კანი — ჩვენი ყველაზე დიდი ორგანო და პირველი დამცავი ბარიერია გარემოსგან. ბავშვებში, რომლებიც სულ მოძრაობენ, ეცემიან, კანი ხშირად ზიანდება. იქნება ეს ჭრილობა, დამწვრობა თუ ანთება — ყველა დაზიანების საბოლოო ეტაპი არის ნაწიბური - იარა, რომელსაც "შრამსაც" ეძახიან. სტატისტიკით, მსოფლიოს ყოველი მეორე ადამიანს ერთი ნაწიბური მაინც აქვს.

ამ სტატიაში შევკრიბეთ ჭრილობებთან და იარებთან დაკავშირებული ყველაზე გავრცელებული მითები, რომლებსაც ძირითადად, ბავშვებთან მიმართებაში ვაწყდებით:

მითი 1. „ბავშვებში "შრამები" დროთა განმავლობაში ქრება — მათ ხომ ყველაფერი სწრაფად უხორცდებათ“

თუ ჭრილობა დიდებსაც და ბავშვებსაც გართულების გარეშე შეუხორცდებათ, ჩვეულებრივი, ნორმოტროფიული შრამი ძირითადად მართლაც ქრება: უხილავი ხდება და თითქმის არ განსხვავდება დანარჩენი კანისგან.

თუმცა ყოველთვის ასე არ არის. ზოგჯერ ფორმირდება პათოლოგიური შრამი, რომელიც შეიძლება იყოს მყარი, წითელი, ჩაძირული ან, პირიქით, ამოსული და შესამჩნევი. ამის მიზეზი შეიძლება იყოს: ინფექციები, განმეორებითი ტრავმა, აკნე, ატოპიური დერმატიტი, გენეტიკური ფაქტორები და სხვა.

პათოლოგიური შრამები რამდენიმე ტიპად იყოფა:

• – ჰიპერტროფიული — მყარი, ამოზნექილი, მაგრამ არ სცდება თავდაპირველი ჭრილობის საზღვრებს.
• – კელოიდური — გადადის ჭრილობის ფარგლებს მიღმა, მძიმეა, მტკივნეული და ხშირად ქავილს იწვევს.
• – ატროფიული — ჩაღრმავებული, „ღრმულების“ მსგავსია.

მიუხედავად იმისა, რომ ახალგაზრდა კანი (დაახლოებით 30 წლამდე) მართლაც სწრაფად აღდგება, სწორედ ეს „სისწრაფე“ ზრდის პათოლოგიური შრამის ჩამოყალიბების რისკს — უჯრედების სწრაფმა დაყოფამ შეიძლება სწორად ვერ იმუშაოს.

მითი 2. „თუ ჭრილობა გექავება, ეს ნიშნავს, რომ ყველაფერი სწორად ხორცდება“

ჭრილობის ნაწიბურის ქავილი ხშირია, მაგრამ არ ნიშნავს, რომ ყველაფერი წესრიგშია. ქავილის არქონაც არ ნიშნავს, რომ შრამი სრულად გაქრება.

თანამედროვე საფენები, ანტისეპტიკური მკურნალობა და სწორი მოვლა მნიშვნელოვნად ამცირებს პათოლოგიური შრამის რისკს. პრევენცია უნდა დაიწყოს ადრეულ ეტაპზე, როგორც კი სისხლდენა შეწყდება.

რეკომენდებულია უსაფრთხო და სანდო საშუალებები, რომლებიც სახლში ხანგრძლივად გამოყენებას ითვალისწინებს:

• – შარდმჟავას და პანტენოლს შემცველი პროდუქტები,
• – სპეციალური დამჭერი პლასტირები,
• – სპეციალური გელები,რომლებიც შეხორცებას უწყობს ხელს

მითი 3. „შრამი მხოლოდ კოსმეტიკური დისკომფორტია“

პათოლოგიური შრამები მხოლოდ ესთეტიკური პრობლემა არ არის. ბავშვი იზრდება, კანი იწელება, მაგრამ შრამი იგივე რჩება. შედეგად შეიძლება განვითარდეს:

• – კანის დაჭიმულობა და ტკივილი
• – მოძრაობის შეზღუდვა
• – სახსრების ფუნქციის დარღვევა
• – დეფორმაციები ზრდის ფონზე

გარდა ამისა, თვალსაჩინო შრამები ბავშვებზე და მოზარდებზე ძლიერ ფსიქოლოგიურ გავლენას ახდენს.

მითი 4. „შინაური საშუალებები შრამს გააქრობს“

სახლის რეცეპტებს არ აქვთ სამეცნიერო მტკიცებულება. ზოგიერთმა მათგანმა შესაძლოა ალერგია ან გაღიზიანება გამოიწვიოს.

მითი 5. „თუ შრამი უკვე გაჩნდა, ვეღარაფერს უშველი“

ვიზუალური დეფექტის შემცირება შესაძლებელია — ხშირად ოპერაციის გარეშეც. არსებობს:

• – სპეციალური გელები,
• – ლაზერული თერაპია,
• – ინექციები,
• – ფიზიოთერაპია.

როგორ დავეხმაროთ ბავშვს, რომ სამუდამო ნაწიბური არ ჩამოყალიბდეს?

• – დაიცავით ჭრილობა ინფექციებისგან.
• – გამოიყენეთ სანდო საშუალებები.
• – დაიცავით შრამი მზისგან.
• – ცვლილებების შემთხვევაში მიმართეთ ექიმს.