წინასააღდგომო დღეებში თითქმის ყველა ოჯახში ტრიალებს პასკის სურნელი. თუმცა პროცესს ზოგჯერ პრობლემებიც ახლავს. რა ვქნათ, თუ პასკის ცომი არ ამოდის? ამასთან დაკავშირებით გამოცდილ დიასახლისებს ეფექტური მეთოდები აქვთ შემუშავებული, რომლებსაც სოციალურ ქსელში ერთმანეთს უზიარებენ. მათ შორის თამუნა ჯანაშვილიც:
"თუ ცომი არ ამოვიდა, ვიწყებთ მოქმედებას - ცომის შეთბობას.
1. ვრთავთ ღუმელს 40-50 გრადუსზე და ვდგამთ შიგნით ცომს.
2. ვდგამთ ცომს თბილ წყალში.
3. ვუწყობთ გვერდებში თბილი წყლით სავსე ბოთლებს ან “სათბურას”
4. ვურთავთ ელექტროლეიბს.
ამ მეთოდებმა თუ არ უშველა, მივმართავთ ბოლო და უტყუარ ზომებს: ვაკეთებთ ნახევარ ულუფა ხაშს, ე.წ. “აპარას”. (ამ დროს სასურველია საფუარი შევცვალოთ). გადავზილოთ ცომი თავიდან და ვზილოთ 10-20 წუთის განმავლობაში. დავამრგვალოთ ხელში ლამაზ გუნდებად საჭირო წონა (ფორმის 1/3)და გავანაწილოთ ფორმებში.
გადაზელვის შემდეგ აღარ ველოდებით მთლიანი მასის ამოსვლას, ვდეთ ფორმებში და აუცილებელია ფორმები შევდგათ ღუმელში 40-50 გრადუსზე. ამოსვლას დაელოდეთ, ნუ იჩქარებთ გამოცხობას. ვაცხობთ 160 გრადუსზე 40 წუთით ან ორიენტირდით თქვენი ღუმელის მიხედვით." - წერს ტამუნა ჯანაშვილი.