10 წიგნი, რომელიც ღირს, რომ თანამედროვე მოზარდებმა წაიკითხონ - მშობლები

რა წავაკითხოთ მოზარდებს? - ეს კითხვა ალბათ ბევრ მშობელს აწუხებს, ამიტომ ჩვენ შევარჩიეთ რამდენიმე კატეგორიის წიგნი თანამედროვე თინეიჯერებისთვის, რომელთა წაკითხვისას ისინი აღმოაჩენენ რაღაც ახალს ცხოვრებაზე, სიყვარულზე, მეგობრობაზე, წარმატებასა და მიღწევებზე, სწავლასა და ურთიერთობებზე. და რაც მთავარია, ამ წიგნების შეძენას „ბიბლუსის“ წიგნის მაღაზიებში და Biblusi.ge-ზე, სპეციალური ფასდაკლებით შეძლებთ.

1. მარკუს ზუზაკი - წიგნის ქურდი

ომის დროინდელი ბიოგრაფიები მარკუს ზუზაკმა თავის რომანებში გააცოცხლა. ახალგაზრდა მწერალი უკვე ექვსი რომანის ავტორია, მათ შორის ყველაზე ცნობილი და პოპულარული სწორედ „წიგნის ქურდია“, სადაც ბავშვის თვალით დანახულ ომზე ვკითხულობთ. მოვლენები 1939 წელს ვითარდება. წიგნი ჩაგვაფიქრებს იმაზე, თუ რა რთულია ცხოვრება. რისი გამოწვევა შეუძლია ომს. ამბავს თავად სიკვდილი ჰყვება. სიკვდილი ამბობს, რომ ადამიანებმა თავი მას მოაბეზრეს. ცხრა წლის ლიზელი დედობილ-მამობილთან ერთად, ჰიმელსტრიტზე ცხოვრობს. მისი მშობლები საკონცენტრაციო ბანაკში გაგზავნეს. გოგონა წიგნებს იპარავს, კითხულობს და ბოლოს, თვითონ იწყებს წერას. ეს არის ამბავი ლიზელსა და მის მეზობელზე, ეს ჰიმელს-სტრიტის დაბომბვის ისტორიაა. წიგნი მსოფლიო-ბესტსელერია და მისი წარმატებული ეკრანიზაციაც არსებობს.

2. კერენ მაკმანუსი - ერთი ჩვენგანი ტყუის

ბეივიუს სკოლის სადამსჯელო ოთახში უჩვეულო ხუთეული იყრის თავს: ბრონუინი „ტვინიკოსაა“ – საუკეთესო მოსწავლე, რომელიც არასდროს არღვევს წესებს; ედი – სკოლის დედოფალი და ქარაფშუტად მიჩნეული ლამაზმანი; ნეითი – „კრიმინალი“ – საეჭვო საქმეებში შემჩნეული პრობაციონერი, კუპერი კი ბეისბოლის ამომავალი ვარსკვლავი და სკოლის საამაყო სპორტსმენი; ხოლო საიმონი „ყოვლისმცოდნე“, რომელმაც საგანგებო აპლიკაციაც კი შექმნა, ადგილობრივი ჭორები რომ გაევრცელებინა.

3. ჯორჯ რ. რ. მარტინი - ყინულის დრაკონი

ყინულის დრაკონის ძალასა და დიდებულებაზე მრავალი მითი და ლეგენდა არსებობს. უხსოვარი დროიდან მოყოლებული, ვერავინ შეძლო მისი მოთვინიერება და აი, საუკუნეებგამოვლილი, ბრძოლებგადატანილი შემზარავი ურჩხული ჯორჯ რ. რ. მარტინის მიერ შექმნილ სამყაროსაც დაემუქრა, გადაუფრენს მას და შიშის ზარს დასცემს ადამიანებს. ყველა ემალება მის რისხვას, ყველას ზარავს მისი დანახვა! მხოლოდ ერთი პატარა გოგონა ელოდება მოუთმენლად ურჩხულთან შეხვედრას. ეს ადარაა, იმ სოფლის მკვიდრი, რომელიც დრაკონის ყოველ გამოჩენაზე ყინულის ფენით იფარება...

