ვინ არიან ქართველი მოცეკვავეები, რომელთა ცეკვას 2 მილიონზე მეტი ნახვა აქვს - მშობლები

ნიკა და ბექა ნოზაძეები მოცეკვავეები არიან. საზოგადოების დიდმა ნაწილმა ისინი სოციალურ ქსელში ატვირთული ვიდეოებით გაიცნო და შეიყვარა. მაყურებელს ერთგვარი ექსპერიმენტი შესთავაზეს და ქართული და თანამედროვე ცეკვის ელემენტები გააერთიანეს. ისინი თავიანთ საქმიანობასა და სამომავლო გეგმებზე გვიყვებიან:

ნიკა: - ორივე ბავშვობიდან ვცეკვავთ. ქართული ცეკვებიდან დავიწყეთ, სადღაც 9-10 წელი ვცეკვავდით. 15-16 წლის ასაკიდან თანამედროვე ცეკვებზე გადავედით, კერძოდ, ჰიპ-ჰოპზე. ილიას სახელმწიფო უნივერსიტეტი დავამთავრე, ბიზნესის ადმინისტრირების მიმართულებით. წელს მაგისტრატურაზე ვაბარებ, იმავე განხრით.

ბექა: - მე სამხატვრო აკადემიაში ვსწავლობ, მესამე კურსზე გადავდივარ. ფოტოგრაფიას ვეუფლები და ცეკვის გარდა, ვიდეოგრაფიითა და გრაფიკული დიზაინით ვარ დაინტერესებული. ერთი წელია, რაც საკუთარი სტუდია გავხსენით და ჩვენი მთავარი მიზანი არის ის, რომ ბავშვებს შევაყვაროთ ცეკვა, უფრო გავავრცელოთ ეს სტილი საქართველოში და ამავდროულად არ დავივიწყოთ ქართულიც. თუმცა, ჩვენს სტუდიაში მხოლოდ ჰიპ-ჰოპს ვასწავლით.

ნიკა: - ჩვენც ვცდილობთ, რომ არ შევწყვიტოთ განვითარება და ამაზე ვართ ორიენტირებულები. დავდივართ საზღვარგარეთ და იქედან პროფესიონალებისგან ვიღებთ მასტერკლასს, შემდეგ უკვე ჩამოგვაქვს საქართველოში და ჩვენს სტუდენტებს ვუზიარებთ.

- საიდან გაგიჩნდათ იდეა, რომ ქართული და უცხოური ცეკვის ელემენტები გაგეერთიანებინათ?

ბექა: - როგორც ვთქვით, ადრე ქართულ ცეკვებს ვცეკვავდით და ძალიან გვიყვარს. ახლა თანამედროვე ცეკვებს ვცეკვავთ და ესეც ძალიან გვიყვარს. აქედან გამომდინარე, გაგვიჩნდა იდეა, რომ ეს ორი საყვარელი მიმართულება გაგვეერთიანებინა და ჩაგვეტარებინა ექსპერიმენტი, სადაც აფრიკული და ქართული ელემენტები შევურიეთ ერთმანეთს. ვიცეკვეთ და ისეთი გამოვიდა, რომ საზოგადოებაც დაინტერესდა.

ნიკა: - დიდხანს ვფიქრობდით იმაზე, რომ გაგვეკეთებინა რაღაც, რაც ხალხს ძალიან მოეწონებოდა. ზუსტად დავდეთ ის პროდუქტი, რაც გეგმაში გვქონდა.

- თქვენს ვიდეოებს უამრავი გაზიარება და ნახვა აქვს სოციალურ ქსელში. ელოდით თუ არა ამხელა გამოხმაურებას?

ბექა: - ვიდეო რომ აიტვირთა, საერთოდ არ გვქონდა მოლოდინი, რომ ხალხი ასე აიტაცებდა. ინსტაგრამსთორისთვის იყო განკუთვნილი, რომ გამომწერების რაღაც ნაწილს ენახა. მაგრამ ძალიან ბევრმა ადამიანმა ნახა, უამრავმა გვერდმა წაიღო და ატვირთა სოციალურ ქსელში და საზოგადოებასაც ძალიან მოეწონა.

ნიკა: - უკვე 2 მილიონზე მეტი ნახვა აქვს ჩვენს ვიდეოებს და ძალიან გვახარებს ეს ფაქტი. ადამიანები გვგულშემატკივრობენ და წარმატებას გვისურვებენ.

- ბევრი ადამიანი გამოხატავს თქვენ მიმართ სიყვარულს, თუმცა ძალიან ცოტა ნეგატიური კომენტარიც გაკეთდა. მაგალითად, რამდენიმე ადამიანმა დააფიქსირა, რომ ქართულ ცეკვას თეთრი ბოტასით ცეკვა არ უხდება. რა შეგიძლიათ უთხრათ მათ?

ბექა: - მიუხედავად იმისა, რომ ჩვენ ქართული გავურიეთ თანამოედროვე ცეკვას, ამით არანაირი მესიჯი არ გადმოგვიცია, რომ ქართული უნდა დაიკარგოს და შეიცვალოს. ძალიან დიდ პატივს ვცემთ, რაც გვაქვს და არანაირი სურვილი არ გვაქვს, რომ დაიკარგოს. ხოლო, რაც შეეხება კრიტიკას, რაც ძალიან მცირე რაოდენობით მივიღეთ, ჩვენ არსად გვითქვამს, რომ რომელიმე ქართული ცეკვის სტუდიას ვედრებოდით. ეს იყო ორი ადამიანის კრეატიული ვიდეო, რომლებმაც იცოდნენ ქართული ცეკვაც და თანამედროვე ცეკვაც და არ გავდივართ ქართული ცეკვებით პროფესიულ ასპარეზზე სხვა მოცეკვავეებთან.

