"ამოიღეს საბას ნათლობის ვიდეოებით დაწყებული, მარიამის დაბადების დღით დამთავრებული..." "ორსულად ვარ, 7 წლის შვილთან ერთად ვიყავი სახლში..." - პროკურატურამ ჩხრეკები ჩაატარა სახლებში, სადაც მცირეწლოვნები იმყოფებოდნენ - მშობლები

„დაახლოებით, 9-ის წუთებზე კარზე ბრახუნის შემდეგ რომ დავინტერესდი რა ხდებოდა, მითხრეს, მეზობელი ვარო, ქალი ვინც იყო. რომ გავიხედე, მივხვდი, რომ არ იყო მეზობელი, ჩანდა კიდევ სამი ადამიანი, მათ შორის სამხრე კამერასაც მოვკარი თვალი და ვკითხე, რა ხდება. მითხრეს, რომ პროკურატურიდან არიან, აქვთ ჩხრეკის უფლება, აქვთ უფლება, რომ მათ შორის ძალისმიერი მეთოდით შემოვიდნენ სახლში, ამიტომ ჯობია, რომ კარი გავუღო. ადვოკატთან დაკავშირება ვცადე, მაგრამ ვერ მოვახერხე და იმის გამო, რომ არასრულწლოვანთან, 7 წლის შვილთან ერთად ვიყავი სახლში, დამატებითი სტრესის თავიდან არიდების მიზნით, შემოვუშვი. მათი მთავარი მიზანი იყო, რომ ჩემი მობილური ამოეღოთ, როცა დავიწყე ვიდეოს გადაღება და შემდეგ ლაივში გავედი, ამან ძალიან გააღიზიანათ და მითხრეს, რომ არ მქონდა გადაღების უფლება და უნდა ჩამოერთვათ ტელეფონი.არ ვაძლევდი ნებით, მაგრამ წამართვეს. ამის შემდეგ, როცა მობილური წაიღეს, ამიხსნეს, რომ არიან მოსული საბოტაჟის მუხლით დაწყებულ გამოძიებაზე, ასევე, უცხოეთიდან დაფინანსების შესახებ რაღაც კანონი მიხსენეს. ვკითხე, იყო თუ არა ეს ვატო შაქარაშვილის წამოწყებული აფიორის ნაწილი და დამეთანხმნენ, რომ იგივე საქმე არის. ამასობაში, აღმოვაჩინე, რომ ნანუკასთანაც შესულან და მივხვდი, რომ უნდოდათ სპეცოპერაციის მასშტაბი წარმოეჩინათ. შემდეგ უკვე დაიწყეს სახლის ჩხრეკა, მითხრეს, რომ ეძებდნენ რაიმე ტიპის ელექტრონულ ნივთს და ასევე, რაიმე კანონსაწინააღმდეგო ნივთიერებას ან ნივთს. ჩხრეკა ძალიან ზედაპირულად ჩატარდა და დიდად აღარ მოჰყოლია განსაკუთრებული რაღაცები. იცოდნენ, რომ ტელეფონი იყო მთავარი, რაც უნდათ ამოეღოთ და უბრალოდ შეხვდათ ლეპტოპი, რომელზეც ამბობდნენ, რომ ეს შეგვიძლია არც წავიღოთ, მაგრამ იმსჯელეს და ბოლოს წაიღეს", - ამბობს მარიამ ბაჯელიძე.

საქართველოს პროკურატურამ კი შემდეგი განცხადება გამოაქვეყნა:

"საქართველოს პროკურატურაში საბოტაჟის, დამამძიმებელ გარემოებაში საბოტაჟის მცდელობის, უცხოეთის ორგანიზაციისათვის და უცხოეთის კონტროლს დაქვემდებარებული ორგანიზაციისათვის მტრულ საქმიანობაში დახმარების, საქართველოს კონსტიტუციური წყობილების და ეროვნული უშიშროების საფუძვლების წინააღმდეგ მიმართული საქმიანობისთვის ფინანსების მობილიზების ფაქტებზე მიმდინარე გამოძიების ფარგლებში, როგორც საზოგადოებისათვის ცნობილია, 2025 წლის 17 მარტს ყადაღა დაედო „ნანუკას ფონდი“-ს „ფროსფერითი“-ს, „ფონდი ერთმანეთისთვის 24/7“-ს, „სირცხვილია“-ს და „თბილისის ადამიანის უფლებათა სახლი“-ს საბანკო ანგარიშებს, რომლებიც მონაწილეობდნენ საზოგადოებრივი წესრიგის წინააღმდეგ ჩადენილი მძიმე დანაშაულისთვის ბრალდებული პირების და მათი ოჯახის წევრების ფინანსურ უზრუნველყოფაში, ისევე როგორც სამართალდამრღვევი პირებისათვის დაკისრებული ადმინისტრაციული ჯარიმების გადახდაში.