"ძალიან მიხარია, რომ მოტივაცია ვარ 30+ გოგოების, რომლებიც შეჭმული ჰყავს სანათესაოს და სამეზობლოს, რომ დააგვიანდა და აღარაფერი იქნება წინ..." - ნანუკა გულუა - მშობლები
"ძალიან მიხარია, რომ მოტივაცია ვარ 30+ გოგოების, რომლებიც შეჭმული ჰყავს სანათესაოს და სამეზობლოს, რომ დააგვიანდა და აღარაფერი იქნება წინ..." - ნანუკა გულუა
ტელეწამყვანი ნანუკა გულუა კოტე მათითაშვილის პოდკასტს სტუმრობდა და "ასაკში ოჯახის შექმნაზე" ისაუბრა. იმაზე, თუ როგორი მოტივაციაა 30+ გოგოებისთვის, რომლებსაც უკვე აღარ უსვამენ შეკითხვას "როდის გათხოვდება", არამედ ხელი აქვთ ჩაქნეული, რომ "დააგვიანდა და წინ აღარაფერი ელოდება". ნანუკას თქმით, მას არაერთხელ გაუგზავნია თავის სამ შვილთან ერთად გადაღებული ფოტო ასეთი ადამიანებისთვის, რათა აჩვენონ ახლობელ-ნათესავებს. თავად ნანუკა ხომ 38 წლის ასაკში დაოჯახდა, ლამის "შინაბერას" სტატუსით.
ამ თემაზე ადრეც ისაუბრა ვრცლად:
- "შინაბერობიდან" ეგრევე მრავალშვილიანი დედის სტატუსამდე გადავედი. 38 წლის ასაკში დავოჯახდი. 39 წლისამ ერთი შვილი გავაჩინე, 40 წლის ასაკში - მეორე. 41 წლის ვარ და მალე მესამეს გავაჩენ. როცა მეორე შვილზე ორსულად დავრჩი, ამას ნამდვილად არ ველოდი. რომ მეკითხებოდნენ, კიდევ რამდენი შვილის გაჩენას აპირებო, ვამბობდი, რომ რამდენსაც ღმერთი მომცემს, იმდენს გავაჩენ. კარგია, რომ უფრო ადრე არ დავოჯახდი. 14-15 შვილი რომ ჰყავთ, ალბათ, ასეთი დედა ვიქნებოდი.
ჩემი შვილები თითქმის ტოლი არიან. დედას დაემსგავსნენ. გაჯეტებზე დამოკიდებულები არ არიან, შესაბამისად, ასჯერ მეტ ყურადღებას მოითხოვენ. მუდმივად ჟრიამულია. ადრე ვფიქრობდი, რა აუცილებელია, ყველა ქალს შვილი ჰყავდეს-თქო. მაგრამ, ისე შემეშინდა ამ გახსენების, რომ სასწრაფოდ გონება ამ ჩემს "ჟრიამულში" გადმოვახვიე. ვიდრე დავოჯახდებოდი, ბოლომდე მქონდა ის შეგრძნება, რომ ბედნიერი, შემდგარი ადამიანი ვიყავი და არაფერი მაკლდა. კახა (მეუღლე) რომ არ ყოფილიყო, მე ამ ნაბიჯს არ გადავდგამდი. ძალიან მიჭირდა. უკვე ის პერიოდი იყო, როცა მარტო ყოფნას შეჩვეული ვიყავი და ყველაფერი დალაგებული მქონდა. ოქროს ადამიანი შემხვდა. რა ვინატრე ასეთი, რომ ზუსტად ასეთი მამა ჰყავთ ჩემს შვილებს, როგორზეც ვოცნებობდი.
გოგონებო, თუ თქვენ გავიწროებენ, 38-39 ან 40 პლუს ასაკში გეუბნებიან, რომ თქვენი დრო წავიდა, აწი რაღა დროს სიყვარული და ოჯახია, არ მოისმინოთ, ყველაფერი გადასარევადაა. თუ თქვენს ლამაზ ცხოვრებაში შემოვა ადამიანი, რომელიც ამ ყველაფერს უფრო ლამაზს გახდის, მხოლოდ ამ შემთხვევაშია ეს უდიდესი ბედნიერებაა. იმიტომ, რომ "ვაიმე, მაგვიანდება, ვინც გინდა, ის იყოს", არასწორია. ყველაფერი წინაა. ქალბატონებისთვის გვიან არასდროს არ არის. რაზეც ვიოცნებე, ყველაფერი ამიხდა ისე, რომ ომი, ადამიანის გაგუდვა - არაფერი გამიკეთებია. უბრალოდ, ძალიან ვოცნებობდი. როცა გულწრფელი ხარ და ყველა ადამიანისთვის სიკეთე გინდა, აუცილებლად ზემოდან ყველაფერი მოდის.
