გარემოს ეროვნული სააგენტოს მოკლევადიანი პროგნოზების განყოფილების უფროსი, დოდო გვაზავა გადაცემაში "დილა მშვიდობისა საქართველო" მიმდინარე კვირის ამინდის პროგნოზის შესახებ ვრცლად საუბრობს:
- გასულ კვირას არამდგრადი ამინდი გვქონდა, რაც ამიერკავკასიის ჩრდილოეთიდან მოქმედი ცივი და შავი ზღვის დასავლეთიდან შედარებით ნოტიო და თბილი ჰაერის მასებით იყო განპირობებული. ამიტომ, ყველგან წვიმდა. დასავლეთ საქართველოს მაღალმთიან რაიონებში თოვდა. აღმოსავლეთ საქართველოს მთიან და მაღალმთიან რაიონებშიც გათოვდა. ნალექი დასავლეთ საქართველოში 23 მარტსაც შენარჩუნდა. აღმოსავლეთ საქართველოში, შედარებით გამოიდარა.
რაც შეეხება მიმდინარე კვირას, ამინდს განსხვავებული სინოპტიკური სიტუაცია განაპირობებს. სამხრეთიდან თბილი ჰაერის მასების გავრცელებას ველოდებით. თუმცა, ამიერკავკასიის ჩრდილოეთიდან მოქმედი ცივი ჰაერი საქართველოს აღმოსავლეთ რაიონებზე გავლენას მოახდენს. ამიტომ, ცალკეულ დღეებში არ არის გამორიცხული, ნალექი იყოს, რაც ტემპერატურაზე ვერ იმოქმედებს. ამ კვირის განმავლობაში, ტემპერატურის მომატებას ველოდებით.
დასავლეთ საქართველოში მიმდინარე კვირაში შესაძლოა, ჰაერის მაქსიმალურმა ტემპერატურამ დაბლობ რაიონებში +20 გრადუსამდე მოიმატოს. მთიან რაიონებში +15, +17 გრადუსამდე, მაღალ მთაში +6, +11 გრადუსი სითბოა მოსალოდნელი. თბილი და უნალექო ამინდი 25 მარტსაც შენარჩუნდება. მაგრამ, 26-27 მარტს შავი ზღვის ჩრდილო-დასავლეთიდან სუსტი რაოდენობით ცივი ჰაერის მასების შემოსვლაა მოსალოდნელი. რაც უფრო მეტად ნალექზე იმოქმედებს. შესაძლებელია, უმეტეს რაიონში ხანმოკლე წვიმა იყოს, თუმცა მაქსიმალური ტემპერატურა, დაახლოებით, +20, +22 გრადუსის ფარგლებში იქნება. კვირის მეორე ნახევარში - 27-30 მარტს აღმოსავლეთის მიმართულების ქარის გაძლიერებას უნდა ველოდოთ. ჰაერის მაქსიმალური ტემპერატურა შესაძლებელია, +28, +30 გრადუსამდე მოიმატოს.
აღმოსავლეთ საქართველოში კვირის დასაწყისში ტემპერატურის მკვეთრი მომატება მოსალოდნელი არ არის. ცივი ჰაერის მასები ტემპერატურაზე მაინც მოქმედებს. ღრუბლიანობა მოიმატებს, მაგრამ უნალექო ამინდი იქნება. 26 მარტამდე ჰაერის მაქსიმალური ტემპერატურა შესაძლებელია, +20 გრადუსამდე იყოს. 26 მარტის დღის მეორე ნახევრიდან გაწვიმდება. წვიმა 27 მარტსაც შენარჩუნდება. ჰაერის ტემპერატურა, დაახლოებით, +20 გრადუსამდე შენარჩუნდება. კვირის მეორე ნახევრიდან უფრო ამიერკავკასიის ჩრდილო-აღმოსავლეთიდან მოქმედი ცივი ჰაერის მასები გააქტიურდება. ამიტომ, ტემპერატურის ისეთი მატება, როგორიც დასავლეთ საქართველოშია, მოსალოდნელი არ არის, მაგრამ რამდენიმე გრადუსით მაინც მოიმატებს.
დედაქალაქში დღეს უნალექო ამინდია მოსალოდნელი. სამხრეთიდან გავრცელებული სითბო ტემპერატურის მომატებას გამოიწვევს. შეიძლება, +15 გრადუსიც დაფიქსირდეს. 26 მარტის დღის მეორე ნახევარში შესაძლებელია, გაწვიმდეს და ნალექი 27 მარტსაც შენარჩუნდეს. 28-29 მარტიდან თბილისში უმეტესად უნალექო ამინდია მოსალოდნელი. შესაძლებელია, დილის საათებში ნისლი ჭარბობდეს, მაგრამ კვირის ბოლო რიცხვებში თბილი და უნალექო ამინდია მოსალოდნელი.