101 წლის დაქალები, რომლებიც ერთ დღეს დაიბადნენ, მეზობლებიც არიან - მშობლები

ორი მეზობელი, ჯოზი ჩერჩი და ენ უოლეს-ჰადრილი, 101-ე დაბადების დღეს ერთად აღნიშნავენ და "ხანგრძლივი სიცოცხლის საიდუმლოზე" საუბრობენ.

ისინი ოქსფორდში 1980-იანი წლებიდან გვერდიგვერდ ცხოვრობენ და დაბადების დღეც საერთო აქვთ - ორივე 1924 წლის 1 აპრილს დაიბადა.

"მგონი, ცხოვრება საკმაოდ სწრაფად გავიდა. ენი ახალგაზრდობაში ძალიან დაკავებული იყო, ისევე როგორც მე, იყო ძალიან პროდუქტიული და შემოქმედებითი". ბევრს ხატავდა და გობელენებს ქსოვდა, ყოველთვის დაკავებული იყო, მეც ყოველთვის დაკავებული ვიყავი სხვა საქმით, სხვა ადგილას, რადგან ასეთი ცხოვრება გვაქვს. დროის გასვლაზე ბევრი არ გვიფიქრია. უბრალოდ გადიოდა. არ გვიფიქრია, როგორ დავბერდით". - ამბობს ჯოზი.

მას შემდეგ, რაც ქმრები დაკარგეს, ორივე ქალბატონმა თავი მოხალისეობას და შემოქმედებით საქმიანობას მიუძღვნა. ჯოზის მეუღლე, პიტერი, 1990-იან წლებში გარდაიცვალა და დაახლოებით ამ დროს დამეგობრდნენ ქალებიც.

ენი, რომელიც ჰემფშირში გაიზარდა, სახლში მისი მეუღლის გარდაცვალების შემდეგ გადმოვიდა. მეორე მსოფლიო ომის დროს ქალთა სამეფო საზღვაო სამსახურში რადიო-მექანიკოსად მსახურობდა.

მანამდე კი ქალებისთვის განკუთვნილი კოლეჯში სწავლობდა: "არ გვეკრძალებოდა კაცებტან შეხვედრა, მაგრამ ჩვენგან მოელოდნენ, რომ ღირსეული ცხოვრებით გვეცხოვრა", - ამბობს ენი, რომელმაც გასულ წელს სამეფო ფლოტისგან მედალიც მიიღო თავისი სამსახურისთვის.

მანჩესტერელმა ჯოზიმ კი სწავლება პრესტონის სამეფო საავადმყოფოში გაიარა: "ეს იყო სამი წლის მძიმე შრომა. იმ დროს სავალდებულო იყო სამსახურში ცხოვრება და არ შეგეძლო დაქორწინება, ძალიან მკაცრი წესები იყო. ახლა ხალხი ასეთ ცხოვრებას ვერ აიტანდა". - ამბობს ის.

მეორე მსოფლიო ომის დროს ექთნად მუშაობდა და საშინელი მოგონებები აქვს. დაქორწინების შემდეგ მისი მეუღლე ბიჭების პანსიონში მასწავლებელი იყო, ხოლო თავად - პანსიონის ექთანი, რაც ნიშნავდა, რომ რამდენიმე წელი 120 ბიჭზე ზრუნავდა. დღეს სამი შვილის დედაა.

ენი და ჯოზი ამბობენ, რომ არ ახსოვთ მომენტი, როდის აღმოაჩინეს, რომ დაბადების დღე ერთსა და იმავე დღეს ჰქონდათ, მაგრამ ყოველთვის სიამოვნებით აღნიშნავენ მას ერთად.

"ჩვენ საოცარ ქუჩაზე ცხოვრობთ. ეს ერთი დიდი ოჯახია. ყველამ ყველაფერი იცის. თუ პრობლემა გაქვს, შეგიძლია დაიძახო და ვიღაც აუცილებლად მოვა. საოცარი ქუჩაა. ვფიქრობ, რომ გაგვიმართლა", - ამბობს ჯოზი.

ხანგრძლივი სიცოცხლის საიდუმლოს შესახებ კი ამბობს: "უბრალოდ იცხოვრე. ბევრს ვერაფერს იზამ. უბრალოდ ერთი რამიდან მეორეზე გადადიხარ. აკეთებ იმას, რაც საჭიროა, შემდეგ სხვა რამეს აკეთებ და შემდეგ მის ადგილს სხვა რამ იკავებს. ჩვენ არ ვმართავთ ჩვენს ცხოვრებას. მგონი, მან თვითონ გვმართა ჩვენ".