90-იანების რუსი ვარსკვლავი, 61 წლის ალიონა აპინა საქართველოში ისვენებს. მის ფოტოებს დიდი გამოხმაურება მოჰყვა - "დიდი ხნის ოცნება ავისრულე..." - მშობლები

ამ მომღერალს 90-იანი წლებიდან ბევრი იცნობს. ის რუსული ესტრადის ვარსკვლავია. თურმე საქართველოში მოგზაურობაზე ოცნებობდა და აიხდინა ოცნება.

"რამდენიმე დღეში საქართველოში მივფრინავ. ეს ჩემი ოცნება იყო. გთხოვთ, დაამატოთ ყველანაირი ქართული საოცრება, რომ არაფერი გამომრჩეს. რესტორნები, მაღაზიები, ადგილები. ვეცდები, უსაზღვროდ კარგად შევიგრძნო. წინასწარ დიდი მადლობა", - დაწერა რამდენიმე დღის წინ, მერე კი ფოტოები გამოაქვეყნა საქართველოდან წარწერით: "ყველაფერი გემრიელი და ზღაპრულია!"

ფოტოებს დიდი გამოხმაურება მოჰყვა, განსაკუთრებით, ქართველების მხრიდან. ზოგი მოსანახულებელ ადგილებს ურჩევდა, ზოგი კი ლანძღავდა, როგორც ოკუპანტი ქვეყნის წარმომადგენელს და აქედან წასვლას ურჩევდა. თავად არ გამოხმაურებია არავის.

• რა ვიცით აპინაზე?

1990-იან წლებში გახდა პოპულარული და პერიოდულად ახლაც აქვეყნებს ახალ სიმღერებს. თავს უვლის და 61 წლის ასაკში მშვენივრად გამოიყურება. ერთი შვილი ჰყავს.

ბოლო წლებში საკმაოდ ხშირად გაიჟღერა მისმა სახელმა პოლიტიკურ კონტექსტში.1996 წელს მონაწილეობა მიიღო პრეზიდენტ ბორის ელცინის საარჩევნო კამპანიაში „ხმა მიეცი ან წააგე“. 2006 წელს მომღერალმა ასეთი ნაბიჯის მოტივად არა მხოლოდ ფინანსური ინტერესი დაასახელა, არამედ სურვილიც, ხელი შეეშალა კომუნისტებისთვის ხელისუფლებაში ხელახლა მოსვლისთვის, რადგან მას უკიდურესად ნეგატიური დამოკიდებულება აქვს საბჭოთა პერიოდის მიმართ.

2000 წელს, კურსკის წყალქვეშა ნავის ეკიპაჟის დაღუპვის შემდეგ, აპინამ განაცხადა, რომ რუსეთის ახალმა პრეზიდენტმა ვლადიმერ პუტინმა ტესტი ვერ ჩააბარა, რადგან „მისთვის გაცილებით მნიშვნელოვანი იყო ნიკოლაი ბასკოვის კონცერტზე დასწრება, ვიდრე წყალქვეშა ნავების გადარჩენა“. მომდევნო წელს პრესის ყურადღება მიიპყრო „ერთიანობის“ ლიდერის, სერგეი შოიგუს განცხადებამ, რომ არტისტი ამ პარტიის წევრი გახდებოდა. თუმცა, მომღერლის მეუღლემ და პროდიუსერმა, ალექსანდრე ირატოვმა, მალევე უარყო შოიგუს განცხადება. 2006 წელს თავად აპინამ დაადასტურა, რომ ის არც იყო, არც არის და არც აპირებს მომავალში რომელიმე პარტიაში გაწევრიანებას და დიდი ხანია არჩევნებში არ მიუღია მონაწილეობა.

2015 წელს მან კვლავ გაუსვა ხაზი თავის აპოლიტიკურობას და განაცხადა, რომ რადიო „კომსომოლსკაია პრავდაში“ მისი ორიგინალური მუსიკალური გადაცემის დახურვის მიზეზი სწორედ ეს იყო - გადაცემისთვის პოლიტიკური ელფერის მიცემაზე უარის თქმა.

2006 წელს მომღერალმა ანგელა მერკელი და კონდოლიზა რაისი თავის პოლიტიკურ კერპებად დაასახელა და დადებითად შეაფასა ქალების მზარდი გავლენა პოლიტიკაში. ამავდროულად, კვლავ განაცხადა, რომ შორს არის პოლიტიკისგან და მისი სამოქალაქო აქტივობა მუსიკისა და ხელოვნების სწავლებაა სკოლაში. იმავე ინტერვიუში მომღერალმა განაცხადა, რომ ყირიმთან დაკავშირებით საკუთარი აზრის გამოთქმა არ შეუძლია: „ამ მოვლენებთან დაკავშირებით რთული დამოკიდებულება მაქვს. ერთი მხრივ, რა თქმა უნდა, ის ჩვენია. მაგრამ მეორე მხრივ, რა თქმა უნდა, ის ჩვენი არ არის, რადგან არსებობს კანონი, ჩვენ ის მივიღეთ...“, - თქვა მომღერალმა. თავად აპინა უკრაინაში სანქცირებულ მომღერლებს შორისაა. მისი თქმით, ეს იმით არის განპირობებული, რომ არხანგელსკში გამართულ კონცერტზე გამოვიდა, რომელსაც ფონად ეწერა „ყირიმი ჩვენია!“