ზაფხულში ბავშვების საყვარელი გასართობი ქვიშაში თამაშია, თუმცა ამავე დროს, ქვიშა და სათამაშო მოედნები შეიძლება ინფექციების გავრცელების ერთ-ერთ წყაროდ იქცეს. სათამაშო სივრცეებში ბავშვები ხშირად არიან სხვადასხვა მიკროორგანიზმებთან კონტაქტში, რაც ჯანმრთელობისთვის საფრთხეს წარმოადგენს. მნიშვნელოვანია ვიცოდეთ, რა ინფექციები შეიძლება გავრცელდეს და როგორ დავიცვათ ბავშვები.
ქვიშა შესაძლოა გახდეს პარაზიტების, ვირუსების, ბაქტერიებისა და სოკოების წყარო. ერთ-ერთი ყველაზე გავრცელებული პარაზიტებია ტოქსოკარები, ასკარიდები და ექინოკოკები. მათი კვერცხები ქვიშაში ინფიცირებული ადამიანების ან ცხოველების ნარჩენებით ხვდება. ასეთ შემთხვევებში ბავშვებს შეიძლება ჰქონდეთ მუცლის ტკივილი, გულისრევა, ფაღარათი ან ალერგიული რეაქციები — გამონაყარი, ქავილი და შეშუპება. მაგალითად, ენტერობიოზი იწვევს ძლიერ ქავილს ღამით, ხოლო ტოქსოკაროზი შესაძლოა გამოვლინდეს ხველით, სიცხით, კონიუნქტივიტით, ღვიძლისა და ელენთის გადიდებით.
საკმაოდ ხშირია ნაწლავური ინფექციებიც. ქვიშაში შეიძლება მოხვდეს სალმონელა, ნაწლავის ჩხირი, კამპილობაქტერია, როტავირუსი ან ნოროვირუსი. ისინი მრავლდება ნარჩენებით ან ცხოველების ფეკალიებით. ასეთ დროს აღინიშნება მაღალი სიცხე, დიარეა და ღებინება.
ასევე არსებობს პროტოზოული ინფექციების საფრთხე, რომელთა შორისაა ტოქსოპლაზმოზი, ლამბლიოზი და ამებიაზი. ტოქსოპლაზმა ძირითადად კატების ნარჩენებით ხვდება ქვიშაში და იწვევს სიცხეს, სისუსტეს, გამონაყარსა და ლიმფური კვანძების გადიდებას. ლამბლიოზის დროს ხშირად გვხვდება დიარეა, მუცლის ტკივილი, შეშუპება, მადის დაკარგვა და დაღლილობა. ამებიაზი კი ნაწლავურ პრობლემებს სპაზმებს, ფაღარათს და ძლიერი ტკივილებს იწვევს.
გარდა ამისა, ქვიშაში შეიძლება სოკოვანი ინფექციები გავრცელდეს, რომლებიც აზიანებენ კანს, იწვევენ ქავილს, სიწითლესა და აქერცვლას.
ინფექციების თავიდან ასაცილებლად მნიშვნელოვანია გარკვეული წესების დაცვა. მშობლებმა რეგულარულად უნდა შეამოწმონ ქვიშის მდგომარეობა და მოერიდონ ისეთ ადგილებს, სადაც ნაგავი იყრება ან ცხოველების ფეკალიებია. არ შეიძლება ბავშვმა ქვიშა შეჭამოს ან ქვიშიან სათამაშოებსა და ხელებს პირით შეეხოს. თამაშის შემდეგ აუცილებელია ხელების დაბანა საპნით, ტანსაცმლის გამოცვლა და სათამაშოების დამუშავება. ასევე მნიშვნელოვანია ყველა დაგეგმილი ვაქცინაციის ჩატარება, რაც მნიშვნელოვნად ამცირებს ინფექციების რისკს.