ანგიოლოგი, მედიცინის აკადემიური დოქტორი ზაზა ლაზარაშვილი გადაცემაში "შუადღე" თრომბოზის განვითარების რისკფაქტორებსა და საყურადღებო ნიშნებზე საუბრობს:
- თრომბოზი სისხლძარღვს შიგნით სისხლის შედედებაა. ზოგადად, შედედება ორგანიზმის დამცველობითი ფუნქციაა. ეს ფუნქცია რომ არ გვქონდეს, ნებისმიერი ჭრილობის შემდეგ სისხლისგან დავიცლებოდით.
თრომბოზის განვითარებაზე მოქმედებს: სისხლის შემადედებელი სისტემის გააქტიურება, სისხლის მიმოქცევის სიჩქარის დაქვეითება და სისხლძარღვის კედლის დაზიანება.
როგორც აღვნიშნე, თრომბოზის განვითარების უამრავი რისკფაქტორი არსებობს. განსაკუთრებით მნიშვნელოვანია, დეჰიდრატაცია ანუ სითხის დიდი რაოდენობით დაკარგვა. შესაძლოა, ეს სხვადასხვა დაავადების დროს გამოვლინდეს ან უბრალოდ, ზაფხულის პერიოდში, გადახურების დროს განვითარდეს. ასევე, რისკფაქტორია უმოძრაობა, მჯდომარე ცხოვრების წესი. სწორედ ამან დაავადების გაახალგაზრდავება გამოიწვია იმიტომ, რომ ახლა ყველა კომპიუტერთანაა. ახალგაზრდა, რეპროდუქციული ასაკში მყოფი ქალბატონებში ჰორმონალური სისტემის გავლენაც მნიშვნელოვანია. ასევე, ორსულობა, რომლის დროსაც თრომბოზის განვითარების რისკი მკვეთრად იმატებს. გარდა ამისა, რისკის ჯგუფში არიან პაციენტები, რომლებიც ხანგრძლივად არიან ლოგინში. ასევე, რისკფაქტორებია, ხანდაზმულობა, გენეტიკური ფაქტორები, ისეთი მედიკამენტების მიღება, რომლებიც სისხლს ასქელებენ, თამბაქოს მოწევა, სიმსუქნე.
დაავადება გაახალგაზრდავდა, რადგანაც ხანგრძლივი ჯდომის დროს, თრომბოზის განვითარების რისკი იზრდება.
ონკოლოგიის, თირკმლის უკმარისობის დროს ასევე თრომბოზის განვითარების რისკი იმატებს. ხანგრძლივად მწოლიარე პაციენტებშიც ასევე მაღალი რისკია.
სისხლის გამათხელებლების თვითნებურად მიღება რეკომენდებული არ არის. მათ მიღებას კონტროლი სჭირდება. ასევე, რაც უფრო ნაკლებია სითხე ორგანიზმში, სისხლის სიბლანტე უფრო იზრდება. რისკიც უფრო მაღალია. წყალი უნივერსალური გამათხელებელია.