რომელ უნივერსიტეტებში ჩაირიცხა წელს ყველაზე მეტი გრანტიანი აბიტურიენტი - სტატისტიკა - მშობლები

შეფასებისა და გამოცდების ეროვნულმა ცენტრმა 2025 წლის ერთიანი ეროვნული გამოცდების საბოლოო შედეგები გამოაქვეყნა. წელს 31 704 აბიტურიენტი გახდა სტუდენტი, რაც ჩარიცხვის უფლების მქონე გამოსაცდელების დაახლოებით 88 %-ს შეადგენს და პროცენტულად ყველაზე მაღალია ბოლო წლების მონაცემებთან შედარებით.

2025 წელს დაფინანსდა 11 600-ზე მეტი გამოსაცდელი. სახელმწიფო გრანტი მოიპოვა 6 500-ზე მეტმა აბიტურიენტმა. აქედან - 100%-იანი სახელმწიფო გრანტი მიიღო 1000-ზე მეტმა აპლიკანტმა, 70%-იანი - 1 400-ზე მეტმა გამოსაცდელმა, 50%-იანი გრანტი კი - 4 000 - ზე მეტმა აბიტურიენტმა. სახელმწიფოს მიერ დაფინანსებულ უმაღლეს საგანმანათლებლო პროგრამებზე ჩაირიცხა 5 000 - მდე გამოსაცდელი.

დავინტერესდით, რომელმა უნივერსიტეტმა მიიღო ყველაზე წარმატებული სტუდენტები, ანუ წელს ჩარიცხული ნაკადიდან რომელ უნივერსიტეტშია პროცენტულად ყველაზე მეტი გრანტიანი სტუდენტი.

1. სახელმწიფო გრანტის მქონე სტუდენტების წილი ყველაზე მაღალია თბილისის თავისუფალ უნივერსიტეტში ჩარიცხულთა შორის. კერძოდ, 2025 წელს თავისუფალ უნივერსიტეტში ჩარიცხულებიდან 82% გრანტის მქონეა. (სულ თავისუფალ უნივერსიტეტში 627 აბიტურიენტი ჩაირიცხა.)
2. თბილისის სახელმწიფო სამედიცინო უნივერსიტეტში წელს 459 აბიტურიენტი ჩაირიცხა. მათგან სახელმწიფო გრანტი 69.7%-ს აქვს.
3. საქართველოს აგრარულ უნივერსიტეტში 313 სტუდენტი ჩაირიცხა. მათგან სახელმწიფო გრანტის მქონეა 69.6%.
4. ქუთაისის საერთაშორისო უნივერსიტეტში 2025 წელს 468 ადამიანმა ჩააბარა, მათგან 54%-მა სახელმწიფო გრანტი მოიპოვა.
5. ივანე ჯავახიშვილის სახელობის თბილისის სახელმწიფო უნივერსიტეტში 2025 წელს 5530 პირველკურსელი ჩაირიცხა. მათგან სახელმწიფო გრანტი 36.2%-მა აიღო.
6. ბიზნესისა და ტექნოლოგიების უნივერსიტეტში 1812-მა აბიტურიენტმა ჩააბარა. მათგან სახელმწიფო გრანტი 35.8%-მა აიღო.
7. კავკასიის უნივერსიტეტში 2025 წელს 1495-მა აბიტურიენტმა ჩააბარა. მათგან სახელმწიფო გრანტი 32%-მა აიღო.
8. თბილისის აპოლონ ქუთათელიძის სამხატვრო აკადემიაში 2025 წელს 339 აბიტურიენტი ჩაირიცხა, მათგან სახელმწიფო გრანტი 30.7%-მა მიიღო.
9. საქართველოს საზოგადოებრივ საქმეთა ინსტიტუტში 200 აბიტურიენტი ჩაირიცხა, მათგან სახელმწიფო გრანტი 23%-მა აიღო.
10. შავი ზღვის საერთაშორისო უნივერსიტეტში წელს 681 აბიტურიენტი ჩაირიცხა. მათგან სახელმწიფო გრანტი 20.3%-მა აიღო.

მონაცემები სრულად შეგიძლიათ, ქვემოთ იხილოთ: