გარემოს ეროვნული სააგენტოს მოკლევადიანი პროგნოზების განყოფილების უფროსი, დოდო გვაზავა გადაცემაში "დილა მშვიდობისა საქართველო" მიმდინარე კვირის ამინდის პროგნოზის შესახებ საუბრობს:
- დღეიდან მთელ საქართველოში არამდგრადი ამინდი იწყება. მოსალოდნელია წვიმა და ტემპერატურის დაკლება.
დღეს, 31 მარტს, დასავლეთ საქართველოში ცივმა და ნოტიო ჰაერის მასებმა შემოსვლა დაიწყო. ამიტომ, უმეტეს რაიონში გაწვიმდება. ზოგან შესაძლებელია, ძლიერი წვიმაც აღინიშნოს. ჰაერის მაქსიმალური ტემპერატურა დაბლობში, მთასა და მაღალმთიან რაიონებში დაიკლებს. თუმცა, მაღალ მთაში თოვლში არ გადავა, რადგან ტემპერატურა დაკლებას ვერ მოასწრებს. 1-ელ აპრილს შედარებით გამოიდარებს, ზოგან აღმოსავლეთის მიმართულების ქარი გაძლიერდება. 1-2 აპრილს ტემპერატურა, დაახლოებით, +25 გრადუსამდე მოიმატებს. თუმცა, 2 აპრილის დღის ბოლოდან უფრო ცივი და ნოტიო ჰაერის მასების შემოსვლას ველოდებით, ამიტომ უმეტეს რაიონში გაწვიმდება. ზოგან შესაძლებელია, ძლიერი წვიმა დაფიქსირდეს. ტემპერატურაც მკვეთრად დაიკლებს. არ არის გამორიცხული, მაღალმთიან რაინებში თოვლჭყაპი თოვლშიც გადავიდეს. 6 აპრილს შესაძლებელია, დასავლეთ საქართველოს უმეტეს რაიონში კვლავ გაწვიმდეს.
დღეს აღმოსავლეთ საქართველოს უმეტეს რაიონში, დღის მეორე ნახევრიდან გაწვიმდება. არ არის გამორიცხული, რომ განსხვავებული ტემპერატურის ფონზე, კახეთის რაიონში, მთაგორიან რაიონებში, საელჭექო ღრუბლებამდეც მივიდეს. 1 აპრილს ნალექი თითქმის ყველგან შეწყდება. 3 აპრილის დღის პირველ ნახევარში აღმოსავლეთ საქართველოს უმეტეს რაიონში წვიმაა მოსალოდნელი. 3 აპრილს, დილის საათებიდან ქარის გაძლიერებას ველოდებით.
დედაქალაქში არამდგრადი ამინდი იქნება. დღეს, დღის მეორე ნახევრიდან გაწვიმდება. ჰაერის მაქსიმალური ტემპერატურა +24, +22 გრადუსამდე შენარჩუნდება. ჰაერის ტემპერატურის დაკლება დედაქალაქში 2 აპრილის დღის მეორე ნახევრიდანაა შესაძლებელი. 2 აპრილის დღის ბოლოს დედაქალაქში გაწვიმდება, იწვიმებს ღამით, 3 აპრილს დილის საათებში კი ჩრდილო-დასავლეთის მიმართულების ქარის გაძლიერებაა მოსალოდნელი. ეს ტემპერატურაზე იმოქმედებს, თუმცა ტემპერატურა მკვეთრად არ შეიცვლება. 4-5 აპრილს შესაძლებელია, ხანმოკლე ხასიათის წვიმა იყოს.