როგორ იქცა იდეალური დიასახლისი მკვლელად, რომელმაც ქმრის ოჯახი მოწამლა? - ხვალ მას სამუდამო პატიმრობას მიუსჯიან - მშობლები

ავსტრალიელი ერინ პატერსონი სამი ადამიანის მკვლელობაში დამნაშავედ ცნეს, მაგრამ ისინი, ვინც ამ საქმის გამოძიებას ორ წელზე მეტია ადევნებენ თვალყურს, ეჭვობენ, ნამდვილად გააკეთა თუ არა ბრალდებულმა ეს განზრახ?

ამასობაში კომპანია ABC უკვე ემზადება სერიალის გადასაღებად.

დიდი ქონების მემკვიდრე, მაგრამ ინტროვერტი და ცხოვრებაში ნაკლებად წარმატებული, ცხოველების მოყვარული და შესანიშნავი დიასახლისი, დედა, მაგრამ ამავდროულად ადამიანი, რომელსაც შეუძლია ცივსისხლიანად რამდენიმე ადამიანი გაგზავნა იმ ქვეყნად. განა ეს აგათა კრისტის დეტექტიური ისტორიის თანამედროვე გმირი არ არის?

ავსტრალიურმა ტელეკომპანიამ ABC უკვე გამოაცხადა, რომ დაიწყო სერიალ „ტოქსიკურის“ გადაღება, რომელიც ამ საქმის ფაქტებს ეფუძნება. სიდნეის ტელევიზიამ ერინს მასალების სერია მიუძღვნა, ხოლო Stan პლატფორმამ დოკუმენტური ფილმი დააანონსა. მთავარი კითხვა, რომელიც მთელ მსოფლიოში კრიმინალური ამბების მოყვარულებს აწუხებთ: შეუძლია თუ არა ჩვეულებრივ დიასახლისს ცივსისხლიანად დაგეგმოს და მოკლას რამდენიმე საყვარელი ადამიანი შაბათის ვახშამზე? თუ ის ვიღაცის ბოროტი გეგმის მსხვერპლია? მოდით, გავარკვიოთ.

დილით საავადმყოფოდან დარეკეს - ყველა სტუმარი სიკვდილის პირას იყო

ავსტრალიის ქალაქ ლეონგატაში 5 ათასი ადამიანი ცხოვრობს - რვა ქუჩა, ექვსი გზაჯვარედინი, ორი ეკლესია, ყველა ერთმანეთს იცნობს... ამიტომ ქმართან განქორწინების შემდეგაც კი, ერინ პატერსონმა კარგი ურთიერთობა შეინარჩუნა ნათესავებთან. 2023 წლის 29 ივლისს მან ყოფილი ნათესავები შაბათის ვახშამზე დაპატიჟა. სტუმრებს შორის იყვნენ ყოფილი დედამთილ-მამამთილი დონი და გეილი, ასევე ქმრის დეიდა ჰეზერი ქმართან, იან უილკინსონთან ერთად. ყოფილმა ქმარმა საღამოს მოსვლაზე უარი თქვა.

ლანჩს სამწუხარო მიზეზი ჰქონდა - მასპინძელმა გადაწყვიტა ოჯახისთვის ეცნობებინა, რომ მას კიბო დაუდგინდა. სტუმრებმა თქვეს, რომ ყველაფერში მხარს დაუჭერდნენ ერინს, რის შემდეგაც მან სწრაფად შეცვალა თემა და გამოაცხადა, რომ საღამოს მთავარი კერძის - ველინგტონის საქონლის ხორცის გასინჯვის დრო იყო. ყველა შეკრებილმა სწრაფად მიირთვა ფენოვან ცომში გახვეული სოკოთი შეზავებული საქონლის ფილე, ხოლო კულინარიული ჰიტის ავტორმა ჩაი დალია, ფორთოხლის ფუნთუშასთან ერთად. შემდეგ კი სტუმრებს უთხრა, რომ შეეძლოთ დარჩენა და ვერანდაზე დასხდომა, თვითონ კი დასაძინებლად წავიდოდა.

დილით საავადმყოფოდან დაურეკეს - მისი ოთხივე სტუმარი მძიმე მოწამვლით რეანიმაციაში იმყოფებოდა, მასაც სასწრაფოდ სჭირდებოდა საავადმყოფოში მისვლა და ანალიზების ჩაბარება.

