ზაზა თელია ჭარბი ოფლიანობის მიზეზებზე, რაც არ უნდა გამოგრჩეთ - "ისეთ დაავადებებს, როგორებიცაა ინფექცია, სიმსივნე, უპირატესად ღამის ოფლიანობა ახასიათებს" - მშობლები

დერმატო-ვენეროლოგი, მედიცინის დოქტორი, ზაზა თელია გადაცემაში "დილა მშვიდობისა საქართველო" საუბრობს, რა შეიძლება, იწვევდეს ჭარბოფლიანობას ანუ ჰიპერჰიდროზს:

- ჰიპერჰიდროზის მაპროვოცირებელი ფაქტორებია:

• ემოციურობა (აღელვება)
• ფიზიკური აქტივობა
• სიცხე
• მწარე საკვების მიღება
• მედიკამენტები

ეს პათოლოგიურ ნიშანს არ წარმოადგენს. ნებისმიერ ჩვენგანს ზემოთ ჩამოთვლილი ფაქტორების გათვალისწინებით შესაძლოა, ჭარბოფლიანობა დაეწყოს. ეს დროებითი გამოვლინებაა და ნორმალურია.

მეორადი ჰიპერჰიდროზის მიზეზები შეიძლება, შინაგანი დაავადებებიც იყოს. ესენია:

• მეტაბოლური დარღვევები
• ნევროლოგიური დარღვევები
• ინფექცია
• სიმსივნე

ძირითადად, ეს 4 დაავადებაა გამოყოფილი, რომლებსაც მეორადი ჰიპერჰიდროზი ანუ გენერალიზებული ოფლიანობა ახასიათებს.

ჭარბი ოფლიანობა შესაძლოა, დღე-ღამის განმავლობაში გამოიხატოს, თუმცა გააჩნია, რა ფაქტორზე ვსაუბრობთ. ისეთ დაავადებებს, როგორებიცაა ინფექცია, სიმსივნე, უპირატესად ღამის ოფლიანობა ახასიათებს.

შეგვიძლია, დავასახელოთ კონკრეტული დაავადებებიც, რაც ჭარბოფლიანობას იწვევს. ესენია:

• შაქრიანი დიაბეტი, ჰიპერთირეოიდიზმი ანუ ფარისებრი ჯირკვლის დისფუნქცია
• ორსულობა, მენოპაუზა
• კარცინოიდული სინდრომი - ესეც სიმსივნესთან ასოცირებული პრობლემაა
• ტუბერკულოზი, ბრუცელოზი, მალარია
• პარკინსონის დაავადება, ზურგის ტვინის ტრავმა
• ალკოჰოლი, კოკაინი, ჰეროინი, ციპროფლოქსაცინი, სერტალინი, ანტიდეპრესანტები, ესომეპრაზოლი, ე.წ. კუჭის დამცავი მედიკამენტი
• ლიმფომა, გულის უკმარისობა, ფილტვის კიბო