რა საბუთები უნდა წარადგინონ პირველკურსელებმა უნივერსიტეტებში - მშობლები

2025 წლის აბიტურიენტები სულ მალე გაიგებენ, რომელ უნივერსიტეტსა და პროგრამაზე გააგრძელებენ სწავლას. ჩარიცხვების თარიღის მოახლოებასთან ერთად, აბიტურიენტთა სხვადასხვა ჯგუფში უამრავი შეკითხვაა იმის შესახებ, თუ რა საბუთების წარდგენა დასჭირდებათ უნივერსიტეტებში, ატესტატის ნოტარიულად დამოწმებული ასლი სჭირდებათ თუ - არა, როგორი ფოტოსურათი უნდა წარადგინონ და ასე შემდეგ.

ერთი კონკრეტული წესი, რაც ყველა პირველკურსელზე გავრცელდება, არ არსებობს. თითოეული უნივერსიტეტი ინდივიდუალურად აქვეყნებს იმ საბუთების სიას, რომლებიც პირველკურსელებმა რეგისტრაციის დროს უნდა წარადგინონ.

• თუმცა, როგორც წესი, პირველკურსელებს სრული ზოგადი განათლების დამადასტურებელი დოკუმენტი სჭირდებათ. ზოგიერთი უნივერსიტეტი ნოტარიულად დამოწმებულ ასლს ითხოვს, ზოგი კი დედანსა და ასლს.
• ასევე, პირადობის მოწმობის დედანისა და ასლის წარდგენაა საჭირო.
• პირველკურსელებს სჭირდებათ ფოტოსურთი 3X4 და ასევე, ფოტოსურათის ელექტრონული ვერსია CD-ზე.
• ბიჭების შემთხვევაში, სამხედრო აღრიცხვის მოწმობის წარდგენაა საჭირო.
• ზოგიერთი უნივერსიტეტი სწავლის გადასახადის ნახევრის ან გარკვეული ნაწილის გადახდის ქვითრის წარდგენასაც ითხოვს.
• ასევე, შესაძლოა, უნივერსიტეტებმა მოითხოვონ დაფინანსების მიღებისათვის სხვადასხვა დოკუმენტის ასლი. მაგალითად, სოციალურად დაუცველის ან იძულებით გადაადგილებული პირის მოწმობის ასლები, ოქროსმედლის ფლობის დამადასტურებელი დოკუმენტი და ასე შემდეგ.

როგორც აღვნიშნეთ, თითოეული უნივერსიტეტი პირველკურსელებისათვის უნივერსიტეტში წარსადგენი დოკუმენტების სიას ინდივიდუალურად აქვეყნებს. ამიტომ, დეტალური ინფორმაციისათვის სასურველი უნივერსიტეტის ვებგვერდს უნდა გადახედოთ ან ცხელ ხაზზე დარეკოთ.

თამარ იაკობაშვილი