იწვევს თუ არა პარაცეტამოლი აუტიზმსა და ყურადღების დეფიციტის სინდრომს და რამდენად უსაფრთხოა ორსულებისათვის ამ პრეპარატის გამოყენება - მეან-გინეკოლოგი მამუკა ნემსაძე გადაცემაში "ახალი დღე" საუბრობს:
- ორსულობა ქალის ფიზიოლოგიური მდგომარეობაა და როგორც წესი, დამატებით მკურნალობას, მედიკამენტებს არ საჭიროებს. ორსულობის მართვის იდეა ჯანსაღი ცხოვრების წესის პრომოციაა. ჩვენი რჩევები იქითკენ უნდა იყოს მიმართული, რომ ორსულს სწორი კვება ჰქონდეს, სწორად დაისვენოს, მიიღოს მრავალფეროვანი საკვები და მათში შემავალი ყველა სახის ვიტამინი, საკვები ნივთიერება.
კითხვა პარაცეტამოლის შესახებ ძალიან საინტერესოა იმ თვალსაზრისით, რომ ამ ჯგუფის პრეპარატები, ქრისტეს შობამდე, 1500 წლით ადრე იყო ცნობილი. ასპირინის მსგავსი ნივთიერება ტირიფის ხისგან გამოყვეს. შემდგომ ამას მედიცინის მამა, ჰიპოკრატე იყენებდა და 1915 წლიდან კომერციულად ხელმისაწვდომი გახდა პრეპარატი ასპირინი, რომელსაც მედიცინაში საკმაოდ დიდი ადგილი უკავია და ბედი მეანობაშიც სცადა. გარკვეული დაავადებებისთვის, პროფილაქტიკისთვის გამოიყენება. სწორედ მისი უშუალო "მეგობარია" პარაცეტამოლი. ეს პრეპარატი ორსულობის დროს ტკივილის, ცხელების შემთხვევაში გამოიყენება და ის სხვა ამ ჯგუფის პრეპარატებისაგან განსხვავებით, შეუცვლელია. მაგალითად, იბუპროფენის ან სხვა პრეპარატებისაგან განსხვავებით, მისი გამოყენება შედარებით უსაფრთხოდ შეიძლება. მისი დოზირება დღეში 4 გრამს არ უნდა აჭარბებდეს. დოზირება და პრეპარატის მიღების რეჟიმი, რა თქმა უნდა, ორსულმა თავის მკურნალ ექიმთან უნდა დააზუსტოს. მისი უსაფრთხოება რამდენიმე ქვეყნისგანაა განსაზღვრული. ამ შემთხვევაში, წამყვანი ამერიკის მედიკამენტებისა და საკვების ადმინისტრაციაა.
60-იან წლებში თალიდომიდის შემთხვევა გახდა ცნობილი, რომელმაც მთელი ამერიკა შეძრა. აღნიშნულ პრეპარატს გულის რევის, ღებინების შემთხვევაში იყენებდნენ. მას ორსულები იღებდნენ და აღმოჩნდა, რომ 10 ათასამდე ახალშობილი კიდურების გარეშე და სხვა სერიოზული დარღვევებით დაიბადა. ყველა ეს პაციენტი თალიდომიდს იღებდა და სახელმწიფოს მიერ ამ პრეპარატის გამოყენება საკმაოდ დიდი მოკვლევისა და დიდი კრიტიკის საგანი გახდა. შესაბამისად, ორგანიზაციას, რომელიც FDA-ის სახელითაა ცნობილი, მიეცა საკმაოდ დიდი შესაძლებლობა იმისათვის, რომ გაეკონტროლებინა, თუ რა პრეპარატი იყო უსაფრთხო ორსულობის განმავლობაში. ამ კლასიფიკაციაში პარაცეტამოლსა და მის მსგავს პრეპარატებს C - მესამე კატეგორია მიენიჭა. ცხოველებში ჩატარებული კვლევები გვიჩვენებს, რომ ცხოველებს ანომალიები აღენიშნებათ. ხოლო ადამიანებში, კერძოდ, ორსულებში ჩატარებული, კარგად კონტროლირებული კვლევები არ არსებობს. შესაბამისად, დგება საკითხი, როდესაც ექიმმა და პაციენტმა ერთად უნდა შეაფასონ, რამდენად სარგებლიანია ეს პრეპარატი იმ რისკებთან შედარებით, რაც შეიძლება, მას თან ახლდეს.