დონი და გეილი 70 წლის იყვნენ, ჰეზერი და იანი - 66 და 68 წლის, ამ ასაკში ღვიძლი ყველაზე ხშირად ვერ უმკლავდება მძიმე მოწამვლას და ექიმები შიშობდნენ, რომ ხანდაზმული პაციენტების გადარჩენას ვერ შეძლებდნენ. საბოლოოდ ასეც მოხდა. მიუხედავად იმისა, რომ ყველას სერიოზული თერაპია ჩაუტარდა, ოთხი ადამიანიდან, ვინც წინა ღამეს საქონლის ხორცი გასინჯა, სამი გარდაიცვალა. მხოლოდ იან უილკინსონი, ქმრის დეიდის ქმარი, ბაპტისტი მღვდელი გადარჩა.

სწორედ მისმა ექიმმა ივარაუდა, რომ მოწამვლის მიზეზი შეიძლება სოკოთი მოწამვლა ყოფილიყო და მკურნალობის პროტოკოლი შეცვალა. ერინ პატერსონიც მივიდა საავადმყოფოში კუჭის შეტევებისა და დიარეის ჩივილით. როდესაც ექიმმა ჰკითხა, საიდან იშოვა სოკო, მან უპასუხა, რომ სუპერმარკეტში იყიდა, რამაც თერაპევტს ეჭვი გაუჩინა. თუ დიასახლისმა თავად შეაგროვა სოკოები (და როგორც მოგვიანებით გაირკვა, ისინი სიკვდილის მიზეზი იყო), მაშინ ტრაგედია შეიძლებოდა მისი უცოდინრობისთვის მიეწერათ, მაგრამ მაღაზიებში შეტანილი სოკოები შემოწმების სერიას გადიოდა.

საიმონმა, ყოფილმა ქმარმა, რომელიც საავადმყოფოში მალევე მივიდა, ტრაგედიის სავარაუდო დამნაშავეს ნათესავების მდგომარეობის შესახებ უამბო, მაგრამ ქალს ერთი კითხვაც არ დაუსვამს. მას არ აინტერესებდა.

პატერსონი სახლში დაბრუნდა ნივთების ჩასალაგებლად და კვლავ საავადმყოფოში წავიდა გამოკვლევისთვის. ამავდროულად, ჯიუტად უარი თქვა ბავშვების გამოკვლევაზე, რომლებმაც, მისი მტკიცებით, იგივე ხორცი გასინჯეს. მეორე დღეს ერინი გაწერეს. მის სისხლში შხამი არ აღმოჩნდა.

ტოქსიკოლოგიურმა გამოკვლევამ აჩვენა, რომ სამი ადამიანის გარდაცვალების მიზეზი იყო ფხვნილად დაფქული Amanita phalloides სოკო (სასიკვდილის ქუდი), რომელიც საქონლის ხორცის სოუსს ჰქონდა დამატებული. გამოძიებისას ერინმა განაცხადა, რომ მანაც შეჭამა მთავარი კერძი, მაგრამ რადგან მრავალი წლის განმავლობაში ბულემიით იტანჯებოდა, ერთი საათის შემდეგ ღებინება დაეწყო, რამაც სიკვდილისგან იხსნა. ეს იყო პირველი ტყუილი სხვა ტყუილებიდან, რომლებიც მოგვიანებით სასამართლოში გამოვლინდა. მაგრამ სანამ გაიგებთ, რატომ ჩაიდინა ჩუმმა დიასახლისმა ასეთი სასტიკი დანაშაული, უნდა გაიგოთ, ვინ არის ის...

ვინ არის ერინ პატერსონი?

ერინი სკატერების ოჯახში ერთადერთი და გვიანი შვილი იყო. მისმა დედამ, ჰეზერ სკატერმა, ცნობილმა და პატივცემულმა ლიტერატურულმა კრიტიკოსმა, მშობლებისგან 2 მილიონი დოლარი მიიღო მემკვიდრეობით, რომლითაც ოჯახი მრავალი წლის განმავლობაში ბედნიერად ცხოვრობდა. დაგეგმილი იყო, რომ მისი ქალიშვილი გაიზრდებოდა და ბრწყინვალე კარიერას აიწყობდა, მაგრამ ახალგაზრდა ასაკში ერინს ფსიქიკური დაავადება დაუდგინდა. მიუხედავად ამისა, კავშირების გამოყენებით, მშობლებმა ქალიშვილს მელბურნის უნივერსიტეტში საბუნებისმეტყველო მეცნიერებათა ფაკულტეტზე ჩააბარებინეს, საიდანაც ბუღალტერიის ფაკულტეტზე გადავიდა. მას არ შეეძლო თავისი სპეციალობით მუშაობა, სამსახურშიც, სადაც ხვდებოდა, არაკომუნიკაბელური ხასიათის გამო, კოლეგებთან კონტაქტს ვერ ამყარებდა. 2004 წელს ავსტრალიაში ცხოველების მიმართ სისასტიკის პრევენციის სამეფო საზოგადოებაში დაიწყო მუშაობა, სადაც გაიცნო საიმონ პატერსონი.

