თბილისის ბიჭუნათა კაპელის და ახალგაზრდული გუნდის ხელმძღვანელის ემოციური მიმართვა როგორც ცნობილია, ტელე-იმედის ეთერში პროექტ "ნიჭიერის" გამარჯვებული გახდა თბილისის ბიჭუნათა კაპელა და ახალგაზრდული გუნდი - 80 უნიჭიერესი მოზარდი და მათი ხელმძღვანელი მაესტრო გელა ფარჩუკიძე. გამარჯვება მართლაც ღირსეული და დამსახურებული იყო - ნახევარფინალში მათ მიერ ნამღერ სიმღერას სულ რაღაც 25 დღეში 30 მილიონი ნახვა ჰქონდა მსოფლიო მასშტაბით.
მაესტრო გელა ფარჩუკიძემ გამარჯვებასა და რამდენიმე უარყოფით კომენტართან დაკავშირებით მიმართვა გაავრცელა ფეისბუქგვერდზე:
"მშვიდობა და სიკეთე თქვენდა და სრულიად სამშობლოს ჩემო ძვირფასებო... მეგობრებობო და ახლობლებო, ნათესავებო და ჩემო კეთილო ადამიანებო, ვინც მე სიხარული მაჩუქეთ და თქვენი სიხარულით ანთებული თვალების სიკაშკაშით ახალი წლის ბრწყინვალებაც კი გადაფარეთ...
გილოცავთ ახალ წელს... ბედობას... მოგვიანებით საშობაოდაც მოგეფერებით... ალილუია.
დღეს მადლობის სათქმელად გაწუხებთ... უფლისა და თქვენი წყალობით გავიმარჯვეთ... (ახლა ხომ ვიცი, ბევრი თქვენგანი ფიქრობს "ეს ერთი და სხვა მრავალი" – ამინ...)
მადლობა ამისათვის უფალს... მადლობა, უფალო, ყოველი გათენებული დილისთვის... სიხარულის ყოველი წამისთვის...
მადლობა მერიას... ქალაქის ყოფილ მერს ბატონ დავით ნარმანიას და კულტურის საქალაქო სამსახურის ყოფილ უფროსს, ქალბატონ ია მაქაცარია-ჩხაიძეს და მის გუნდს ჩემი ჩანაფიქრის რეალობად ქცევისთვის...
მადლობა ახლანდელ მერს – უმაგრეს და მართლა ჩემპიონ კაცს ბატონ კახა კალაძესა და კულტურის საქალაქო სამსახურის ახალ უფროსს, ქალბატონ სოფიო ხუნწარიას თანადგომისა და სითბოსთვის.
მადლობა ტელე-იმედს – მადლობა ბატონ დემნა ჯაფარიძეს, ბატონ გიორგი ხაბურზანიას, ბატონ ლაშა კიკვილაშვილს, ბატონ გიორგი ინასარიძეს... მთელ ტექნიკურ ჯგუფს... დიდი მადლობა ქალბატონ მანანა მორჩილაძეს (გენაცვალე, ჩემო დიდო მეგობარო), ქალბატონ სოფო ტოროშელიძეს...
– – – – – – – – – –
დიდი მადლობა მის უდიდებულესობა ქართველ ხალხს, რომელმაც თავისი რჩეული გაგვხადა... ერს და ბერს... მადლობა, მამაოებო, თქვენი ლოცვისა და სმს-ებისათვის (თქვენი ისედაც მწირი ჯიბიდან)...
მინდა აქედან მოვეფერო ჩემს "გადარეულებს" – რომლებიც ძლივს, მაგრამ მაინც ბოლომდე გამომყვნენ ჩემპიონობისაკენ...
დიდი მადლობა ყველა მშობელს, რომლებიც გვერდში ედგნენ "ჩემს" (ანუ მათ საკუთარ) შვილებს უბედნიერესი სახისა და თვალების დასანახად... (მათ შორის დედაჩემსაც,რომელმაც დიდი განსაცდელითაც კი (მძიმე ავადმყოფობა) კი არ მომაცდინა ამ დიად მიზანს..
მადლობა ყველა პედაგოგს,რომელმაც ღირსეულად აპატიეს ბავშებს სკოლაში გაცდენები...
დიდი მადლობა ერთ-ერთ მშობელ ქალბატონს, რომელსაც მეუღლე გარდაეცვალა.. .დამირეკა და მთხოვა – დაკრძალვამდე გვაპატიეთო გაცდენა... ხუთშაბათს 3 საათზე დავკრძალავთ და იქიდანვე წამოვა, რომ 5 საათზე არ დააგვიანოსო... ცრემლები თავისთავად წამომივიდა...
