გარდაიცვალა ბლოგერი, რომელსაც "ცოცხალ გასაბერ თოჯინას" უწოდებდნენ: "ბავშვობაში მულტფილმების ყურებასაც კი უკრძალავდნენ... გაიზარდა და დაუსრულებელი პროტესტი დაიწყო" - მშობლები
გარდაიცვალა ბლოგერი, რომელსაც "ცოცხალ გასაბერ თოჯინას" უწოდებდნენ: "ბავშვობაში მულტფილმების ყურებასაც კი უკრძალავდნენ... გაიზარდა და დაუსრულებელი პროტესტი დაიწყო"
ტაილანდში ცნობილი ბლოგერი მარია მაგდალინა გარდაიცვალა, რომელსაც, გადაჭარბებული პლასტიკური ოპერაციების გამო, სოციალურ ქსელებში „ცოცხალ გასაბერ თოჯინას“ უწოდებდნენ. ახალგაზრდა ქალის ცხედარი იმ სახლის მახლობლად იპოვეს, სადაც ის ბოლო თვეების განმავლობაში ცხოვრობდა.
ადგილობრივი პოლიცია მომხდარის ორ ძირითად ვერსიას განიხილავს — მკვლელობასა და თვითმკვლელობას. გარდაცვალების ზუსტი მიზეზი ამ დროისთვის ოფიციალურად დადგენილი არ არის.
მარია მაგდალინას სოციალურ ქსელებში მილიონზე მეტი გამომწერი ჰყავდა. მისი ყოველ პოსტს მწვავე კომენტარები ახლდა — ნაწილი მას აკრიტიკებდა, ნაწილი მოუწოდებდა, ჯანმრთელობაზე ეზრუნა, თუმცა თავად ბლოგერი ამ დამოკიდებულებას მშვიდად იღებდა და ხშირად ამბობდა, რომ პოპულარობას თავისი ფასი ჰქონდა.
მარია მაგდალინას ნამდვილი სახელი დენიზ ივონ ჯარვის გონგორა იყო. პოპულარობა 2010-იანი წლების შუა პერიოდში მოიპოვა, როცა საკუთარ ცხოვრებაზე საუბრობდა და აუდიტორიას ტრაგიკულ ისტორიებს უზიარებდა. დენიზი რელიგიურ ოჯახში გაიზარდა, მკაცრ გარემოში — ბავშვობაში მულტფილმების ყურებაც კი მხოლოდ განსაკუთრებულ დღეებში შეეძლო. თუმცა ასეთი აღზრდა, როგორც თავად ამბობდა, საბოლოოდ პროტესტში გადაიზარდა.
17 წლის ასაკში ალკოჰოლისა და აკრძალული ნივთიერებების მოხმარება დაიწყო, მოგვიანებით სახლიდან წავიდა და სტრიპტიზიორად მუშაობა დაიწყო, ხოლო სრულწლოვნების მიღწევის შემდეგ — ესკორტშიც. 21 წლის ასაკში დენიზმა პირველი პლასტიკური ოპერაცია ჩაიტარა.
ბუნებრივად მარია მაგდალინა არასოდეს ითვლებოდა არამიმზიდველად, თუმცა საკუთარ გარეგნობას სხვაგვარად აღიქვამდა. თავდაპირველად მკერდის გადიდება გადაწყვიტა, შემდეგ კი პლასტიკური ჩარევები უსასრულო სერიად ექცა — წარბების ლიფტინგი, ლიპოსაქცია, რინოპლასტიკა და სხვა შედარებით სტანდარტული პროცედურები დროთა განმავლობაში სულ უფრო ექსტრემალურმა ოპერაციებმა ჩაანაცვლა. მათ შორის იყო დუნდულების ანომალურად გადიდება და ინტიმური ზონის ქირურგიული ჩარევები.
ოპერაციებს სერიოზული გართულებებიც მოჰყვა. ერთ-ერთ შემთხვევაში მკერდის იმპლანტი გაუსკდა, რის შედეგადაც მკერდზე დიდი გამობერილობა გაჩნდა, თუმცა ბლოგერმა ამ მდგომარეობაშიც განაგრძო კონტენტის შექმნა. 2022 წელს კი აღიარა, რომ პირს ბოლომდე ვეღარ ხურავდა.
ზოგიერთი ოპერაცია არალეგალურად, აკრძალულ კლინიკებში ტარდებოდა. მარია მაგდალინა ღიად საუბრობდა იმაზე, რომ კოლუმბიაში არაერთხელ ჩაუტარდა ოპერაცია არაოფიციალურ პირობებში. საერთო ჯამში, საკუთარ „გარდასახვაში“ მან 150 ათას დოლარზე მეტი დახარჯა.
2024 წელს ბლოგერმა კიდევ ერთი ექსტრემალური ეტაპი დაიწყო — ტატუირებით მთელი სხეულის დაფარვა. პროცესი იმდენად შორს წავიდა, რომ თვალების მიდამოში გაკეთებული ტატუირებისას თითქმის დაკარგა მხედველობა. მიუხედავად ამისა, მარია მაგდალინა საკუთარ ცვლილებებში სილამაზეს ხედავდა და ამ გზავნილს მუდმივად უზიარებდა აუდიტორიას.
„კაილი ჯენერის მსგავსი ტუჩები მქონდა, ახლა — ანჯელინა ჯოლის მსგავსი. ადრე ჩვეულებრივი გარეგნობა მქონდა. არავის ვბაძავ — უბრალოდ მიყვარს პლასტიკა და ტატუები“, — ამბობდა ის ერთ-ერთ ინტერვიუში.
მისი გარდაცვალების შემდეგ სოციალურ ქსელებში კვლავ გააქტიურდა დისკუსია პლასტიკური ქირურგიის უკონტროლო გამოყენებაზე, ფსიქოლოგიურ ზეწოლასა და იმ საზღვრებზე, რომლებიც პოპულარობისკენ სწრაფვაში ხშირად იკარგება.