რა აერთიანებდა ასეთ განსხვავებულ ადამიანებს? კაცი მხიარულია, ხუმარა, წვეულების სული და გული, მორწმუნე ბაპტისტი, ქალი კი - არაკომუნიკაბელური, ჩუმი ათეისტი. ნაცნობები ეჭვობდნენ, რომ საიმონი პატარძლის მემკვიდრეობას დახარბდა და, როგორც მოგვიანებით გაირკვა, ამ ეჭვს საფუძვლიანი მიზეზი ჰქონდა. პატერსონმა ისიც იცოდა, რომ ერინს აუტიზმის პროგრესირებადი ფორმა ჰქონდა, მაგრამ ამან ხელი არ შეუშალა დაქორწინებაში.

წყვილი დასავლეთ ავსტრალიაში გადავიდა საცხოვრებლად, სადაც სკატერებს სამი სახლი ჰქონდათ - პერტში, იორკსა და პემბერტონში. აქ ერინმა პირველი ვაჟი გააჩინა, გახსნა მეორადი წიგნების მაღაზია და ბებიის მემკვიდრეობაზე უფლებები მოიპოვა: 2 მილიონი ავსტრალიური დოლარი მიიღო. თავიდან ოჯახი ბედნიერად ცხოვრობდა, ქალიშვილის დაბადებამდე წყვილი საიმონის ნათესავებთან უფრო ახლოს ყოფნისთვის კუნვარაშიც კი გადავიდა. მთელი ოჯახი ბაპტისტურ ეკლესიაში დადიოდა, სადაც მოძღვარი იან უილკინსონი გახლდათ, გეილის დის, ჰეზერის ქმარი. ის ერთადერთია, ვინც იმ საბედისწერო ვახშმის შემდეგ გადარჩა.

საგადასახადოს განუცხადა, რომ მარტოხელაა...

2019 წელს პატერსონს დედა გარდაეცვალა და მას თითქმის მილიონი დოლარის ღირებულების სახლი დაუტოვა. გაყიდული არ ჰქონდა ქონება, რომ ქმრის მშობლებმა და დეიდამ ფული სთხოვეს, სახლის ყიდვა გვინდაო. ერინმა მათ უზარმაზარი თანხა ასესხა, რომლის დაბრუნებასაც ისინი არ ჩქარობდნენ.

ამასობაში, ერინის ოჯახში ურთიერთობა სულ უფრო და უფრო იძაბებოდა. პატარა ქალაქში გავრცელდა ჭორები, რომ მორწმუნე საიმონს საყვარელი ჰყავდა. 2022 წელს კიდევ ერთი მოვლენა მოხდა, რამაც ერინის რისხვა გამოიწვია. მისმა ქმარმა საგადასახადო დეკლარაციაში მიუთითა, რომ მარტოხელა იყო. ამან ავტომატურად წაართვა ცოლს მრავალი შეღავათი და გაზარდა გადასახადის განაკვეთი. ქმარი ერინს ეფიცებოდა, რომ მისმა ბუღალტერმა შეცდომა დაუშვა, მაგრამ ცოლის რისხვა ვერ ჩაახშო.

მან ქმრის შესახებ მის მშობლებთან დაიჩივლა, მაგრამ მათ გადაწყვიტეს, რომ სკანდალში არ ჩარეულიყვნენ, რამაც დიასახლისში რისხვის ახალი შეტევები გამოიწვია - სწორედ ის დაეხმარა დედამთილ-მამამთილს უძრავი ქონების შეძენაში და მაინც ვერ მოიპოვა მათი თანაგრძნობა.

„პატივს ვცემ თქვენს პოზიციას, მაგრამ აქ გავაგრძელებ წერას იმ საკითხებზე, რომლებსაც მნიშვნელოვნად მივიჩნევ და რომლებზეც, ჩემი აზრით, საიმონმა უნდა აგოს პასუხი. განსაკუთრებით იმ პრობლემებისთვის, რომლებიც მან შემიქმნა. იმედი მაქვს, თქვენ, როგორც მისი მშობლები, შეშფოთებული იქნებით, რომ ის გადაწყვეტილებებს მტრულად და ბრაზით იღებს და არა შვილების ინტერესებიდან გამომდინარე“, - წერდა ერინი თავის მამამთილს.

