რომელი ოჯახებისათვის ასუბსიდირებს სახელმწიფო იპოთეკურ სესხებს და რა კრიტერიუმების დაკმაყოფილება მოგიწევთ შეღავათის მისაღებად - პასუხები ეკონომიკის სამინისტროდან - მშობლები

2021 წლის პირველი სექტემბრიდან სუბსიდირებული იპოთეკური სესხის სახელმწიფო პროგრამა ამოქმედდა, როლის მიზანიც მრავალშვილიანი ან ისეთი ოჯახების საცხოვრებელი პირობების გაუმჯობესებაა, რომლებსაც ჰყავთ ახალშეძენილი შვილი ან შვილები - აღნიშნული ინფორმაცია "აწარმოე საქართველოში" ვებგვერდზეა გამოქვეყნებული.

პროგრამა ითვალისწინებს ასეთი ოჯახების ან მარტოხელა მშობლების/ქვრივის მიერ აღებულ იპოთეკურ კრედიტებზე დარიცხული საპროცენტო სარგებლის სუბსიდირებას სესხის გაცემიდან 60 თვის მანძილზე.

პროგრამით სარგებლობის შესაძლებლობა აქვს ოჯახს/მარტოხელა მშობელს/ქვრივს, თუ სესხის აღების მომენტში:

• ჰყავს 2021 წლის 1 სექტემბრის შემდეგ დაბადებული 1 წლამდე ასაკის შვილი;
• ოჯახს/მარტოხელა მშობელს/ქვრივს, თუ სესხის აღების მომენტში ჰყავს 3 ან მეტი არასრულწლოვანი შვილი;
• ოჯახს/მარტოხელა მშობელს/ქვრივს, რომელსაც სესხის აღების მომენტში ჰყავს 2021 წლის 1 სექტემბრის შემდეგ შვილად აყვანილი არასრულწლოვანი პირი.

პროგრამის ფარგლებში იპოთეკური კრედიტების გაცემა მოხდება მხოლოდ ეროვნულ ვალუტაში, მას გასცემს კომერციული ბანკი, პირველადი და მეორადი ბინის/სახლის შესაძენად ან კერძო სახლის ასაშენებლად.

იპოთეკური სესხი უნდა გაიცეს 2021 წლის 1 სექტემბრის შემდეგ. სესხის მაქსიმალური მოცულობა იქნება 200 000 ლარი. თუმცა, დასაშვებია, რომ ასაშენებელი ბინის/სახლის ღირებულება აღემატებოდეს 200 000 ლარს.

პროგრამა ატარებს ერთჯერად ხასიათს და მასში მონაწილეობა ბენეფიციარს შეუძლია მხოლოდ ერთხელ, მის მიერ აღებული სესხის მოცულობის მიუხედავად. ეს შეზღუდვა არ ვრცელდება მრავალშვილიან ოჯახებზე - მათ შეეძლებათ მე-4 და მეტი შვილის გაჩენის შემთხვევაში ხელმეორედ ისარგებლონ პროგრამით და შესაბამისად, შეძლონ ახალი, მაქსიმუმ 200 000 ლარიანი სესხის აღება.

საკითხზე დამატებითი შეკითხვებისათვის, ეკონომიკისა და მდგრადი განვითარების სამინისტროს მივმართეთ:

- პროგრამის ფარგლებში რამდენ პროცენტს ასუბსიდირებს სახელმწიფო და რა ვადებში?

- სააგენტო ახორციელებს კომერციული ბანკის მიერ ბენეფიციარისთვის გაცემულ კრედიტზე დარიცხული საპროცენტო განაკვეთის სუბსიდირებას სესხის გაცემიდან 60 (სამოცი) თვის განმავლობაში საქართველოს ეროვნული ბანკის მიერ დადგენილ რეფინანსირების განაკვეთს გამოკლებული:

• 3.5% - ის, მაგრამ არაუმეტეს 6%-ის ოდენობით - თუ მსესხებელს ჰყავს 1 ან 2 შვილი;
• 1.5% - ის, მაგრამ არაუმეტეს 8%-ის ოდენობით - თუ მსესხებელს ჰყავს 3 ან მეტი შვილი; * გასათვალისწინებელია, რომ ყველა შემთხვევაში ერთი შვილი მაინც უნდა იყოს 1 წლამდე.

- ბანკების თვალსაზრისით, რაიმე შეზღუდვა არსებობს?

- პროგრამაში ჩართულია "კომერციული ბანკების საქმიანობის შესახებ" საქართველოს კანონის შესაბამისად ლიცენზირებული ყველა კომერციული ბანკი, რომელთანაც გაფორმებულია სათანადო ხელშეკრულება;

- რამდენმა ოჯახმა ისარგებლა აღნიშნული შეთავაზებით და ძირითადად, რა პროცენტში დაუფინანსეს გადასახადი?

- დღევანდელი მდგომარეობით, სააგენტოს მხრიდან დადასტურებულია 4,359 ოჯახის განაცხადი. ბანკის წლიური საშუალო საპროცენტო განაკვეთი შეადგენს 13.59%-ს.

- რა კრიტერიუმებით უნდა შეფასდეს ქონება, რომელსაც იპოთეკით დატვირთავენ?

- აღნიშნულ საკითხს კომერციული ბანკი ადგენს;

- სამომავლოდ თუ იგეგმება პროგრამის გაფართოება?

- ამ პროგრამაში ცვლილების შეტანა შესაძლებელია ნებისმიერ დროს საქართველოს მთავრობის დადგენილებით. თუმცა ამ ეტაპზე, აღნიშნულ დადგენილებაში რაიმე ტიპის ცვლილება დადგენილი არ არის.

- შესაძლებელია, რეგიონში მცხოვრებმა ადამიანმა თბილისში მსგავსი შეღავათით ისარგებლოს?

- პროგრამა ვრცელდება მთელი საქართველოს მასშტაბით.

დამატებითი ინფორმაციისათვის შეგიძლიათ მიმართოთ ეკონომიკისა და მდგრადი განვითარების სამინისტროს ნომრებზე: 1403; 2 99 11 11; 2 99 11 05

თამარ იაკობაშვილი