ცნობილი შეფმზარეული გირჩევთ, როგორ გაზარდოთ ჯანმრთელი და ძლიერი იმუნიტეტის მქონე ბავშვი საკვებისადმი სწორი დამოკიდებულებით - მშობლები

ცნობილი შეფ-მზარეული და ნუტრიციოლოგი სილვენა როუ იმის შესახებ საუბრობს, თუ როგორ შეიძლება სწორად შერჩეულმა კვებამ ბავშვის ჰარმონიული განვითარება უზრუნველყოს, გააძლიეროს იმუნიტეტი და ჯანმრთელი და ენერგიული ცხოვრების საფუძველი გახდეს.

ტერმინი ბიოჰაკინგი უცნაურად ჟღერს, თუმცა სინამდვილეში მისი არსი მარტივია — სხეულში მიმდინარე პროცესების გაუმჯობესება და დაბალანსება. ბავშვებისთვის ეს განსაკუთრებით მნიშვნელოვანია, რადგან ზრდისა და განვითარებისთვის ყოველი საკვები ნივთიერება გავლენას ახდენს ტვინის, იმუნური სისტემის, ძვლებისა და კუნთების ჩამოყალიბებაზე.

მიკრობიომი — ბავშვის „მეორე ტვინი“

თანამედროვე მეცნიერებამ დაადასტურა, რომ ნაწლავის მიკრობიომი პირდაპირ კავშირშია ტვინის ფუნქციონირებასთან ე.წ. „ნაწლავი–ტვინის ღერძის“ მეშვეობით. სასარგებლო ბაქტერიები წარმოქმნიან ორგანიზმში არსებული სეროტონინის დაახლოებით 90%-ს და სხვა ნეიროაქტიურ ნივთიერებებსაც, მათ შორის GABA-ს, რომელიც ამცირებს შფოთვას და აუმჯობესებს ძილს.

ბავშვის ადრეულ ასაკში მიკრობიომის მდგომარეობა იმუნური სისტემის მუშაობას წლების განმავლობაში განსაზღვრავს. მისი დისბალანსი შეიძლება დაკავშირებული იყოს ალერგიებთან, აუტოიმუნურ დაავადებებთან და ნეირობიჰევიორალურ აშლილობებთან, მათ შორის აუტიზმსა და ყურადღების დეფიციტის სინდრომთან.

„ხშირად ამბობენ, რომ ნაწლავი მეორე ტვინია, მაგრამ მე ვფიქრობ, რომ ის — პირველიცაა. რადგან ჩვენი ენერგია, განწყობა და სტრესთან გამკლავება სწორედ ნაწლავის ბალანსზეა დამოკიდებული.“ - ამბობს სილვენა.

მისი აზრით, ჯანმრთელი მიკრობიომი მხოლოდ საჭმლის მომნელებელი სისტემის ნაწილია კი არა — ეს არის შიდა ჰარმონიისა და გრძელვადიანი ჯანმრთელობის საძირკველი.

როგორ დავეხმაროთ ბავშვს სწორი კვების ჩვევის ჩამოყალიბებაში

სილვენა როუ საკუთარ გამოცდილებაზე დაყრდნობით ამბობს, რომ ჯანსაღი კვება რთულ რეცეპტებს არ მოითხოვს — მთავარი მარტივი პრინციპებია.

1. კვება — ყოველდღიური ინვესტიცია ჯანმრთელობაში. მშობლებმა საკვები უნდა აღიქვან არა როგორც უბრალოდ „დღევანდელი მენიუ“, არამედ როგორც ყოველდღიური ინვესტიცია მიკრობიომში და იმუნიტეტში.

2. არ დააშოროთ „სწორი“ და „გემრიელი“ საკვები. როცა ბავშვს ეუბნებით, რომ რაიმე უნდა შეჭამოს მხოლოდ იმიტომ, რომ ის „ჯანმრთელია“, კვება რუტინად და იძულებად იქცევა. უკეთესია, ავუხსნათ რატომ არის ეს პროდუქტი საინტერესო — როგორ იზრდება, რა ვიტამინებს შეიცავს და რაში ეხმარება ორგანიზმს.

3. მაგალითი უფროსებისგან. ბავშვი სწავლობს არა სიტყვებით, არამედ დაკვირვებით — უფროსების ქცევის მიბაძვით. ამიტომაც, მშობლის ჯანსაღი დამოკიდებულება საკვებისადმი ბავშვს აყალიბებს არა მხოლოდ სწორ კვების ჩვევებს, არამედ პატივისცემას საკუთარი სხეულისადმი.

ფერადი თეფში — ჯანსაღი მენიუს საიდუმლო

ბავშვის ორგანიზმს რომ ყველა აუცილებელი ნივთიერება მიეწოდოს, კერძებში უნდა იყოს წარმოდგენილი სხვადასხვა ფერის ბოსტნეული და ხილი — მინიმუმ ხუთი ფერის სპექტრი:

• მწვანე: ასუფთავებს ორგანიზმს (ისპანახი, ბროკოლი, მწვანილი);

• ნარინჯისფერი: ამარაგებს ვიტამინებით (გოგრა, სტაფილო, ფორთოხალი);

• წითელი: აძლიერებს გულს და სისხლძარღვებს (პომიდორი, წითელი ბულგარული, ვაშლი);

• იისფერი: იცავს უჯრედებს (ბადრიჯანი, წითელი კომბოსტო, ყურძენი);

• თეთრი: ამშვიდებს და არეგულირებს მეტაბოლიზმს (ყვავილოვანი კომბოსტო, ნიახურის ფესვი).

ასევე მნიშვნელოვანია ფერმენტირებული პროდუქტები — ნატურალური იოგურტი, კეფირი, მწნილეული. ისინი ხელს უწყობს „სასარგებლო ბაქტერიების“ ზრდას და აუმჯობესებს საკვები ნივთიერებების შეწოვას.

გარემო და ემოციური ფონი კვების დროს

კვლევები აჩვენებს, რომ ბავშვი უკეთ ითვისებს საკვებიდან მიღებულ ვიტამინებს მაშინ, როცა საკვებს იღებს მშვიდ გარემოში. სტრესი და ნერვიულობა ამცირებს სისხლის მიმოქცევას კუჭ–ნაწლავში და აფერხებს საკვები ნივთიერებების ათვისებას.

ასევე სასურველია, ბავშვი ჩაერთოს მომზადების პროცესში — ბოსტნეულის გარეცხვით, ინგრედიენტების მორევით ან კერძის გაფორმებით. როცა ბავშვი თავად მონაწილეობს, უფრო დიდი სურვილი უჩნდება გასინჯოს ახალი კერძები.ნგი ბავშვებისთვის — ეს არის გონივრული, მეცნიერულად დასაბუთებული მიდგომა კვებისადმი, რომელიც აყალიბებს ჯანმრთელობის საფუძველს ათწლეულებით.“

თუ მშობელი ასწავლის ბავშვს გააზრებულად მოეკიდოს კვებას, ის აძლევს ცხოვრების ერთ-ერთ ყველაზე მნიშვნელოვან უნარს — ზრუნვას საკუთარ თავზე. და სწორედ ეს უნარი ხდება საფუძველი გრძელი, ენერგიული და ბედნიერი ცხოვრებისათვის.