მიიღეთ საკუთარი სხეული, როგორიც არის – შთამბეჭდავი ფოტოსესია - მშობლები

პროექტი "მშვენიერი სხეული" ეძღვნება ქალებს მშობიარობის შემდეგ - რატომ უღებთ ფოტოს დედაჩემს? – მკითხა პატარა ბიჭმა ფოტოგადაღების დროს.

- იმიტომ, რომ გვინდა, მისი ამბავი სხვა დედებს გავუზიაროთ და ვასწავლოთ, მიიღონ საკუთარი სილამაზე ისეთი, როგორიც არის, - ვუპასუხე.

- კი, მაგრამ დედას არ მიაჩნია თავი ლამაზი! – შემედავა ბავშვი.

- ჰოდა, ამიტომაც ვუღებ ფოტოს. ჩვენ მას სიმართლე უნდა ვაჩვენოთ.

ამერიკელი ფოტოგრაფის ჯეიდ ბილის პროექტი "მშვენიერი სხეული" ეძღვნება ქალებს მშობიარობის შემდეგ. ყველაფერი მისი ორსულობიდან დაიწყო, რომლის დროსაც 23 კილოგრამი "აკრიფა" და მშობიარობის შემდეგ გაუჭირდა უწინდელ ფორმებთან დაბრუნება.

- თავიდან, როცა პროექტზე დავიწყე მუშაობა, არც მეგონა, რა მასშტაბებს მიიღებდა. რამდენიმე ავტოპორტრეტი გადავიღე ჩემს 5 თვის ვაჟთან ერთად და ბლოგზე დავდე, სადაც ვწერდი, როგორ შეიცვალა ჩემის სხეული მშობიარობის შემდეგ. უამრავი წერილი მომივიდა – ყველას სურდა თავისი ამბის გაზიარება. მაშინ მივხვდი, რომ მათზეც უნდა მომეყოლა სწორედ ფოტოებით, და დავხმარებოდი.

პროექტის პირველი ფოტო 24 წლის მოცეკვავეს ეკუთვნის. ის ყოველთვის მალავდა მუცელს, რადგან არ სურდა ვინმეს გაეგო, როგორია მისი სხეული ტანსაცმლის შიგნით. ფოტოზე ის თავის ორ შვილთან ერთადაა. როცა ეს ფოტო "ფეისბუქზე" ატვირთა, ასობით ქალმა მისწერა ჯეიდს, მადლობას უხდიდნენ, რომ გაბედა და უჩვენა სხეული, რომელიც ზუსტად ისეთია, როგორიც მათ აქვთ.

ბევრმა სთხოვა მსგავსი ფოტოსესიების ჩატარება და ასე შეივსო პროექტი სხვადასხვა დედა-შვილის ამაღელვებელი ფოტოებით.