიერ "ქუინის" ლეგენდარული სიმღერის შესრულების შემდეგ), უკვე 30 მილიონი ნახვა აქვთ მსოფლიო მასშტაბით. ქართული "ნიჭიერის" ისტორიაში ეს ნამდვილი რეკორდია და არა მხოლოდ "ნიჭიერის", არამედ საქართველოს გამარჯვებაა.
აი რას წერს მათი ხელმძღვანელი, მუსიკოსი, მაესტრო გელა ფარჩუკიძე:
"ამ ბავშვებმა უკვე 30 მილიონზე მეტ ადამიანს მიაწვდინეს ხმა და გაახსენეს, რომ ქართველები ნიჭიერების დეფიციტს არ განვიცდით...
და ეს ციფრი მხოლოდ 25 დღისაა...
მადლობა ღმერთს, რომ ჩვენი ქვეყანა პოზიტიურად დაინახა ყველამ, ვისაც საქართველო არც კი ჰქონდათ გაგებული... (მეც გამიკვირდა მაგრამ ასე ყოფილა.). და იმათაც კი, ვისაც ჩვენი ქვეყნიდან "ვიღაცამ" გული ატკინა...
ეს პატარა ადამიანები ღმერთის ნებით კვლავაც ბევრ სიკეთეს გააკეთებენ ქვეყნის სახელით... მე მხოლოდ ის მინდა, მათ იცოდნენ, რომ მათი სიმღერა ამ ქვეყანაში ვინმეს უხარია... მინდა იგრძნონ, რომ სამშობლოს ესენი(ც) უყვარს და სჭირდება...
"მე ძალიან მიყვარს ჩემი სამშობლო, მაგრამ მინდა, რომ სამშობლოსაც ვუყვარდე მე...." - რობერტ ლოუელი".