"ასეთი რუჯი ბევრად უსაფრთხოა, ვიდრე მზის სხივების პირდაპირი ზემოქმედება ან სოლარიუმი" - ცნობილი დერმატოლოგი გარუჯვის მარტივ საშუალებებზე - მშობლები

ბოლო დროს კანის ფერის შესაცვლელად ავტორუჯს სულ უფრო მეტი ადამიანი იყენებს. ბევრისთვის ეს საშუალებები (რომლებიც კრემის, სპრეის ან ზეთის სახითაა წარმოდგენილი) საკმაოდ მოხერხებული და კომფორტული საშუალება აღმოჩნდა. ეს საშუალებები გარუჯულ ეფექტს მზეზე წოლისა და სოლარიუმის გარეშე იძლევა და ფერს რამდენიმე დღის განმავლობაშიც გვინარჩუნებს.

დავინტერესდით, რამდენად უსაფრთხოა ავტორუჯის საშუალებები კანისთვის და რა პერიოდულობითაა რეკომენდებული მათი გამოყენება - ამ თემაზე დერმატო-ვენეროლოგი, ევროპის დერმატო-ვენეროლოგთა აკადემიაში და სქესობრივად გადამდები ინფექციების ევროპის ბიუროში (IUSTI) საქართველოს წარმომადგენელი, ჯანდაცვის სამინისტროს ოფიციალური ექსპერტი, სოსო კობახიძე გვესაუბრება:

- ავტორუჯის გამოყენება ბევრად უსაფრთხოა, ვიდრე სოლარიუმი, ან მზის სხივების კანზე პირდაპირი ზემოქმედება. ზოგადად, ჯანსაღი რუჯი არ არსებობს. მზის სხივების ზემოქმედების შედეგად, კანს დამცველობითი რეაქცია უჩნდება და მუქდება. მაგრამ, სხვადასხვა საშუალებას შორის, ყველაზე ნაკლებად მავნე სწორედ ავტორუჯია. თუმცა, ამ შემთხვევაშიც, გარკვეული საფრთხეები უნდა გავითვალისწინოთ.

პირველ რიგში, მნიშვნელოვანია, რომ ხარისხიანი პროდუქცია შევიძინოთ. პროდუქციის ხარისხს ფასი არ განსაზღვრავს. შეიძლება, ძალიან ძვირი ღირდეს და ცნობილი ბრენდის მიერ იყოს წარმოებული, მაგრამ მავნე ნივთიერებებს შეიცავდეს და არც ეფექტური იყოს. ასევე, პირველ ეტაპზე მაინც, ჯობს, ეს პროფესიონალმა გააკეთოს, რადგანაც ერთიანი ფერის მისაღებად, სხეულის სხვადასხვა მიდამოში დატანილი კრემის სისქე სხვადასხვანაირი უნდა იყოს. როდესაც ავტორუჯს მთელ სხეულზე ერთნაირი სისქით ვისვამთ, შესაძლოა სხვადასხვა ფერი მივიღოთ და უკმაყოფილოები დავრჩეთ.

მეორე მხრივ, ავტორუჯი, რომელიც სპრეის სახითაა წარმოდგენილი, შესაძლოა სასუნთქ გზებში მოხვდეს და პრობლემა გახდეს იმ ადამიანებისათვის, რომლებსაც ასთმური მოვლენები, ბრონქების დაზიანება აწუხებთ. ამიტომაც, ამ შემთხვევაში, ექიმთან კონსულტაციის გავლა კარგი იქნებოდა.

ზეთებისა და კრემების სახით წარმოდგენილი ავტორუჯების დატანა კანის დაზიანებულ უბნებზე არ შეიძლება. წინააღმდეგ შემთხვევაში, შესაძლოა, პროცესი გაამწვავოთ. ასევე, ავტორუჯი არ უნდა გამოიყენოთ თვალების სიახლოვეს, ლორწოვანზე, მაგალითად, ტუჩებზე.