4. ჯონ გრინი - ალასკას ძიება

"ხანდახან შეიძლება ერთი ბრძოლა წააგო, მაგრამ ომს, როგორც წესი, ხულიგნები იგებენ." მაილზ ჰოლტერი უიღბლო თინეიჯერია უცნაური ჰობით ცნობილი ადამიანების უკანასკნელ სიტყვებს სწავლობს. ფრანსუა რაბლეს სიტყვებით შთაგონებული მაილზი გადაწყვეტს ეძიოს "დიადი შესაძლოა" და სასწავლებლად მშობლებისგან მოშორებით, "კალვერ კრიკში"გაემგზავრება. ახალი მეგობრები, ალასკა იანგი, ჩიპ მარტინი და ტაკუმი ჰიკოჰიტო ბიჭის ცხოვრებას სრულიად ცვლიან. მომხიბვლელი, სიცოცხლით სავსე, უშიშარი, რისკიანი ალასკა ყველა სახიფათო წამოწყების სული და გულია. მაილზ ჰოლტერს გოგონა უყვარდება, შემდეგ კი...

5. კირა კასი - შერჩევა

მე არ მინდოდა დიდება. არ მინდოდა ერთადერთი ვყოფილიყავი. არც კი მიცდია. 35 გოგო. 1 გვირგვინი. შეჯიბრება სიცოცხლისთვის. რჩეულებს განსაკუთრებული სამოსი, ფასდაუდებელი ძვირფასეულობა, სასახლეში ცხოვრება და პრინც მაქსონის გულის მოსაგებად ბრძოლა ელით. ამერიკა სინგერისთვის კონკურსში მონაწილეობა მძიმე სასჯელია. მას არ უნდა სახლიდან წასვლა, გვირგვინისთვის დაუნდობელ ბრძოლაში ჩაბმა და ცხოვრება სასახლეში, რომელსაც მეამბოხეები გამუდმებით ესხმიან თავს. სამეფო კარზე ამერიკა პრინც მაქსონს გაიცნობს. ეს ბედისწერის შემობრუნებაა. გოგონა იმაზე ეჭვობს, რისაც აქამდე გულით სწამდა. და ხვდება, რომ ოცნება მიღმა სამყაროში იფანტება, მომავალი კი სულ სხვა იქნება.

6. სარა ჯ. მაასი - ეკლების და ვარდების სამეფო

ოდესღაც დიდებული ოჯახი, გაღატაკების შემდეგ, ციხე-დარბაზიდან პატარა კოტეჯში გადასახლდება. სამი დიდან ყველაზე უმცროსი, ცხრამეტი წლის ფერა იძულებულია, შიმშილით რომ არ დაიხოცონ, საშიშ ტყეში ინადიროს. ერთ დღეს ფერა ტყეში მგელს მოკლავს. იმავე საღამოს, მას შინ მხეცისმაგვარი არსება შურის საძიებლად მიადგება. მომაკვდინებელი მაგიით მოცულ მხარეს ფერა მხოლოდ და მხოლოდ ლეგენდებიდან იცნობს და მალე აღმოაჩენს, რომ მისი დამატყვევებელი ცხოველი კი არა, ტემლინია - საშიში, უკვდავი ფეა.

7. ჯენი ჰანი - ყველა ბიჭს, რომლებიც მყვარებია

16 წლის ლარა-ჯინი გულისნადებს მხოლოდ წერილებს ანდობს და მათ საქუდე კოლოფში ინახავს _ წერილი სულ ხუთი ცალია, იმ ბიჭებისთვის, რომლებიც ოდესმე ჰყვარებია. ერთხელაც ხუთივე წერილი ადრესატებთან მოხვდება და გოგონა სიცრუის კორიანტელში გაეხვევა.

