დააკავეს ექიმი, რომელმაც სამშობიაროდან ქალის პლაცენტა მოიპარა - მშობლები

ჩინეთში ექიმი დააკავეს მას შემდეგ, რაც მან პაციენტის პლაცენტა სამშობიარო განყოფილებიდან გაყიდვის მიზნით მოიპარა. ამის შესახებ South China Morning Post იუწყება.

ინციდენტი რენჰუა ძიუდუს სამშობიარო სახლში, სამხრეთ-დასავლეთ გუიჯოუს პროვინციაში მოხდა. უცნობმა მამაკაცმა ვიდეოზე გადაიღო მეან-გინეკოლოგი, რომელიც სამშობიარო განყოფილებიდან გამოდის. ხელში კი ნახევრად გამჭვირვალე პლასტმასის პარკში უჭირავს ახალნამშობიარევი დედის პლაცენტით, შემდეგ მას შავ ნაგვის პარკში ათავსებს. ვიდეოს ავტორმა ჩანაწერი ინტერნეტში განათავსა და საავადმყოფოს ადმინისტრაციას მედიკოსის დასჯისკენ მოუწოდა. "მან პლაცენტა მოიპარა. ნუთუ არავინაა, ვისაც მისი დასჯა შეუძლია?" - დაწერა მამაკაცმა.

ვიდეო სწრაფად გავრცელდა და საზოგადოებრივი რეზონანსი გამოიწვია. ამის შემდეგ საავადმყოფოს ადმინისტრაციამ განაცხადა, რომ ექიმი სამსახურიდან გაათავისუფლა. ამასთან, უცნობია, ჰქონდა თუ არა ადგილი მსგავს შემთხვევებს წარსულში.

პლაცენტა არის ორგანო, რომელიც ქალებს ორსულობის დროს უვითარდებათ და უზრუნველყოფს ნაყოფის განვითარებასა და კვებას. ბავშვის დაბადების შემდეგ მას ჩვეულებრივ ანადგურებენ. თუმცა, გამომშრალი პლაცენტა, ჩინეთში ცნობილი როგორც "ზიჰეჩე", ოდესღაც ტრადიციული ჩინური მედიცინის მნიშვნელოვან ინგრედიენტად ითვლებოდა. მიიჩნევა, რომ ის დაღლილობისა და უნაყოფობის დროს ეხმარება და თითქოს სიცოცხლის გახანგრძლივებაც კი შეუძლია.

მიუხედავად ამისა, 2005 წლიდან ჩინეთში აკრძალულია ადამიანის პლაცენტით ვაჭრობა, ხოლო 2015 წელს "ზიჰეჩე" ამოღებულ იქნა ქვეყნის ოფიციალური სამკურნალო საშუალებებიდან. ჯანდაცვის სამინისტრომ განაცხადა, რომ მხოლოდ დედას შეუძლია თავისი პლაცენტის მოთხოვნა სამედიცინო პერსონალისგან. ამის მიუხედავად, პლაცენტის პოვნა შავ ბაზარზეა შესაძლებელი.