რაზე ოცნებობს პატარა ნიჭიერი მომღერალი, რომელსაც ბევრი გულშემატკივარი ჰყავს - მშობლები
რაზე ოცნებობს პატარა ნიჭიერი მომღერალი, რომელსაც ბევრი გულშემატკივარი ჰყავს
ბავშვებისგანაც ვგრძნობ დიდ სიყვარულს და გვერდში დგომას საზოგადოებრივ არხზე ახალმა საბავშვო კონკურსმა "რანინამ" და მისმა მონაწილე ნიჭიერმა ბავშვებმა მაყურებლის ყურადღება რა ხანია მიიპყრეს. კონკურსის გამარჯვებული საბავშვო ევროვიზიაზე გაემგზავრება.
12 წლის დავით ქიმერიძე „რანინას“ ერთ-ერთი პოპულარული მონაწილეა, რომელიც განსაკუთრებული ვოკალური მონაცემებით გამოირჩევა და ჟიურის მხრიდან ყოველთვის მაღალ შეფასებებს იღებს. დავითმა სიმღერა სამი წლის ასაკში დაიწყო, მისი მომავალი გეგმებიც სწორეს სიმღერას უკავშირდება.
- დავით, ალბათ ბევრ ადამიანს სურს უფრო ახლოს გაგიცნოს. შენს შესახებ მოგვიყევი, სიმღერის გარდა რას საქმიანობ?
- ვცხოვრობ ქალაქ რუსთავში, ჩემს მშობლებთან და დასთან ერთად. ჩემი ჰობი ,,ბითმეიქერობაა“. სახლში ,,ჰოუმსტუდია” მაქვს და თავისუფალ დროს ამით ვერთობი. სიმღერის გარდა მიყვარს ფეხბურთი.
- რამდენი წლიდან მღერი? როდის აღმოაჩინეს ოჯახში, რომ სიმღერის ნიჭი გქონდა?
- სამი წლიდან ვმღერი. როცა ხუთი წლის ვიყავი, გადაცემა ,,თავდაყირაში” გავაგზავნეთ ვიდეო ჩემი შესრულებით და ვიდეოჩემპიონი გავხდი. ცხრა წლის ასაკში მშობლებმა შემიყვანეს ფოლკლორის სკოლაში, საგუნდო განყოფილებაზე. ჩემი ვოკალის პედაგოგის ანა ჭიპაშვილის წყალობით მოვხვდი საერთაშორისო ფესტივალ ,,მზე ხელის გულზე”, სადაც მოვიგე გრან-პრი.
- ამ ეტაპზე მონაწილეობ კონკურსში „რანინა“, რას გვეტყვი ამ პროექტის შესახებ? როგორ მოხვდი აქ?
- „რანინა“ არის საოცარი პროექტი, რომელმაც ბავშვებს მოგვეცა საშუალება გვემღერა ცნობილ მომღერლებთან, ბენდებთან და ორკესტრთან ერთად. იქ მოხვედრა ჩემი ვოკალის მასწავლებლის იდეა იყო. გავიარეთ ორი შესარჩევი ტური, რის შედეგადაც აღმოვჩნდი საუკეთესო ათეულში.
- როგორი დატვირთვით გიწევს მუშაობა, როგორ ემზადები გამოსვლებისთვის?
- გვაქვს ყოველდღიური რეპეტიციები და გამოსვლისთვის მთელი შემართებით ვმეცადინეობთ.
იხილეთ დავითის და ნიაზ დიასამიძის საოცარი დუეტი
დავით ქიმერიძის და ნიაზ დიასამიძის საოცარი დუეტი
- კონკურსში მონაწილეობა ხელს არ გიშლის სწავლაში? პედაგოგები როგორ ეკიდებიან ამ საკითხს?
- ზოგჯერ მიწევს სკოლის გაცდენა, მაგრამ პედაგოგებიც და სკოლაც გვერდში მიდგას. ბავშვებისგანაც ვგრძნობ დიდ სიყვარულს და გვერდში დგომას.
- როგორ ფიქრობ, შენი ყველაზე დიდი გულშემატკივარი ვინ არის?
- ჩემი ოჯახი. ყოველთვის ვითვალისწინებ მათ რჩევას, რადგან ისინიც მუსიკოსები არიან.
- რა გეგმები და ოცნებები გაქვს?
- ჩემი ოცნებაა მოგზაურობა და საკუთარი ბენდის ყოლა. მინდა გავხდე შემოქმედებითი მუსიკოსი, ვფლობდე სხვადასხვა ინსტრუმენტს და მქონდეს საკუთარი სტუდია.
მერი ბლიაძე