სანამ ლარა-ჯინი გაერკვევა, ეს როგორ მოხდა, იმაშიც დარწმუნდება, რომ ცხოვრება ტკბილ-მწარე მოულოდნელობებით არის სავსე: სადაც სიყვარულია, იქ ვერაგობაც შეიძლება იყოს ჩასაფრებული; შეიძლება გგონია, აი,სწორედ ეს ბიჭი მიყვარსო, მაგრამ თურმე ნამდვილი სიყვარული შენ ახლოს, გვერდით ყოფილა, უბრალოდ, დანახვა გჭირდებოდა და რომ ამქვეყნად ოჯახი ყველაფერზე მთავარია.

8. რეიჩელ ლიპინკოტი - ორი ნაბიჯი შენამდე

შეიძლება გიყვარდეს ის, ვისაც ვერასდროს შეეხები? სტელა გრანტს უყვარს, როცა ყველაფერს აკონტროლებს. ამჟამად სტელას ყველაზე მეტად იმის კონტროლი სჭირდება, რომ არ მიუახლოვდეს არაფერს, რამაც, შეიძლება, მისთვის ფილტვების გადანერგვის შესაძლებლობას საფრთხე შეუქმნას. ერთადერთი რამ, უილ ნიუმენს უნდა, ამ საავადმყოფოდან გაღწევაა. სულაც არ ანაღვლებს მკურნალობის კურსი და ახალი, საოცარი წამლის გამოცდა. მალე 18 წლის გახდება, მოიხსნის ყველა აპარატს და საავადმყოფოების მიღმა, რეალურად დაათვალიერებს მსოფლიოს...

9. ემილი ბარი - ფლორა ბენკსის ერთი მოგონება

როგორ უნდა მიხვდეს, ვისი ნდობა შეიძლება, როცა საკუთარ თავსაც ვერ ენდობა? და თუ ხელებზე დაიხედავს და დაინახავს წარწერას: „ფლორა, იყავი მამაცი“, იქნებ გადაწყვეტილებები დამოუკიდებლადაც მიიღოს. ფლორას ანტეროგრადული ამნეზია აქვს, დღიდან დღემდე არაფერი ამახსოვრდება: არც მეგობრის ხუმრობა, არც მშობლების დარიგებები, ისიც კი არ ახსოვს, რამდენი წლისაა. შემდეგ იმას აკოცებს, ვისაც, წესით, არ უნდა აკოცოს და... მეორე დღეს ეს ახსოვს! უფრო მეტიც, ეს ამბავი მომნევნო დღეებშიც არ ავიწყდება. მაგრამ ის ბიჭი სადღაც გაუჩინარდა. ფლორა ფიქრობს, რომ არქტიკაში გაემგზავრა. დაუბრუნდება გოგონას მეხსიერება, თუ დრეიკს შეხვდება? - ვინ იცის! და მაინც, ფლორამ უნდა სცადოს!

10. ნიკოლა იუნი - მზეც ხომ ვარსკვლავია

ნატაშას მხოლოდ მეცნიერებისა და ფაქტების სჯერა. ბედისწერა, იღბალი და მიუღწეველზე ოცნება მისთვის გაუგებარი რამაა; კიდევ უფრო წარმოუდგენელია თუნდაც სიმპათიური ბიჭის ერთი ნახვით შეყვარება - მით უმეტეს მაშინ, როცა თორმეტ საათში ნატაშას და მის ოჯახს ქვეყნიდან იამაიკაზე აძევებენ. დანიელი ნატაშასგან სრულიად განსხვავებულად ფიქრობს, ლექსების წერა უყვარს და პოეტობაზე ოცნებობს. სწორედ ამიტომ ჰგონია, რომ ბედისწერა მას და ნატაშას რაღაც განსაკუთრებულს უმზადებს. საოცარმა დამთხვევებმა ნატაშა და დანიელი ერთმანეთს შეახვედრა. როგორ განვითარდება მოვლენები და მილიონი შესაძლებელი მომავლიდან რომელი ახდება - წაიკითხავთ ბესტსელერ „ყველაფერი, ყველაფერის“ ავტორის, ნიკოლა იუნის მეორე რომანში „მზეც ხომ ვარსკვლავია“.