როგორ და რომელი ასაკიდან გადავაჩვიოთ ბავშვი საფენს ე.წ გადაყენებით: "ასე უფრო სწრაფად დაიწყებს ფიზიოლოგიური მოთხოვნილებების კონტროლს, ბუნებრივი ინსტინქტებიც დროულად ჩამოუყალიბდება" - მშობლები
როგორ და რომელი ასაკიდან გადავაჩვიოთ ბავშვი საფენს ე.წ გადაყენებით: "ასე უფრო სწრაფად დაიწყებს ფიზიოლოგიური მოთხოვნილებების კონტროლს, ბუნებრივი ინსტინქტებიც დროულად ჩამოუყალიბდება"
პედიატრებიც და ფსიქოლოგებიც თანხმდებიან, რომ ბავშვი საფენს რამდენადაც შეიძლება მალე უნდა გადაეჩვიოს. რაც უფრო სწრაფად დაიწყებს ფიზიოლოგიური მოთხოვნილებების კონტროლს, მით უკეთესია მისი განვითარებისთვის. გადაჩვევა იმას არ ნიშნავს, რომ უბრალოდ აღარ ჩააცვათ, სამაგიეროდ ჩასველებული სამოსი რეცხოთ მთელი დღის განმავლობაში. გადაჩვევა ე.წ. "გადაყენებას" გულისხმობს.
გადაყენებისთვის ნუ დაელოდებით დროს, როცა ბავშვი დამოუკიდებლად ჯდომას ისწავლის. სანამ ქოთანზე დაჯდება, გადაყენება მანამდე სცადეთ. ამ დროს პატარა რაც შეიძლება მოხერხებულად უნდა გეკავოთ.
გადაყენების პროცესი ბავშვის ბუნებრივი აღზრდის ნაწილია. ამით იცლება შარდის ბუშტი და სწორი ნაწლავი. გაითვალისწინეთ - გადაყენება ქოთანზე მიჩვევა არ არის. ეს ორი სხვადასხვა რამაა.
სხვათა შორის, გადაყენება ბავშვს აკაჟებს. დღის განმავლობაში რამდენჯერმე გახდა და ქვედა ნაწილის მოშიშვლება თანდათან აჩვევს ტემპერატურის ცვლილებას.
გადაყენება მხოლოდ საფენების ეკონომია არ გახლავთ. მას ბევრი პლუსი აქვს - გაათავისუფლოს ბავშვი "ჩახურებული" საფენისგან, ბუნებრივად მოასაქმებინოს და ბუნებრივი ინსტინქტები დროულად ჩამოუყალიბოს. ასევე კარგი საშუალებაა დედა-შვილის ფიზიკური კონტაქტისთვის.
გადაყენების წესები:
1. გადააყენეთ ბავშვი ყოველი ძილის შემდეგ იმის მიუხედავად, ჩასველებულმა გაიღვიძა თუ მშრალმა.
2. გადააყენეთ თუ მოუსვენრობა შეატყვეთ. თანდათან მიხვდებით, რა სახის მოუსვენრობა აწუხებს, როცა მოსაქმება უნდა.
3. გადააყენეთ გასეირნების წინ.
4. ნუ ელით, რომ ბავშვი მაშინვე მოშარდავს, როგორც კი გადააყენებთ. დააცადეთ 3-5 წუთი მაინც.
5. თუ გადაყენებას "დანერგავთ", სისტემატურად გააკეთეთ ეს. ერთ დღეს 10-ჯერ გადააყენოთ და მეორე დღეს არც ერთხელ, ამას აზრი არ ექნება.
დღისით შეიძლება ადვილად მიაღწიოთ უსაფენოდ სიარულს, თუმცა ღამით ბავშვს საფენი მაინც სჭირდება. ბევრი მშობელი ღამითაც აყენებს ბავშვს, რაც დიდად სასარგებლო არ არის. ბავშვს ღამით მშვიდად უნდა ეძინოს. ღამის სიმშრალე იმაზეა დამოკიდებული, თუ რამდენად არის შარდის ბუშტი მზად, მთელი ღამით შეიკავოს სითხე. ეს ინდივიდუალურია და უბრალოდ, უნდა დაელოდოთ.
თუ ბავშვი ძალიან აპროტესტებს გადაყენების პროცესს, ნუ დააძალებთ. ყველა ბავშვი ერთნაირად ვერ ეგუება ახალ წესებს. ცოტა დრო გავიდეს და შემდეგ ისევ სცადეთ.