...სწორედ ამ შეტყობინების შემდეგ შეუერთდა ერინ პატერსონი ნამდვილი დანაშაულის მოყვარულთა ჩათს, სადაც განიხილებოდა რეალურად მომხდარი დეტექტიური ისტორიები. სწორედ იქ დასვა მან ერთხელ შეკითხვა შხამიანი სოკოების და მათი ორგანიზმზე სწრაფი ზემოქმედების შესახებ. მალევე იყიდა დეჰიდრატორი, რომელშიც სხვადასხვა სოკო გააშრო...

„დაფქული სოკოს ფხვნილს ყველაფერში ვურევ. გუშინ შოკოლადის ბრაუნის დავამატე - ბავშვები ვერც კი მიხვდნენ“, - უთხრა დიასახლისმა ერთხელ ჩათის სხვა მონაწილეებს.

როდესაც ერინი დააკავეს, მან უარყოფა დაიწყო, თითქოს სახლში სოკოს გასაშრობი მოწყობილობა არ ჰქონდა, თუმცა ვიდეოსამეთვალყურეო კამერებმა დააფიქრირეს, როგორ აგდებდა ნაგავსაყრელზე დეჰიდრატორს. შემდეგ ჩვენებებში დაიბნა, ვერ თქვა, სად იშოვა შხამიანი სოკოები, მერე ისიც აღმოჩნდა, რომ ბრალდებულს კიბო არ ჰქონდა. სინამდვილეში, კუჭის ოპერაციის გაკეთება სურდა ჭარბი წონის პრობლემების გადასაჭრელად.

მოგვიანებით სასამართლო პროცესზე ქალმა განმარტა, რომ განზრახ მოიგონა სასიკვდილო დაავადების შესახებ ამბავი, რათა ნათესავების თანაგრძნობა გამოეწვია და მათ მის შვილებზე ეზრუნათ, სანამ ის საავადმყოფოში იქნებოდა.

სამჯერ მოწამლა ქმარი

მალე მისი ქმრის, საიმონის ჯერი დადგა, რომელმაც სასამართლოში ჩვენება მისცა. მან თქვა, რომ მისმა ცოლმა რამდენჯერმე სცადა მისი მოწამვლა. ბოლო შემთხვევისას ინტოქსიკაცია იმდენად მძიმე იყო, კომაში ჩავარდა. სამი ოპერაცია ჩაუტარდა, გული გაუჩერდა და მხოლოდ სასწაულით გადარჩა.

მოწამვლის პირველი მცდელობა 2021 წელს მოხდა, როდესაც ერინმა ქმარს მაკარონი აჭამა. მეორე დილით საიმონს ღებინება დაეწყო, მერე გარეთ გახდა ცუდად და საბოლოოდ საავადმყოფოში გადაიყვანეს.

სამი თვის შემდეგ ინდური კარი გასინჯა. „თავიდან სიცხე მქონდა, თავიც კი მიხურდა, რამაც ღებინება გამოიწვია, შემდეგ კი დიარეა დამეწყო“, - თქვა მან. საიმონი საავადმყოფოდან გაწერეს, მაგრამ სახლში დაბრუნების შემდეგ გონება დაკარგა და სასწრაფოდ კლინიკაში დააბრუნეს, სადაც ქირურგებმა სამი ოპერაცია ჩაუტარეს და სწორი ნაწლავის დიდი ნაწილი ამოაჭრეს.

ის დარწმუნებული იყო, რომ ერინმა საკვებში რაღაც ჩაუყარა, რის გამოც უარი თქვა საბედისწერო ვახშამზე დასწრებაზე.

როდესაც საიმონმა ეჭვი შეიტანა, რომ ცოლი მის მოკვლას ცდილობდა, ცხრილი შექმნა, რომელშიც ყველა საეჭვო სადილი ჩაიწერა. საბოლოოდ მან ექიმს, კრის ფორდს, გაუმხილა, რომ შიშობდა, ერინი საკვებში „ანტიფრიზს“ ან მსგავს ტოქსინს უმატებდა. საბოლოოდ გადაწყვიტა, განქორწინება მოეთხოვა... თუმცა ახლანდელი გადმოსახედიდან, ჯობდა, პირველ რიგში სამართალდამცველებისთვის მიემართა...

სასამართლოში მისი ჩვენება ნაფიც მსაჯულთათვის გადამწყვეტი ფაქტორი გახდა.

2025 წლის ივლისში პატერსონი სამი ნათესავის მოწამვლაში დამნაშავედ ცნეს. 25 აგვისტოს მოსამართლე განაჩენს გამოუტანს. დიდი ალბათობით, ერინ პატერსონს სამუდამო პატიმრობა ემუქრება.