"ფილტვის კიბო ყველაზე გავრცელებულია სიმსივნეებს შორის..." - როგორია მისი ცნობილი და ნაკლებად ცნობილი სიმპტომები და რისკფაქტორები? - მშობლები

რუსთავი2-ზე პროექტ "ნამდვილი ექიმების" მორიგი გადაცემა ფილტვის კიბოს მიეძღვნა, რომელიც, ყველაზე გავრცელებულია სიმსივნეებს შორის.

- ფილტვის კიბო ყველაზე გავრცელებულია სიმსივნეებს შორის მსოფლიოში. და გავრცელებულია ყველაზე მეტად იმ რეგიონებში, სადაც სტატისტიკურად თამბაქოს ყველაზე მეტი მომხმარებელია. ასეთი რეგიონია საქართველოც. სიგარეტის მოწევა ერთ-ერთი მთავარია იმ რისკფაქტორებს შორის, რომელმაც შეიძლება გამოიწვიოს ფილტვის ავთვისებიანი სიმსივნე. ვიზუალურადაც არაერთხელ გვაქვს ნანახი მწეველის და არამწეველის ფილტვს შორის სხვაობა...

თუმცა ისიც უნდა აღინიშნოს, რომ მითია, თითქოს ფილტვის კიბო მხოლოდ მწეველებს ემართებათ. სიგარეტის მოხმარება არ არის ერთადერთი რისკფაქტორი. სტატისტიკური მონაცემებით, ფილტვის კიბო 80%-ით უვითარდებათ მწეველ ადამიანებს. დანარჩენი 20% ნაწილდება იმ ადამიანებზე, რომლებიც არ არიან თამბაქოს მომხმარებლები.

რისკფაქტორებს შორის არის ასევე:

• პასიური მწეველობა,
• რადიაცია,
• სხივური თერაპია,
• რადონის აირის ზემოქმედება,
• აზბესტი და სხვა კანცეროგენები,
• ინდუსტრიული წვის პროდუქტები,
• გენეტიკა.

საწყის სტადიაზე ფილტვის კიბო სავსებით უსიმპტომოდ მიმდინარეობს. შემდეგ სტადიაზე კი ვლინდება შემდეგი, კარგად გავრცელებული და ნაკლებად გავრცელებული სიმპტომები:

ხველა, რომელიც არ არის დაკავირებული გაციებასთან და მძიმდება დროთა განმავლობაში;

• ტკივილი გულ-მკერდის არეში;
• სისხლის არსებობა ნახველში;
• ჩახლეჩილი ხმა;
• სტვენის ხმა ფილტვებში;
• დაქვეითებული მადა.

ნაკლებად გავრცელებული სიმპტომებია:

• ხრიალი;
• ტკივილი ყლაპვის დროს;
• ხელის თითებზე ცვლილებები, მეტად მოხრილი ფალანგები;
• ოფლიანობა სახეზე და კისრის მიდამოებში;
• მუდმივი ტკივილი გულ-მკერდის და მხრის არეში.