აი.... რა გინდა ახლა, ამის მერე თქვა...
მე კი ვიტყვი...!!!
მინდა გჯეროდეთ, რომ ეს მხოლოდ დასაწყისია... ჩვენ ბევრჯერ გაგახარებთ და გაგაოცებთ... ამისათვის პირველ რიგში უფალს ვთხოვ შემწეობასა და წყალობას – თქვენ კი გამძლეობასა და მხარში დგომას...
ალელუია... დიდება შენდა ღმერთო ჩვენო... დიდება შენდა...
P.S - ის ნაცვლად:
ვფიქრობდი, ამაზე მეთქვა რამე თუ არა... მაგრამ ჩემი "ბარტყები'' წუხან და ამიტომაც გადავწყვიტე, დამეწერა...
ჩვენს მიერ "QUEEN"-ის "Bohemian Rhapsody"-ს უკვე 33 მილიონი ნახვა აქვს... მილიონობით LIKE და SHARE...
იმ მილიონი კომენტარიდან, რომლის წაკითხვაც და გადახედვაც მოვასწარით მე და ჩემმა საახლობლომ – ერთი უარყოფითი კომენტარიც კი არ ყოფილა...
აი, ჩვენთან კი... ოოოოოო... ჩვენ ხომ გვიყვარს "განსხვავებული"...
"ნიჭიერის": გვერდზე კომენტარების 95 % ბოღმა... შური... ცინიზმი... წყენა....
საწყენია უფრო მეტად ის, რომ ამ ადამიანებს მუსიკა (ვციტირებ) "მუსიკა რა ფეხების ნიჭიერებაა"... "ამდენ ბავშვს "კანეშნა" მხარდამჭერი ეყოლებაო..." (ეს ვითომ არგუმენტი).
და რა ვქნა ახლა – მუსიკა რომ ნიჭიერება არ არის და მხოლოდ "ცუღლუტობაა" – ბახიდან დღემდე მოვიხადო ბოდიში, თუ ცოტა აქეთ – მოცარტისა და ბეთჰოვენის პერიოდიდან მაპატიებთ?..
ან იქნება ფალიაშვილის სახელით (რომელსაც ჩვენი სკოლა აქვს დამთავრებული), თუ რეზო ლაღიძის სახელით, ან სულაც ჯანსუღ კახიძის (ღმერთმა გაანათლოს – მისი იდეა იყო ეს კაპელა) სახელით ჯობია (ეროვნულს რომ "მივაწვეთ") ბოდიშის მოხდა...
ან იქნება ფრედი მერკურის, პოლ მაკარტნის, ჯონ ლენონის, სტივი უანდერის, სტინგისა და სხვა მრავალის სახელით ჯობია ამის გაკეთება?!
და იაპონელს რომ გაემარჯვა – ხომ ბედნიერი იქნებოდით ყველა...
მუსიკა ღვთაებრივი ნიჭია და არა მიწიერი...მიწიერ ბევრ უნარს გამოიმუშავებს ადამიანი ტიტანური შრომით...
ზეციურს კი – ვერასოდეს .....
ეეეეჰ....ისევ დიდ ილია მართალს დავესესხები "ფინალს":
"ჩვენისთანა ბედნიერი
განა არის სადმე ერი.....
მტრის არმცნობი,
მოყვრის მგმობი,
გარეთ მხდალი, შინ ძლიერი...
.......................................
P.P.S. თქვენ გენაცვალეთ ყველას, ვინც იხარეთ ჩვენი სიხარულით...
უფალმა დაგიბრუნოთ სიკეთით და სიხარული არ მოგაკლოთ...
ჩვენს არაკეთილისმსურველებს კი მინდა გირჩიოთ – აბა სცადეთ "QUEEN"-ის "Bohemian Rhapsody–ს მეორე ნაწილის სიმღერა და თუ შეძელით – მერე დარწმუნდებით, რომ ეს წარმოუდგენელი სირთულის რამაა ჩვეულებრივი ადამიანისთვის...
ჩემი ბალღებს კი ეს არ გაუჭირდათ... იმიტომ, რომ არაჩვეულებრივები არიან...ანუ ნიჭიერები :)
და კიდევ – ვერაფრით ვერ დაგამშვიდებთ – ჩვენ კვლავაც ვაპირებთ ამ გზაზე სიარულს – სადიდებლად უფლისა და გახარებად ერისა...
....და უკუნისამდე... ამინ
"ყოვლადწმინდაო ღვთისმშობელო – შეგვეწიე და გვაცხოვნენ ჩუენ..." ამინ.