რძალ-დედამთილს შორის კამათი და გაუგებრობა ძალიან ხშირია. ყოველივე ამის უკან ძალიან სერიოზული მიზეზები დგას. ორივე მხარეს ჰგონია, რომ მეორე არ აფასებს, არ უსმენს და მხოლოდ საკუთარ აზრს მიიჩნევს სწორად. შედეგად იქმნება დაძაბულობა, რომელიც მთელ ოჯახზე აისახება.
განსხვავებული ხედვები
დედამთილი და რძალი სხვადასხვა ოჯახში და ეპოქაში გაიზარდნენ. ერთი თვლის, რომ ქალის მთავარი საქმეა ოჯახი, მეორე კი თვითრეალიზაციასა და კარიერას ანიჭებს მნიშვნელობას. ბუნებრივია, როცა შეხედულებები ასე განსხვავებულია, ხშირად ჩნდება დაპირისპირება.
ბავშვობიდან ჩამოყალიბებული დამოკიდებულება
ხშირად რძალი საკუთარ დედას ჰგავს – თუ ბავშვობაში ის ხედავდა, რომ დედამისს დედამთილთან დაძაბული ურთიერთობა ჰქონდა, უნებლიეთ იგივე მოდელი გადმოაქვს. ზუსტად იგივე ხდება საკუთარი დედამთილის შემთხვევაშიც.
ახალი ოჯახის უგულებელყოფა
ზოგი დედამთილი მხოლოდ შვილს ხედავს და რძალს თითქოს „ვერ ამჩნევს“. ეს დიდი შეცდომაა, რადგან ოჯახი უკვე წყვილია და მათი ურთიერთობის პატივისცემა აუცილებელია.
კონკურენცია „ვინ არის მთავარი ქალი“
დედამთილი ფიქრობს, რომ უკეთ იცის, რა სჭირდება მის შვილს, რძალი კი დარწმუნებულია, რომ მეუღლესთან ურთიერთობაში გადაწყვეტილებები თავად უნდა მიიღოს. სწორედ აქ იწყება ყველაზე მწვავე დაპირისპირება.
პირადი სივრცის დარღვევა
დედამთილი რჩევებსა და მოულოდნელ ვიზიტებს ზრუნვად აღიქვამს, მაგრამ რძლისთვის ეს ხშირად პირადი სივრცის უხეში დარღვევაა.
საზოგადო სტერეოტიპები
სტერეოტიპი „დედამთილი ყოველთვის პრობლემაა“ ან „რძალი არასოდეს იქნება საკმარისად მოსაწონი“ ორივე მხარეს წინასწარ განაწყობს კონფლიქტზე.
1. აღიარე ახალი ოჯახი - დედამთილისთვის მთავარი ნაბიჯია დაინახოს, რომ მისი შვილი ქმნის ახალ ოჯახს. რძლისთვის კი – პატივი სცეს ოჯახის ტრადიციებს და არ აგრძნობინოს დედამთილს თავი ზედმეტად.
2. ისწავლეთ დიალოგი - ურთიერთობა ვერ დალაგდება, თუ ორივე მხარე მხოლოდ საყვედურებს იტყვის. სასურველია მშვიდად დალაპარაკება: რა გვტკენს გულს, რა გვაღიზიანებს და როგორ გვინდა, რომ შეიცვალოს. სიმართლის გულწრფელად თქმა ჩხუბის, ცრემლების და აყალ-მაყალის გარეშეც შეიძლება.
3. საზღვრების დადგენა - მოილაპარაკეთ, რა არის მისაღები და რა – არა. მაგალითად: როდის შეიძლება მოულოდნელად მოსვლა, რამდენად მისაღებია რჩევები ბავშვების აღზრდაზე ან სახლის საქმეებზე.
4. ერთმანეთის როლის პატივისცემა - დედამთილი შეიძლება ძალიან დიდი იმედი და მხარდაჭერა იყოს რძლისთვის, თუ ეს უკანასკნელი მის გამოცდილებას პატივს სცემს. ასევე დედამთილისთვის მნიშვნელოვანია გააცნობიეროს, რომ მისი როლი შეიცვალა – ახლა ის უკვე არა მთავარი, არამედ დამხმარე ფიგურაა.
5. საერთო მიზნები
განსხვავებული აზრების მიუხედავად, ორივეს ერთი რამ აქვს საერთო – ოჯახი ბედნიერი და მშვიდი იყოს. თუ ამ მიზანზე კონცენტრირდებიან, საერთოსაც მეტს იპოვიან და ბევრ გაუგებრობას თავიდან აირიდებენ.