მწერალი და გამომცემელი, მრავალშვილიანი მამა ზვიად კვარაცხელია, აუტიზმის ცნობადობის ამაღლების დღესთან დაკავშირებით საკუთარ ამბავს და გამოცდილებას უზიარებს საზოგადოებას:
"გადავწყვიტე, რიგით ინფორმაციასავით მიმეღო. არც დამთრგუნველი და მით უფრო, არც შოკისმომგვრელი არ ყოფილიყო ნიკოს აუტიზმის დიაგნოზი. ჩვენ ხომ ყოველდღე რაღაცისთვის ვიბრძვით და მაშინაც კი, როცა ვმარცხდებით, საკუთარ თავს ვსწავლობთ.
ოღონდ ეს არ იყო ბრძოლა. ჩვენ უნდა მიგვეღო შვილის ცვლილება ადრეულ ასაკში – 2 წლიდან – და ამ ცვლილებასთან კი არ გვებრძოლა, არამედ გვეცადა, მარტო არ დაგვეტოვებინა ნიკო თავისი ცხოვრების წესთან.
2018-ში, ზღვაზე, სამსაათიანი ცურვის შემდეგ ქანცგაწყვეტილს, მისი ნაპირზე ამოტყუება მთელი სანაპიროს გაოცებად და ხუთწუთიან მოშტერებად დამიჯდა. შარშანწინ ზაფხულში კი „ბუიოკამდე” ერთად მივცურეთ, და ეს მისი მზერის სიმშვიდემ გამაბედვინა.
მგონი ეს მზერა და მუდმივი ფიქრით ავსებული თვალებია, მასთან ყველაზე მეტად რომ მაახლოვებს. ჩემს თავს ვხედავ, მის კონტაქტსაც ვგრძნობ და ვსწავლობ, როგორ ვიყო ბედნიერი ძალიან ჩვეულებრივი ამბებით.
გენიოსი და საწყალი – ერთიც მომისმენია და მეორეც ჩემი შვილის მისამართით. გავბედავ და ვიტყვი, რომ არც ერთი არ დამიჯერებია, რადგან არც ერთი არ იყო ზუსტი. ამ ეპითეტების მიღმა ან ინფორმაციული ვაკუუმი იდგა ან ჩემი შვილის (და მის მსგავსთა) თანასწორად მიუღებლობა. ჩვენ არაფერში არ გვჭირდება ეპითეტები გულწრფელი მეგობრობისთვის, სიყვარულისთვის, გაგებისთვის.
ინკლუზია – ეს სიტყვა ჩემი თინეიჯერობისას გავიგე პირველად. უცებ დავიმახსოვრე, მაგრამ მაშინ ვერ წარმოვიდგენდი, რომ არც ისე დიდი ხნის შემდეგ მეც ამ სიტყვის უკან მდგარი აზრისა და ფასეულობებისთვის რიგითი მებრძოლი გავხდებოდი. ამ ხნის განმავლობაში ინკლუზიამ ბევრი სახეცვლილება გამოიარა, ზოგჯერ (ხშირად) დამამცირებელ ეპითეტადაც კი ვაქციეთ ნებით თუ უნებლიეთ, მაგრამ ის დროც მოვიდა, როცა ინკლუზიური განათლების მნიშვნელობაზე ყველა ერთნაირად უნდა შევთანხმდეთ:
იმისთვის, რომ ბაღიდან, სკოლის მერხიდან განათლება იყოს ყველასთვის და განსხვავებულის გარიყვის კი არა, მისი დანახვის, ფართო წრეში მიღების, მასთან ურთიერთობისა და თანამშრომლობის, უნიკალური შესაძლებლობების წარმოჩენის ასპარეზად იქცეს; იმისთვის, რომ ჩვენი გულგრილობით არ დაიკარგოს ის, რაც ქვეყანას უკეთესსაც გახდის და განვითარების ახალ შესაძლებლობებსაც აპოვნინებს.
2 აპრილი აუტიზმის ცნობადობის ამაღლების მსოფლიო დღეა".