ისტორიის დასასრული: კანიე უესტი ამბობს, რომ ბიანკა ცენზორიმ მიატოვა - "ჩემი პატარა გაიქცა..." - მშობლები

კანიე უესტს ბიანკა ცენზორისთან ურთიერთობის შესახებ კომენტარი აქამდე არასდროს გაუკეთებია, თუმცა რეპერმა ამჯერად გადაწყვიტა, გულშემატკივრებისათვის სიმართლე ეთქვა.

დაახლოებით, 6 თვეა, ერთ-ერთი ყველაზე სკანდალური წყვილის ურთიერთობის დეტალები აქტიურად განიხილება და მედიაში იწერება, რომ ისინი დაშორებას აპირებენ. თუმცა, ბოლო 2 თვის განმავლობაში სხვადასხვა არგუმენტის გამო, ინფორმაცია კიდევ მეტად სარწმუნო გახდა. ზოგი თვლიდა, რომ კანიესა და ბიანკას პრობლემა არ ჰქონდათ და ის, რომ საჯაროდ ერთად აღარ ჩნდებოდნენ, დამთხვევა იყო. ინსაიდერები წერდნენ იმასაც, რომ ბიანკა ცენზორის კანიე უესტის მიტოვება უნდოდა, მაგრამ ეშინოდა, რადგანაც რეპერი მისი ცხოვრების ყველა სფეროს აკონტროლებდა. არც ერთი მათგანი საჯაროდ ამ თემაზე არ საუბრობდა.

ცოტა ხნის წინ კანიე უესტმა ახალი სიმღერა, სახელწოდებით "BIANCA" გამოაქვეყნა. სიმღერის ტექსტის მიხედვით, რეპერი აცხადებს, რომ ცოლმა მიატოვა...

ბიანკა ცენზორის უჩვეულო სამოსის გამო ყოველთვის აკრიტიკებდნენ. თუმცა, ბოლო დროს მუდმივი სტრესისა და დამცირების ქვეშ იყო. კანიე უესტმა არაერთი სკანდალური განცხადება გააკეთა არა მხოლოდ ბიანკას მისამართით, რომ ის ცოლზე დომინირებს და ა.შ., არამედ ნაცისტებს დაუჭირა ღიად მხარი და ასევე პი დიდის მხარდაჭერა საჯაროდ გამოუცხადა. პი დიდის ადამიანებით ვაჭრობის ბრალდებით ასამართლებენ. როგორც ამბობენ, ამ ყველაფერს ბიანკამ ვეღარ გაუძლო და ქმრის მიტოვება საბოლოოდ გადაწყვიტა.

"ჩემი პატარა გაიქცა, მაგრამ იქამდე ჩემი გაყვანა სცადა. მე არ წავალ საავადმყოფოში, რადგან ავად არ ვარ. მას პანიკური შეტევა აქვს და არ მოსწონს ის, რასაც ტვიტერში ვწერ. სანამ ბიანკა არ დაბრუნდება, მთელი ღამე არ დავიძინებ. ნამდვილად არ ვიცი, სად არის ის." - შემდეგ სიტყვებს ამბობს უესტი თავის ახალ ნამუშევარში.

რეპერი ბიანკას ოჯახის წევრებს ადანაშაულებს და ამბობს, რომ მათ შვილის გისოსებში მოქცევა სურთ.

გარდა ამისა, უესტი ახალ სიმღერაში თავის ქორწინებას პი დიდისა და კესი ვენტურას ურთიერთობას ადარებს. შეგახსენებთ, რომ ვენტურა მუსიკალური პროდიუსერის მთავარი მსხვერპლია. სწორედ მისი განცხადებით დაიწყო პროცესი, რის შედეგადაც რეპერი გისოსებს მიღმა აღმოჩნდა. კესიმ ყოფილი შეყვარებული სექსუალურ ძალადობაში დაადანაშაულა და თქვა, რომ პი დიდი არა მხოლოდ აუპატიურებდა, არამედ ნარკოტიკებს ძალით ასმევდა და სხვა მამაკაცებთან ურთიერთობასაც აიძულებდა. კანიე უესტი დარწმუნებულია, რომ ბიანკასაც შეუძლია თქვას რაღაც ისეთი, რაც ძალიან დიდ გამოხმაურებას გამოიწვევს.

რეპერი ამავე სიმღერით ცოლს დაბრუნებას სთხოვს და დარწმუნებულია, რომ ბიანკა ამას მის გასაღიზიანებლად აკეთებს.

როგორც ამბობენ, ბიანკასა და კანიეს ურთიერთობაში პრობლემები მას შემდეგ გაუარესდა, რაც ის "გრემის" დაჯილდოების წითელ ხალიჩაზე სრულიად შიშველი გამოჩნდა. მაშინ წერდნენ, რომ ბიანკას ამ ფორმით საზოგადოებაში გამოჩენა არ სურდა და ქმარმა აიძულა.

გრემის დაჯილდოებიდან სულ რამდენიმე დღეში გავრცელდა ინფორმაცია, რომ წყვილი განქორწინებას აპირებდა. მაშინ ინფორმაცია არ დადასტურდა. თუმცა, ამჯერად რეპერმა საკუთარი სიმღერით გულშემატკივრებს ცოლთან დაშორების შესახებ თავად ისაუბრა.