რა დაემართება ორგანიზმს, თუ ყოველდღე შოკოლადსა და სხვადასხვა ტკბილეულს მიირთმევთ - მშობლები

ბევრი ადამიანისათვის კანფეტის, შოკოლადის, სხვადასხვა ტკბილეულის გარეშე ყოველდღიურობა წარმოუდგენელია. ტკბილეული ჩვენს განწყობაზეც მოქმედებს და გემოვნური თვისებებითაც გამოირჩევა. თუმცა, სპეციალისტებმა კიდევ ერთხელ განმარტეს, რა საფრთხე შეიძლება შევუქმნათ ჩვენს ჯანმრთელობას, თუ ტკბილეულს ყოველდღიურად მივიღებთ:

1. წონის მომატება

ტკბილეულის ხშირი მოხმარების ერთ-ერთი მთავარი შედეგი წონის მატებაა. კანფეტი, შოკოლადი დიდი რაოდენობით შაქარს შეიცავს, რაც ორგანიზმს ცარიელი კალორიებით ამარაგებს. ამ კალორიებს კვებითი ღირებულება არ აქვთ და არც სისავსის განცდას გვიტოვებს, ამიტომ მათი დიდი რაოდენობით მიღება გვინდა.

დროთა განმავლობაში, მსგავსი ტიპის ცხოვრების წესმა შეიძლება სიმსუქნე გამოიწვიოს. სიმსუქნე კი, თავის მხრივ, არაერთ გართულებას იწვევს. მათ შორისაა: დიაბეტი, გულ-სისხლძარღვთა სისტემის დაავადებები და ჯანმრთელობის სხვა პრობლემები.

2. სტომატოლოგიური პრობლემები

ტკბილეულის გადაჭარბებული მოხმარება ასევე უარყოფითად აისახება კბილების მდგომარეობაზე. შაქარი კბილების გაფუჭების ერთ-ერთი მთავარი მიზეზია. ბაქტერიები, რომლებიც ჩვენს პირში ცხოვრობენ, შაქრით იკვებებიან და გამოიმუშავებენ ისეთ მჟავებს, რომლებიც კბილის მინანქარს ანადგურებს. ტკბილეულის რეგულარული მოხმარება კბილების სისუსტეს იწვევს, რამაც შეიძლება ტკივილი, კბილების ცვენა და სხვა არაერთი სტომატოლოგიური პრობლემა განაპირობოს.

3. სისხლში შაქრის დონეზე ნეგატიური გავლენა

ტკბილეული დიდი რაოდენობით მარტივ ნახშირწყლებს შეიცავს, რომლებსაც ორგანიზმი სწრაფად შეიწოვს. ეს კი სისხლში შაქრის დონის მკვეთრ მატებას იწვევს. მალევე კი შიმშილის, დაღლილობისა და გაღიზიანების შეგრძნება გვიჩნდება, რადგანაც ტკბილეული ენერგიით მხოლოდ მცირე ხნით გვამარაგებს. ერთგვარი მანკიერი წრე იქმნება, როცა ადამიანი ტკბილეულზე, ფაქტობრივად, დამოკიდებული ხდება და ენერგიისა და განწყობის შესანარჩუნებლად, გამუდმებით სურს, რომ მიიღოს.

4. ნივთიერებათა ცვლის დარღვევა

დიდი რაოდენობით შაქრის რეგულარულად მოხმარებამ შეიძლება ინსულინ რეზისტენტობა გამოიწვიოს. ეს არის მდგომარეობა, რომლის დროსაც უჯრედები ინსულინის მიმართ ნაკლებად მგრძნობიარენი ხდებიან. ეს შესაძლოა მე-2 ტიპის დიაბეტის ჩამოყალიბებას წინ უსწრებდეს. გარდა ამისა, შაქრის ჭარბი რაოდენობით მიღებამ შეიძლება ტრიგლიცერიდების დონის მომატება გამოიწვიოს, რაც გულ-სისხლძარღვთა დაავადებების განვითარების რისკს ზრდის.

5. გულ-სისხლძარღვთა სისტემის დაავადებების გაზრდილი რისკი

როგორც სპეციალისტები ამბობენ, შაქრის გადაჭარბებული მოხმარება გულ-სისხლძარღვთა სისტემის სხვადასხვა დაავადებასთანაა დაკავშირებული. შაქარმა შეიძლება სისხლში ლიპიდების დონის მომატება გამოიწვიოს, რაც არტერიებში ცხიმოვანი დეპოზიტების წარმოქმნას ხელს უწყობს. შედეგად, ამან შეიძლება ათეროსკლეროზის, ჰიპერტენზიის და გულ-სისხლძარღვთა სისტემის სხვა პათოლოგიის განვითარების რისკი გაზარდოს.

6. ფსიქოლოგიური ეფექტები

ტკბილეულის მიღებამ ასევე შეიძლება თქვენს ფსიქო-ემოციურ მდგომარეობაზეც მოახდინოს გავლენა. ტკბილეული ხშირად სიამოვნებასთან და სიხარულთან ასოცირდება. თუმცა, შაქრის რეგულარულმა მოხმარებამ შეიძლება დამოკიდებულება გამოიწვიოს.

ასეთ დროს ადამიანს ტკბილეულის გარეშე ცხოვრება უჭირს და მისი განწყობა სისხლში შაქრის დონეზეა დამოკიდებული. ამან შეიძლება შექმნას ციკლი, რა დროსაც ადამიანი სულ უფრო და უფრო მეტ ტკბილეულს მოიხმარს, რომ კმაყოფილების განცდა მუდმივად ჰქონდეს.

7. იმუნური ფუნქციის დარღვევა

შაქარს შეუძლია იმუნურ სისტემაზეც მოახდინოს გავლენა. კერძოდ, კვლევებმა აჩვენა, რომ შაქრის მაღალმა მოხმარებამ შეიძლება იმუნური სისტემა დათრგუნოს. ასეთ დროს კი ორგანიზმს ინფექციებთან ბრძოლა ნაკლებად შეუძლია. ასევე, ქრონიკული დაავადებების განვითარების რისკიც იზრდება.

8. კანის პრობლემები

შაქრის ჭარბი რაოდენობით მიღება კანის გაუარესებასთანაა დაკავშირებული. მას შეუძლია, აკნე, ანთებითი პროცესები და სხვა დერმატოლოგიური პრობლემები გამოიწვიოს. გარდა ამისა, შაქარს შეუძლია კოლაგენზე, ცილაზე უარყოფითად იმოქმედოს. ამან კი შესაძლოა, ნაადრევი დაბერება გამოიწვიოს.

ყოველდღიურად ტკბილეულის მიღება არაერთ სერიოზულ პრობლემას იწვევს. ამიტომ, რეკომენდებულია, უფრო ჯანსაღ ალტერნატივას მივმართოთ. მივირთვათ ხილი, თხილეული, იოგურტი და ვიკვებოთ დაბალანსებულად.