10-13 აპრილს ექსპო ჯორჯიაში თბილისის წიგნის ბაზრობა გაიმართება. დიდ ლიტერატურულ დღესასწაულზე მისულ სტუმრებს განსაკუთრებული სიახლეები, სიურპრიზები და საჩუქრები დახვდება.
წიგნის ბაზრობაზე სხვა დიდ თუ პატარა გამომცემლობებთან ერთად მონაწილეობას მიიღებს „პალიტრა L”, რომელიც მიმდინარე წელს თბილისის წიგნის ფესტივალზე წარმოდგენილი აღარ იქნება. შესაბამისად, ლიტერატურის მოყვარულებს შესაძლებლობა აქვთ აპრილის დასაწყისში, 4 დღის განმავლობაში ესტუმრონ წიგნის ბაზრობას და გამომცემლობის მიერ წარმოდგენილ სიახლეებს გაეცნონ, ისარგებლონ მათი შეთავაზებებით და მიიღონ საჩუქრები.
წიგნის ბაზრობისთვის „პალიტრა L“ განსაკუთრებულად მოემზადა. 4 დღის განმავლობაში ბაზრობის სტუმრებს შესაძლებლობა ექნებათ, ისარგებლონ 70%-მდე ფასდაკლებით სხვადასხვა სერიის არაერთ გამოცემაზე. ფასდაკლება შეეხება ყველა ასაკობრივი კატეგორიის მკითხველისთვის განკუთვნილ წიგნებს. ფასდაკლების გარდა მათ მრავალფეროვანი საჩუქრები და სიურპრიზები ელოდება.
სპეციალურად წიგნის ბაზრობისთვის ითარგმნა და გამოიცა მკითხველის საყვარელი ავტორების რამდენიმე წიგნი. მათ შორისაა შარლოტ ბრონტეს „შერლი“, რომელიც ქართულ ენაზე პირველად ითარგმნა. ასევე, აგათა კრისტის „საათები“ და „სიკვდილი აუზთან“. ბოლო პერიოდში ქართველი მკითხველის განსაკუთრებული მოწონება დაიმსახურა ფრედერიკ ბაკმანის რომანებმა. სწორედ ამიტომ „პალიტრა L“ მკითხველს ბაკმანის კიდევ ერთ მსოფლიო ბესტსელერ რომანს „და ყოველ დილით სულ უფრო გრძელდება შინისკენ გზა“ შესთავაზებს.
აღსანიშნავია, რომ წიგნის ბაზრობაზე მისული სტუმრები ფასდაკლებით გამომცემლობის ახალ წიგნებზეც ისარგებლებენ.
არ გამოგრჩეთ 10-13 აპრილი, ესტუმრეთ ექსპო ჯორჯიას და გახადეთ თქვენი საოჯახო ბიბლიოთეკა კიდევ უფრო დიდი და საინტერესო.
R