ანა კურნიკოვა და ენრიკე იგლესიასი მეოთხე შვილს ელოდებიან - სპორტსმენი მეხუთე თვეშია - მშობლები

სოციალურ ქსელებსა და დასავლურ მედიაში აქტიურად ვრცელდება ინფორმაცია, რომ ჩოგბურთის 44 წლის ვარსკვლავი ანა კურნიკოვა და მისი მეუღლე, 50 წლის მომღერალი ენრიკე იგლესიასი მეოთხე ბავშვს ელოდებიან. როგორც ესპანური გამოცემა Hola! იუწყება, სანდო წყაროებმა დაადასტურეს, რომ სპორტსმენი მართლაც ორსულად არის.

ინსაიდერების თქმით, კურნიკოვა ამჟამად ორსულობის მეხუთე თვეშია და, სავარაუდოდ, დეკემბერში მეოთხედ გახდება დედა. პირველი ეჭვები მორიგი ორსულობის შესახებ გასულ კვირას გაჩნდა, როდესაც პაპარაცებმა მაიამიში სპორტსმენი შვილებთან ერთად გადაიღეს. ანა ქუჩაში ფართო სპორტული ჰუდით იყო, რაც ბევრმა მუცლის დამალვის მცდელობად შეაფასა. ახლა კი წყვილის გარემოცვაში არსებულმა წყარომ დაადასტურა, რომ სიახლე სიმართლეს შეესაბამება და ორსულობა კარგად მიმდინარეობს.

გავრცელებული ფოტოებიდან ირკვევა, რომ კურნიკოვა ფეხის მძიმე ტრავმის შემდეგ,, რის გამოც შვიდი თვე ინვალიდის ეტლში გაატარა, გამოკეთდა. მისი ჯანმრთელობის პრობლემები წლების წინ ზურგის დაზიანებას უკავშირდება. სწორედ ხერხემლის ქრონიკული ტკივილების გამო სპორტსმენმა კარიერა 2003 წელს, 21 წლის ასაკში დაასრულა. ექიმებმა მას დიაგნოზად დაუსვეს ხერხემლის წელის ნაწილის ქრონიკული დისფუნქცია, რომელიც ძლიერი ტკივილით, კუნთების დაჭიმვითა და დაბუჟებით ხასიათდება.

ანა და ენრიკე უკვე 25 წელია ერთად არიან. ისინი ერთმანეთს 2001 წელს ერთ-ერთი კლიპის გადაღებისას შეხვდნენ. მაშინ კურნიკოვა მსოფლიოს ოცეულში შემავალ ერთ-ერთ საუკეთესო ჩოგბურთელად ითვლებოდა და სექს-სიმბოლოდაც იყო აღიარებული. თუმცა მოგვიანებით სპორტიდან წავიდა და მთლიანად ოჯახს მიუძღვნა თავი.

წყვილი ყოველთვის ცდილობდა პირადი ცხოვრება საჯარო სივრციდან დაეცვა. მათი ქორწინების ზუსტი თარიღი უცნობია. 2017 წელს მათ ტყუპი – ნიკოლასი და ლუსია – შეეძინათ, ორი წლის შემდეგ კი მესამე შვილი, მარია. დღეს ისინი მაიამიში დიდ სახლებში ცხოვრობენ და იშვიათად აზიარებენ პირად ამბებს. არც მეოთხე ორსულობაზე გაუკეთებიათ საჯაროდ კომენტარი.