4 პროდუქტი, რომლებიც ბავშვს ყოველდღე სჭირდება - ეს ჩამონათვალი აუცილებელია ზრდა-განვითარებისთვის - მშობლები

ბავშვის მზარდი ორგანიზმისთვის გადამწყვეტად მნიშვნელოვანია მრავალფეროვანი და ბალანსირებული კვება. ყოველდღიური რაციონი უნდა მოიცავდეს იმ პროდუქტებს, რომლებიც უზრუნველყოფს ზრდისა და განვითარებისათვის აუცილებელ საკვებ ნივთიერებებს.

1. რძისა და რძის პროდუქტები

კალციუმი და ფოსფორი აუცილებელია ძვლისა და კბილის სისტემის სწორად ფორმირებისთვის. ამ მინერალების საუკეთესო წყაროს რძის პროდუქტები წარმოადგენს: რძე, ყველი, ხაჭო, მაწონი, არაჟანი. აქტუალური რეკომენდაციებით, ყოველდღიურ რაციონში ერთ-ერთი მაინც უნდა იყოს წარმოდგენილი.

2. მარცვლეული პროდუქტები

მარცვლეული მნიშვნელოვან როლს თამაშობს ენერგიის მიწოდებაში და ნაწლავის ჯანმრთელობაში. განსაკუთრებით სასარგებლოა: ფაფები, შვრია, ბრინჯი, მთლიანი მარცვლეული. ისინი უზრუნველყოფს რთულ ნახშირწყლებს, ბოჭკოს, B ჯგუფის ვიტამინებსა და მინერალებს.

3. ახალი ხილი და ბოსტნეული

თანამედროვე რეკომენდაციები ხაზს უსვამს, რომ ბავშვმა ყოველდღიურად მიიღოს ხილი და ბოსტნეული საერთო ჯამში დაახლოებით 5 პორციის ოდენობით. პრაქტიკაში ესაა 1–2 საშუალო ზომის ხილი დღეში (თუნდაც ერთი სახეობა) და 1–2 ჭიქის ექვივალენტი ბოსტნეული, რაც მარტივად სრულდება ერთი დიდი თეფში სალათით, კიტრი–პომიდვრის კომბინაციით ან მოხარშული ბოსტნეულის მცირე რაოდენობებით.

ხილი და ბოსტნეული აუცილებელია, რადგან მატებს ვიტამინებს, მიკროელემენტებს, ანტიოქსიდანტებსა და ბოჭკოს. ხილი ბუნებრივად იძლევა გლუკოზას, ფრუქტოზასა და საქაროზას, ბოსტნეული კი უზრუნველყოფს რთულ ნახშირწყლებსა და განსაკუთრებით ღირებულ მცენარეულ ნაერთებს, რომლებიც ხელს უწყობს ჯანმრთელ საჭმლის მონელებასა და იმუნიტეტს. ბავშვმა ორივე — როგორც ხილი, ისე ბოსტნეული — ყოველდღიურად უნდა მიიღოს, რადგან ისინი სხვადასხვა ტიპის საკვებ ნივთიერებებს აწვდიან ორგანიზმს.

4.ცხოველური და მცენარეული ცილები

თანამედროვე პედიატრიული გაიდლაინებით, ბავშვმა ცილა ყოველდღიურად უნდა მიიღოს, რადგან ცილა აუცილებელია კუნთების, ტვინის, იმუნური სისტემისა და ჰორმონალური ბალანსის სწორად განვითარებისთვის. ერთ დღეში მიღებული ცილა შეიძლება მოდიოდეს სხვადასხვა წყაროდან — არაა აუცილებელი, რომ ბავშვმა ყოველდღე ხორცი ჭამოს; მთავარია, ყოველდღე ჰქონდეს ცილოვანი პროდუქტი ერთ-ერთი ან რამდენიმე ფორმით.

ცილის ძირითადი წყაროებია: ხორცი, ქათამი, თევზი, კვერცხი, ხაჭო და ყველი, მაწონი, პარკოსნები (ლობიო, ბარდა, ოსპი). ეს პროდუქტები განსხვავებულ ამინომჟავებს და საკვებ ნივთიერებებს შეიცავს, ამიტომ სასურველია, ბავშვი კვირის განმავლობაში სხვადასხვა წყაროს იღებდეს.

რაოდენობის თვალსაზრისით, საშუალო ასაკის ბავშვისთვის დღიური საჭიროებაა:

— 1 კვერცხი ან მოხარშული ხორცი/ქათამი (50–70 გრამი) ან — თევზი დაახლოებით 60–70 გრამი (თევზი კვირაში 1–2-ჯერ) ან პარკოსნების მცირე თეფში.

მთავარია, რომ ყოველდღიურ რაციონში მაინც ერთ-ერთი ეს წყარო იყოს წარმოდგენილი. კვირის განმავლობაში წყაროების მონაცვლეობა უზრუნველყოფს ბავშვის ორგანიზმისთვის აუცილებელი ცილების, ვიტამინებისა და მინერალების სრულ სპექტრს.

ნორვეგიული ორაგული არ არსებობს? - რა უნდა იცოდეთ ორაგულზე, რომელი თევზებია ფერმაში მოშენებული და რომლები - ბუნებრივ პირობებში მოპოვებული