ნიკა: - ვინც ასეთ კომენტარებს წერდა, უმეტესობა ყალბი ანგარიშიდან იყო შემოსული.

- გაიჩინეთ უამრავი გულშემატკივარი. ისინი თქვენს ვიდეოებს ელოდებიან. მათ რა შეგიძლიათ უთხრათ?

ნიკა: - საზოგადოების რაღაც ნაწილი აქამდეც გვიცნობდა, მაგრამ დღეს, ფაქტობრივად, მთელი საქართველო გვიცნობს და ქუჩაში რომ გავდივართ, ეს დამოკიდებულება იგრძნობა. ძალიან გვიყვარს ყველა და ძალიან გვიხარია, ასე რომ გვგულშემატკივრობენ. ვეტყვი მათ, რომ ჩვენგან ბევრ სიახლეს დაელოდნენ იმიტომ, რომ გაჩერებას არ ვაპირებთ და ვგეგმავთ, რომ კიდევ უფრო განვვითარდეთ.

ბექა: - რახან ერთხელ უკვე გავახარეთ, ვგეგმავთ, რომ აღარ შევწყვიტოთ. ყოველთვის ვაჩუქებთ მათ პოზიტივს, დავუბრუნებთ იმ კომპლიმენტების ხარჯზე, რაც გვითხრეს. ძალიან დიდ მოტივაციას გვაძლევენ.

ნიკა: - საზოგადოებამ დაგვიფასა ჩვენი შრომა და ამიტომ უფრო მეტის გაკეთება გვინდა.

- ცეკვის გარდა გაქვთ რაიმე გატაცება, რაშიც აქტიურად ხართ ჩართულები?

ნიკა: - ჩვენი ცხოვრება ბავშვობიდან დაკავშირებულია ცეკვასთან. პროფესიად ვაქციეთ და შემოსავლის წყაროც ესაა. ცდილობთ, რომ ჩვენი სტუდია განვავითაროთ.

ბექა: - ცეკვის გარდა, მე ხელოვნებისკენ უფრო ღრმად ვიხრები, ვსწავლობ ფოტოგრაფიასა და ვიდეოგრაფიაზე, ვიღებთ ცეკვებს, ვხატავ, ვაკეთებ ილუსტრაციებს. მაგრამ, მთავარი პრიორიტეტი, რაც ყველაზე მეტად გვიყვარს და რისი კეთებაც ყველაზე მეტად გვსიამოვნებს, ცეკვაა.

- ბავშვებთან ურთიერთობა რა გამოწვევაა თქვენთვის?

ბექა: - პასუხისმგებლობაა, რა თქმა უნდა, თუმცა ძალიან სახალისოა ეს პროცესი. მშობლებს რომ მოჰყავთ ბავშვები, ფაქტობრივად, ჩვენთან იზრდებიან, სწავლობენ ძალიან ბევრ რაღაცას, არა მხოლოდ ცეკვას, არამედ ერთმანეთთან ადამიანურ ურთიერთობებს. ვცდილობთ, ყველა წინ წავწიოთ და ყველას ბედნიერება გავიზიაროთ.

ნიკა: - ერთი დიდი ოჯახივით ვართ, მხოლოდ სტუდიაში ცეკვით არ შემოიფარგლება ჩვენი საქმიანობა მათთან დაკავშირებით.

- სამომავლოდ რას გეგმავთ, რა არის თქვენი მთავარი მიზანი, რასაც ფიქრობთ, რომ განახორციელებთ?

ნიკა: - რაც ეს ვიდეო დავდეთ, ძალიან ბევრი შემოთავაზება მოგვივიდა. სხვადასხვა ვიდეოგრაფსა და ფილმმეიკერებს გაუჩნდათ სურვილი, რომ კლიპებში გადაგვიღონ.

ბექა: - აგვისტოში სვანეთში უნდა წავიდეთ და ხალხს არა მხოლოდ თეთრი ბოტასებით, არამედ ჩოხითაც შევთავაზებთ ცეკვას. ორივე იქნება წარმოდგენილი. სტუდიას რაც შეეხება, ნელ-ნელა ვფართოვდებით, უფრო დიდ მასშტაბებზე გადავდივართ და უფრო მეტი მსურველი გვემატება. გვინდა, რომ უფრო გავავრცელოთ ეს ყველაფერი და ხალხს პოზიტივი გადავცეთ.

ნიკა: - ემიგრანტებს მინდა ძალიან დიდი მადლობა ვუთხრა. ბევრი ქვეყნიდან გვწერენ: საბერძნეთიდან, გერმანიიდან, იტალიიდან, ამერიკიდან, რომ ძალიან ვუყვარვართ და გვგულშემატკივრობენ. ბევრი უცხოელიც გვწერს, გვამხნევებენ და მოგვიწოდებენ, რომ არ გავჩერდეთ.

ქართველი ბიჭების ცეკვა, რომელსაც დიდი მოწონება ხვდა წილად

თამარ იაკობაშვილი