"მსახიობობა აღარ მინდა, სამწუხაროა, რომ ბევრი წელი დამეკარგა ამაში... მთლიანად ბავშვებში ვარ, დამხმარე არ გვყავს... " - ანი ბებიას მოულოდნელი აღიარება და ახალი ფოტოები - მშობლები

მსახიობი, ინფლუენსერი და ორი შვილის დედა ანი ბებია ბოლო დროს რამდენჯერმე გამოჩნდა, როგორც დიზაინერ მარიამ ტონკოს (კვარაცხელიას) სამკაულების წარმდგენი და მისმა ფოტოებმა დიდი აჟიოტაჟი გამოიწვია სოციალურ ქსელში. ბევრი აღნიშნავს ანის გამორჩეულ გარეგნობას და გარდასახვის უნარს.

ანი სოციალურ ქსელში საკმაოდ აქტიურია. ცოტა ხნის წინ გამომწერების შეკითხვებს უპასუხა და აღმოჩნდა, რომ პროფესია, რომლითაც გაიცნო მაყურებელმა, მისთვის უკვე უცხოა.

"აღარ მინდა მსახიობობა და ნამდვილ ანის არც არასდროს სდომებია. მხოლოდ რაღაცის დამტკიცება და მიღება იყო ეს სურვილი. სამწუხაროა, რომ ბევრი წელი დამეკარგა ამაში... ნამდვილ ანის რა უნდა, ჯერ არ ვიცი".

ანი და მისი მეუღლე - ასევე მსახიობი ილო ბეროშვილი, ბავშვებს ერთად ზრდიან და ილო აქტიურად არის ჩართული ამ პროცესში. თუმცა ბავშვებთან ძირითადად ანია და მთელ დროს პატარებს უთმობს. ორი ორსულობა-მშობიარობის შემდეგ ანი წერდა, რომ წონაში მკვეთრად მოიმატა. თუმცა მას მერე, რაც სემმაც დაასრულა ბუნებრივი კვება, უფრო ადვილად შეძლო საკუთარ სხეულზე ზრუნვა.

გამომწერებთან საუბრისას აღნიშნა, რომ ძირითადად ბავშვებთანაა და ძიძის გარეშე ზრდისჯერის და სემს, რაც არც ისე რთულია და სირთულეების გადალახვაში ფსიქოთერაპევტი ეხმარება. შეკითხვას, თუ როგორ გრძნობს ახლა თავს და რატომ არ არის ისეთი აქტიური, როგორიც ადრე იყო, ანი ასე პასუხობს:

"მთლიანად ბავშვებში ვარ, დამხმარე არ გვყავს. რთულია ორი ბავშვი, პლუს სახლის საქმეები, ქვეყანაში არსებული მდგომარეობა, ფიქრი წარსულზე, ბავშვობაზე, აწმყოზე, მომავალზე დამთრგუნველია... თუმცა თერაპია მეხმარება და შფოთს ვაგდებ... ადამიანი მაშინ არის ლამაზი, როდესაც ბედნიერია. მაქვს ხოლმე პერიოდები, როცა თავს ბედნიერად არ ვთვლი ან ვთვლი. ამ ეტაპზე ნამდვილად ბედნიერი ვარ, რაშიც ფსიქოთერაპევტი მეხმარება".