"თუ აღნიშნულ პუნქტებს არ გავითვალისწინებთ, პასკა ჩავარდება" - ყველაზე ხშირად დაშვებული შეცდომები პასკის ცხობის პროცესში - მშობლები

ლიკა კვარაცხელია გადაცემაში "შუადღე" შეფ დავით პოღოსიანთან ერთად პასკის ცხობის დროს ყველაზე ხშირად დაშვებულ შეცდომებზე საუბრობს:

- ზოგადად, პასკის გამოცხობის დროს ძალიან მნიშვნელოვანია, რამდენიმე ფაქტორი გავითვალისწინოთ. პირველ რიგში, საკუთარი გამოცდილებიდან გეუბნებით, თუ ცუდ ხასიათზე ვართ ან რაღაც გვაწუხებს, ასეთ შემთხვევაში, ჯობს არ შევეხოთ. ასევე, მაქსიმალურად მაღალი ხარისხის ინგრედიენტები უნდა გამოვიყენოთ.

ყველაზე ხშირად დაშვებული შეცდომები პასკის ცხობის დროს:

სხვადასხვა ტემპერატურის პროდუქტები - ყველა ინგრედიენტი, რომლებსაც პასკაში ვიყენებთ, წინასწარ 2-3 საათით ადრე მაცივრიდან გამოვიღოთ, რომ ოთახის ტემპერატურაზე თანაბრად გათბეს.

გაუცრელი ფქვილი - ფქვილის გაცრა ნებისმიერი ცომის მომზადების დროს ძალიან მნიშვნელოვანია, იმიტომ, რომ ჟანგბადით აჯერებს და ცომს ამოსვლაში ეხმარება.

ბევრი საფუარი - საფუარი აქტიური ბაქტერიაა, რომელიც გარკვეულ პირობებში მრავლდება. თუ გადაჭარბებული რაოდენობაა, ცომი ამოსვლის ნაცვლად, პირიქით, ჩავარდება. პასკის ცომი ნელ-ნელა უნდა გაფუვდეს. საფუარი ფქვილის 5% უნდა. ასევე, იმ შემთხვევაში, თუ 7 გრამ მშრალ საფუარს ვიყენებთ, ის 21 გრამ სველ საფუარს უდრის.

ცომის ხაშის გამოყენება კარგად ამოფუების გარეშე - ამდენი ინგრედიენტი რომ არ გაგვიფუჭდეს, ჯობს, ხაში მოვამზადოთ და ვნახოთ, როგორ მუშაობს ჩვენი საფუარი. ცომის ხაში საფუარის, შაქრის, თბილი რძის ან წყლის ნაერთია და პასკის ცხობის პროცესში ეს ერთ-ერთი ყველაზე მნიშვნელოვანი ეტაპია. მასა ოთახის ტემპერატურაზე, ორპირი ქარისგან მოშორებით უნდა დავტოვოთ. ზომაში გაიზრდება, ბუშტუკებიც გაჩნდება. დაელოდეთ, რომ კარგად დაისვენოს. შემდეგ ცომში დაამატეთ.

თუ აღნიშნულ პუნქტებს არ გავითვალისწინებთ, პასკა ჩავარდება.