აქვს თუ არა განათლების სამინისტროს უფლება, მე-12 კლასელებს საზღვარგარეთ ექსკურსია აუკრძალოს ან რეგულაციები შემოიღოს: "ბოლო ექსკურსია საზღვარგარეთ ძალიან ტრენდული გახდა... მშობელს წლობით ვალი ედება..." - მშობლები

"მოგეხსენებათ, მეთორმეტეკლასელების ბოლო ექსკურსია საზღვარგარეთ ძალიან ტრენდული გახდა, რომელიც შეფუთულია მოსწავლეების სურვილით, სინამდვილეში კი კლასები და დამრიგებლები ეპაექრებიან ერთმანეთს. ეს კი ძალიან დიდ ხარჯებთანაა დაკავშირებული, მინიმუმ 5000 ლარი უჯდება მშობელს. ვიღაცას ამის პრობლემა საერთოდ არ აქვს, ვიღაცისთვის კი ეს შეიძლება, შვილს რომ სირცხვილი არ ანახოს და არ გამორჩეს ამხანაგებს, წლების ვალის ფასი გახდეს. არ შეიძლება საჯარო სკოლებში აიკრძალოს სკოლის მოსწავლეებისთვის ქვეყნიდან გასვლა? - ეს მკითხველის წერილია, რომელიც, ვფიქრობთ, ბევრი მშობლის სათქმელს ამბობს.

როგორც წესი, სასკოლო ექსკურსიები ქვეყნის შიგნით იმართება. თუმცა, ბოლო წლების განმავლობაში, მე-12 კლასელები ტრადიციულ ბანკეტზე უარს ამბობენ და სკოლის დასრულების შემდეგ ექსკურსიაზე რამდენიმე დღით საზღვარგარეთ მიდიან. ეს კი ბევრი მშობლისთვის განსაკუთრებით რთულია, რადგანაც შორ მანძილზე მოგზაურობა საკმაოდ დიდი თანხა ჯდება. საინტერესოა, არსებობს თუ არა რეგულაცია საზღვარგარეთ ჩატარებულ სასკოლო ექსკურსიაზე.

სასკოლო ექსკურსიები ხშირად მოსწავლეებისათვის შემეცნებით და გასართობ ხასიათს ატარებს. მათ აქვთ შესაძლებლობა, თანაკლასელებთან ერთად, ახალი ადგილები აღმოაჩინონ, ცოდნა გაიმრავალფეროვნონ და დრო სასიამოვნოდ გაატარონ.

როგორც განათლების, მეცნიერებისა და ახალგაზრდობის სამინისტროში განგვიცხადეს, სამინისტრო ექსკურსიებს ქვეყნის შიგნით არეგულირებს და უსაფრთხოებასთან დაკავშირებით, სხვადასხვა წესია შემუშავებული, რომელთა დაცვაც ყველა სკოლას უწევს. მაგალითად:

• ექსკურსიის ორგანიზატორი/ხელმძღვანელი პასუხისმგებელია მგზავრობის პროცესში და ექსკურსიის ლოკაციაზე მოსწავლეთა უსაფრთხოებაზე, რისთვისაც იგი გამოითხოვს და სკოლის დირექტორს ექსკურსიამდე არანაკლებ 10 დღის ადრე წარუდგენს ტრანსპორტის გამართულობის დამადასტურებელ დოკუმენტს, მძღოლის პირადობის დამადასტურებელი დოკუმენტისა და შესაბამისი კატეგორიის ავტომანქანის მართვის უფლების დამადასტურებელი მოწმობის ასლს. ასევე ინფორმაციას ექსკურსიის მიზნების, დაგეგმილი აქტივობების, მონაწილე პირების, პასუხისმგებელი პირების, ექსკურსიის თარიღისა და ლოკაციის შესახებ. ამის შემდეგ სკოლის დირექტორი წარდგენილ დოკუმენტაციას განიხილავს და გადაწყვეტს, მისცეს თუ არა ორგანიზატორს ექსკურსიის განხორციელების უფლება.მნიშვნელვანია, რომ ექსკურსიის დროს არასრულწლოვნები არ მოხვდნენ მდინარისა და წყალსაცავების მიმდებარე ტერიტორიაზე, მეწყერსაშიშ და და სხვა დაუცველ ტერიტორიაზე.
• აღსანიშნავია, რომ ექსკურსიის ხელმძღვანელს სრულყოფილად უნდა ჰქონდეს მონაწილე მოსწავლეებისა და მშობლების მონაცემები, მათ შორის, ინფორმაცია მონაწილე მოსწავლის სპეციალური საჭიროების შესახებ. ასევე, ფლობდეს მშობლის წერილობით თანხმობას, ექსკურსიაში მისი შვილის მონაწილეობის შესახებ, თუ ბავშვს წარმომადგენელი თან არ ახლავს.
• სატრანსპორტო საშუალებას უნდა მართავდეს შესაბამისი გამოცდილებისა და სათანადო კატეგორიის მართვის მოწმობის მქონე მძღოლი. უნდა იყოს განთავსებული პირველადი დახმარების სამედიცინო ჩანთა. ხოლო, კვების პროდუქტები სანიტარული პირობების დაცვით უნდა წაიღონ.
• თუ ექსკურსიის ფარგლებში დასაფარი მიახლოებითი მანძილი 500 კმ-ზე მეტია, ავტოსატრანსპორტო საშუალების მძღოლს უნდა ახლდეს პირი, რომელიც მას საჭესთან შეცვლის და აკმაყოფილებს ზემოთ ნახსენებ მოთხოვნებს.

რაც შეეხება საზღვარგარეთ მოგზაურობას, როგორც განათლების, მეცნიერებისა და ახალგაზრდობის სამინისტროში განგვიცხადეს, საზღვარგარეთ მოსწავლეების წაყვანას სამინისტრო არ არეგულირებს და ამას მასწავლებელი და მშობელი ერთობლივად წყვეტს, იღებს პასუხისმგებლობას, უთანხმდება კონკრეტულ კომპანიას და მასთან თანამშრომლობს.

მათივე თქმით, თუ ექსკურსია მე-12 კლასის დასრულების შემდეგ ეწყობა, სკოლა და სამინისტრო პასუხისმგებლობას ვერ აიღებენ, რადგანაც მოსწავლეებმა საგანმანათლებლო დაწესებულება უკვე დატოვეს. ქვეყნიდან გასვლის საკითხი კი მასწავლებლისა და მოსწავლის შეთანხმების და პირადი პასუხისმგებლობის ფარგლებში ხდება.