Tik Tok-ის გავლენა ბავშვის ყურადღებაზე: როგორ ჩავანაცვლოთ გაჯეტები სასარგებლო გასართობი აქტივობებით - მშობლები

TikTok-ის სწრაფი, მოკლე ვიდეოების ფორმატი პირდაპირ მოქმედებს ბავშვების ყურადღების ბუნებრივ მექანიზმებზე. ეს პოპულარული პლატფორმა მუდმივად “ასაჩუქრებს” ტვინს დოპამინით. ყოველი „სქროლი“ ახალ, ვიზუალურად მიმზიდველ შთაბეჭდილებას იძლევა, რაც იწვევს დაუყოვნებლივ კმაყოფილებას და ყურადღების ხშირ გადართვას. შედეგად, ბავშვებს უჭირთ კონცენტრაცია უფრო გრძელვადიან, ნაკლებად მასტიმულირებელ აქტივობებზე, როგორიცაა მაგალითად წიგნის კითხვა, მეცადინეობა, ან ყოველდღიური საქმიანობები.

გარდა ამისა, TikTok ამცირებს "დაბრკოლებასთან გამკლავების" უნარს. ბავშვი, რომელიც მიეჩვია მუდმივ ვიზუალურ სტიმულს და სწრაფ გართობას, არ არის მზად მოითმინოს არასახალისო ან რთული ამოცანები. ამან შეიძლება გამოიწვიოს მოტივაციის დაქვეითება და იმ უნარების დაკარგვა, რომლებიც აუცილებელია შემოქმედებითი აზროვნებისა და დამოუკიდებელი მუშაობის შესასწავლად.

Microsoft-ის კვლევის მონაცემებით, ინტერნეტ-მომხმარებლის საშუალო ყურადღების ხანგრძლივობა 12 წამიდან 8 წამამდე შემცირდა. რაც TikTok-ის მოკლე ვიდეოების ეფექტთან პირდაპირაა დაკავშირებული.

3-დან 5 წლამდე ასაკში, როცა ბავშვი ხშირად უყურებს ეკრანს (ტელეფონს, ტაბლეტს ან ტელევიზორს), მისი ტვინის გარკვეული ნაწილი, რომელიც გონებრივ განვითარებაზე და სწავლის უნარებზეა პასუხისმგებელი, ვითარდება სუსტად. ეს ნიშნავს, რომ ბავშვს შეიძლება არ გაუუმჯობესდეს მეტყველება ისე სწრაფად, როგორც სხვა თანატოლებს, და დაუქვეითდეს ყურადღების გამახვილების უნარი.

ასევე, კვლევებმა აჩვენა, რომ ვინც ძალიან ბევრ დროს ატარებს გაჯეტებთან:

• უფრო უჭირს თვითკონტროლი და ემოციების მართვა;
• უჭირს გადაწყვეტილების მიღება;
• უარესდება მეხსიერება, ანუ მას შეუძლია ნაკლები რამ დაიმახსოვროს.

ამიტომ, ეკრანთან დრო უნდა იყოს შეზღუდული და დაბალანსებული, განსაკუთრებით სკოლამდელი ასაკის ბავშვებისთვის.

როგორ ჩავანაცვლოთ გაჯეტები სასარგებლო გასართობი აქტივობებით

დღევანდელ რეალობაში გაჯეტები ბევრი ბავშვის ყოველდღიური ნაწილია. თუმცა, როცა ეკრანთან გატარებული დრო გადააჭარბებს დასაშვებ ზღვარს, ეს გავლენას ახდენს ბავშვების ემოციურ მდგომარეობაზე, სწავლაზე და თვითკონტროლზე. ამიტომ, აუცილებელია მშობელმა არა უბრალოდ აუკრძალოს, არამედ გონივრულად შეზღუდოს ეკრანთან დრო, მაგალითად, დღის კონკრეტულ საათებში ან კონკრეტული ხანგრძლივობით.

მნიშვნელოვანია, რომ შეზღუდვას თან ახლდეს საინტერესო და შემოქმედებითი ალტერნატივები, რომლებიც ბავშვს ბუნებრივად გადაატანინებს ყურადღებას და ჩართავს აქტივობაში, რომელიც მას აზროვნებას, მოტორიკას და თვითგამოხატვას გაუძლიერებს.

აი, 4 შესანიშნავი საშუალება, რომლითაც შეგიძლიათ გაანაცვლოთ გაჯეტებზე დამოკიდებულება:

1. ხელსაქმე და კონსტრუქცია

ბავშვებს მოსწონთ რაღაცის აწყობა, ხელით შეხება და ფორმის მიცემა. შეგიძლიათ შესთავაზოთ 3D მოდელების აწყობა. ეს შეიძლება იყოს მინიატურული სახლები, ცხოველები ან მანქანები. ასეთი საქმიანობა ავითარებს სივრცით აზროვნებას, მოთმინებას და ფიზიკურ კოორდინაციას.

2. სამკაულების დამზადება

ფერადი მძივებით, ძაფებითა და პატარა ელემენტებით სამკაულების შექმნა ძალიან სახალისოა როგორც გოგოებისთვის, ისე ბიჭებისთვის. ბავშვი ავითარებს ფანტაზიას, მოტორიკას და ფორმების გარჩევის უნარს, თან მზადდება რაღაც, რაც მას ნამდვილად ეკუთვნის და შეიძლება სიამაყით ატაროს კიდეც.

3. ხატვა და გრავირება

ხატვა ერთ-ერთი ყველაზე კარგი გზაა ემოციების გამოსახატად. დახატული ამბები ეხმარება ბავშვს აზრის ფორმულირებასა და თვითგამოხატვაში.განსაკუთრებით სახალისოა გრავირების დაფები, სპეციალური ფურცლები, სადაც შავი ზედაპირის ქვეშ ფერადი ფონი იმალება და ბავშვს “კაწვრის” გზით შეუძლია ფერადი ნახატის შექმნა. ეს აბსოლუტურად სხვა სტიმულია და დიდ ინტერესს იწვევს.

4. თემატური აქტივობების კუთხე

შექმენით სახლში პატარა "სტუდია" ან "ლაბორატორია", მაგიდის კუთხე, სადაც ბავშვი ყოველდღე სხვადასხვა თემით დაკავდება: დღეს აწყობს მოდელს, ხვალ ხატავს, ზეგ ამზადებს სამკაულს. ასეთი მრავალფეროვნება ინარჩუნებს ინტერესს და წაახალისებს ბავშვის დამოუკიდებლობას.

R