იურისტი სალომე ბეჟაშვილი გადაცემაში "ახალი დღე" განმარტავს, რა შეუძლიათ გააკეთონ იმ ადამიანებმა, რომლებმაც მშენებარე ბინა იყიდეს, თუმცა კომპანია ვალდებულებებს არ ასრულებს და ზოგადად, რა უნდა გავითვალისწინოთ, თუ მშენებარე ბინის ყიდვას გადავწყვეტთ:
- აუცილებლად უნდა გავითვალისწინოთ კონკრეტული ვადა. ასევე, ის, თუ რა კონდიციაში უნდა ჩაბარდეს უძრავი ქონება და პასუხისმგებლობები, გარანტიები - პირგასამტეხლო იქნება ეს, ჯარიმა თუ სხვა. უფრო ზუსტად, თუ უძრავი ქონება, კონკრეტულ კონდიციაში, კონკრეტულ ვადაში არ ჩაგვაბარეს, უნდა ვიცოდეთ, რომ ამის გამოყენება შეგვიძლია.
თუ კომპანია ბინას დათქმულ ვადებში ვერ გვაბარებს, კანონმდებლობა სრულ თავისუფლებას გვაძლევს, რომ გარიგების პირობები ჩვენთვითონ შევადგინოთ. რამდენიმე ვადა უნდა განისაზღვროს: როდის დაასრულებს კომპანია სამშენებლო სამუშაოებს, როდის შეიყვანს ექსპლუატაციაში და კონკრეტულ კონდიციაში როდის ჩაგვაბარებს.
დაგვიანების შემთხვევაში, მომხმარებელმა რომ კომპენსაცია მიიღოს, პრაქტიკაში ამის ხშირი შემთხვევაა. მაგრამ, ეს ხელშეკრულებაში აუცილებლად გათვალისწინებული უნდა იყოს. კანონი ამგვარ კომპენსაციას არ ითვალისწინებს. ამიტომ, თითოეულმა მყიდველმა თავად უნდა მიაქციოს ხელშეკრულების დათქმებს ყურადღება. აუცილებლად უნდა განვსაზღვროთ ჯარიმა, პირგასამტეხლო. თუ სამშენებლო კომპანია აგვიანებს და თავის ვალდებულებებს არ ასრულებს, ეს უკვე გვაძლევს შესაძლებლობას, ან გამოვიყენოთ სახელშეკრულებო გარანტიები ან სასამართლოს მივმართოთ. დრო ამ შემთხვევაში, მყიდველის სასარგებლოდ იმოქმედებს, თუ პირგასამტეხლოა განსაზღვრული, რადგან რაც უფრო მეტი დრო დასჭირდება სამშენებლო კომპანიას ვალდებულებების შესასრულებლად, მით უფრო მეტ კომპენსაციას მიიღებს მყიდველი. ამიტომ, ყველას ვურჩევ, რომ ეს დეტალები გაითვალისწინონ.