ვინ არის ევროპის ყველაზე ელეგანტური სამეფო წყვილი - საზოგადოებაში მათი გამოჩენა ყოველთვის დიდ ინტერესს იწვევს - მშობლები
ვინ არის ევროპის ყველაზე ელეგანტური სამეფო წყვილი - საზოგადოებაში მათი გამოჩენა ყოველთვის დიდ ინტერესს იწვევს
ბეატრის ბორომეო და გრეის კელის შვილიშვილი, პიერ კაზირაგი, მესამედ გახდნენ მშობლები. წყვილს გამორჩეული გარეგნობის გამო უამრავი გულშემატკივარი ჰყავს და საზოგადოებაში მათი ერთობლივი გამოჩენა ყოველთვის დიდ ყურადღებას იმსახურებს. მეტიც, ბეატრისისსა და პიერს ევროპაში ყველაზე მოდურ წყვილად ასახელებენ:
თვის დასაწყისში 38 წლის პიერ კაზირაგი და 40 წლის ბეატრის ბორომეო მრავალშვილიანი მშობლები გახდნენ. პატარა გოგონას ბიანკა კაროლინა მარტა დაარქვეს. მისის სახელი შემთხვევითი არ არის. კაროლინა პიერის დედის, პრინცესა კაროლინას პატივსაცემად შეურჩიეს, მარტა კი ბეატრისის დედის მხრიდან ბებიას, იტალიელ მოდის დიზაინერს, მარტა მარცოტოს ერქვა.
ბეატრისი ევროპული არისტოკრატიის მარგალიტად ითვლება. მას ნამდვილად ყველაფერი აქვს: სილამაზე, სამეფო წარმომავლობა, შესანიშნავი განათლება და ბედნიერი ოჯახი. ის ბორომეოების უძველეს არისტოკრატულ ოჯახში დაიბადა. დედის მხრიდან კი მარცოტოს ოჯახის წევრია. ისინი ტექსტილის იმპერიის მფლობელები არიან, რომელიც ოდესღაც მოდის სახლ Valentino-ს ეკუთვნოდა.
თუმცა, ბეატრისი მხოლოდ ცნობილი და გავლენიანი ოჯახის წარმომადგენელი არ არის. გოგონამ ძალიან კარგი განათლება მიიღო და საკუთარი საქმე აქვს. კერძოდ, ბეატრისი მილანის ბოკონის უნივერსიტეტში სამართალზე სწავლობდა. კოლუმბიის უნივერსიტეტში კი ჟურნალისტიკის მაგისტრი გახდა. შემდეგ მუშაობა ჟურნალისტად და მოდელად დაიწყო. მისი გამორჩეული გარეგნობა ყურადღებას ყოველთვის იპყრობდა. ბავშვობიდან მას ვალენტინოსა და არმანის სამოსი ეცვა.
სწავლის პერიოდში ბეატრისი პიერ კაზირაგს შეხვდა. გრეის კელის შვილიშვილისა და იტალიელი გრაფის ქალიშვილის მდიდრული ქორწილი 2015 წელს შედგა. სამოქალაქო ცერემონია მონაკოს სამთავრო სასახლეში გაიმართა, ხოლო ჯვარი იზოლა-ბელას კუნძულზე დაიწერეს. წვეულება რამდენიმე დღის განმავლობაში გაგრძელდა და ბეატრისმა 5 სხვადასხვა კაბა მოირგო. გოგონას კაბები ცნობილმა მოდის სახლებმა შექმნეს. მათ შორისაა, Valentino, Giorgio Armani, Alberta Ferretti და სხვები.
თუმცა, ყოველდღიურ ცხოვრებაში ბეატრისი უპირატესობას მარტივ და კომფორტულ სამოსს ანიჭებს. ჟურნალისტის პროფესიიდან გამომდინარე, გოგონას უყვარს ჯინსები, სპორტული ფეხსაცმელი, სადა სვიტერები. პრინცესას სტატუსის პარალელურად, ძალიან ხშირად ხელმისაწვდომ ნივთებს ირჩევს და ძვირად ღირებულ სამოსს ქირაობს კიდეც.
შესანიშნავად იცის, ერთი შეხედვით, მარტივი და სადა ნივთები როგორ გაამრავალფეროვნოს ისე, რომ ელეგანტური ლუქები შექმნას. ის მრავალი წლის განმავლობაში Dior-ის სახე იყო და არც ერთ ჩვენებას არ ტოვებდა.
ბეატრისი 3 შვილის დედაა. მას და მის მეუღლეს ორი ვაჟი და ერთი ქალიშვილი ჰყავთ და ყოველთვის შესანიშნავად გამოიყურებიან.