ბევრ ადამიანს აკნე, გამონაყარი აწუხებს. თუკი ამ დროს ავტორუჯს გამოვიყენებთ, შესაძლოა, აკნეს გამწვავება გამოვიწვიოთ. ამიტომ, როგორც აღვნიშნე, მსგავს შემთხვევებში, ჯობს, კონსულტაცია სპეციალისტთან გაიაროთ და პირველ ეტაპზე მაინც, ვიდრე თავად კარგად შეძლებთ ტექნიკის შესწავლას, სალონში, გამოცდილმა ადამიანმა გაგიკეთოთ.გასათვალისწინებელია ისიც, რომ ავტორუჯი ეფექტს რამდენიმე დღის განმავლობაში ინარჩუნებს და მერე ისევ გვიწევს გამოყენება. მაგრამ, რა საკვირველია, ჯანმრთელობისათვის მიყენებული ზიანი, რასაც ულტრაიისფერი გამოსხივება იწვევს, მას არ ახასიათებს.

ავტორუჯის გამოყენებისთვის კონკრეტული პერიოდულობა განსაზღვრული არ არის. როდესაც დაგჭირდებათ, შეგიძლიათ, წაისვათ. განსაკუთრებით მაშინ, როცა გსურთ, რომ შედეგი სწრაფად მიიღოთ. სწრაფი შედეგისთვის არ ღირს, 30-40 წუთის განმავლობაში მზის სხივების პირდაპირი ზემოქმედების ქვეშ ყოფნა ან სოლარიუმში წასვლა.

- ავტორუჯის გამოყენებისას, კანი რის ხარჯზე იღებს მუქ შეფერილობას?

- ეს არის სპეციალური ქიმიური ნივთიერებები, რომლებიც კანის სისქეს არ გადალახავს და ღრმა შრეებში არ იჭრება. როდესაც აღვნიშნე, რომ ლორწოვანზე მისი გამოყენება არ შეიძლება, ეს განპირობებულია იმით, რომ ამ მიდამოებში რქოვანა შრე არ გვაქვს, ამიტომ შესაძლოა, უფრო ღრმად შეაღწიოს, რაც რეკომენდებული არ არის. ავტორუჯის გამოყენებისას უჯრედები არ ზიანდება. ჩვეულებრივი, საღებავის პრინციპი აქვს. მაგრამ, აუცილებელია, ხარისხიანი პროდუქცია შევარჩიოთ.

- რა უნდა გავითვალისწინოთ უსაფრთხოებისთვის, არის ნივთიერებები, რომლებსაც ეს საშუალება არ უნდა შეიცავდეს?

- ხშირად მომხმარებლებს დიდი ინსტრუქციის წაკითხვის, დეტალური განხილვის შესაძლებლობა არ აქვთ. მით უმეტეს, როდესაც ინფორმაცია ძალიან წვრილადაა დატანილი. ამიტომაც, არის გარკვეული ნიშნები, რომლებიც შეგიძლიათ, მარტივად დაიმახსოვროთ. ევროპული სტანდარტით, ინსტრუქციაზე პირველი რა ნივთიერებებიც წერია, კონკრეტულ პროდუქტში მათი კონცენტრაცია მეტია, ვიდრე უფრო ქვემოთ ჩამოთვლილი ნივთიერებების. ამიტომაც, თუ შეფუთვაზე ემულგატორები და კონსერვატორები ბოლოში ეწერება, ეს იმას ნიშნავს, რომ მათი რაოდენობა პროდუქტში მცირეა და უსაფრთხოა. თუ ჩამონათვალის სათავეშია აღნიშნული, ეს პროდუქტი ნაკლებად ხარისხიანია.

- რა პრობლემები შეიძლება შეუქმნას ადამიანს ავტორუჯის სისტემატურმა გამოყენებამ?

- როგორც უკვე აღვნიშნე, ავტორუჯის გამოყენება იმაზე ბევრად უსაფრთხოა, ვიდრე რუჯის მიღების სხვა საშუალებები. არც რაიმე კონკრეტული პერიოდულობა აქვს განსაზღვრული. მთავარია, ინსტრუქცია დავიცვათ და შევარჩიოთ ხარისხიანი საშუალება. მაგრამ, ზედმეტი არასდროს არაფერი ვარგა და მასზე დამოკიდებული არ უნდა გავხდეთ.

- შეუძლიათ თუ არა ავტორუჯის გამოყენება მოზარდებს?

- დიახ, შესაძლებელია. მათ შემთხვევაშიც, აღნიშნული საშუალების გამოყენება პრობლემას არ წარმოადგენს.

- ასეთ დროს ლაზერული ეპილაციის გაკეთება თუ შეიძლება?

- ავტორუჯის ეფექტი სულ რამდენიმე დღე გრძელდება და ერთმანეთთან წინააღმდეგობაში არ მოდის.

თამარ იაკობაშვილი