20-წლიანი პატიმრობა ემუქრება მასწავლებელს, რომელსაც 12 წლის მოსწავლეებთან გარყვნილ ქმედებაში ადანაშაულებენ - მშობლები

22 წლის სკოლის მასწავლებლის მიმართ სისხლის სამართლის საქმეა აღძრული. საგამოძიებო ორგანოების ინფორმაციით, ახალგაზრდა ქალს არასრულწლოვან მოსწავლეებთან სექსუალური ხასიათის ქმედებების ჩადენას ედავებიან. შემთხვევა სანკტ-პეტერბურგში მოხდა.

ამ ეტაპზე ეჭვმიტანილი დაკავებულია და წინასწარი პატიმრობის ქვეშ იმყოფება. საგამოძიებო კომიტეტის ცნობით, საუბარია მოვლენებზე, რომლებიც, სავარაუდოდ, 2025 წლის აპრილსა და ივლისში განვითარდა. ტელეგრამ-არხ Baza-ს ინფორმაციით, ეჭვმიტანილი სკოლის ორ მოსწავლეს საკუთარ სახლში იბარებდა, სადაც, გამოძიების ვერსიით, შეიძლებოდა განხორციელებულიყო ქმედებები, რომლებიც კვალიფიცირდება, როგორც განსაკუთრებით მძიმე დანაშაული არასრულწლოვანთა სექსუალური ხელშეუხებლობის წინააღმდეგ.

სანქტ-პეტერბურგის ვიბორგის რაიონულმა სასამართლომ უკვე განიხილა აღკვეთის ღონისძიების საკითხი და ეჭვმიტანილს წინასწარი პატიმრობა შეუფარდა. სასამართლოს დადგენილებაში აღნიშნულია, რომ საქმე სექსუალური ძალადობის მუხლითაა აღძრული.

გამოძიების მასალების მიხედვით, ძალადობის ეპიზოდები შესაძლოა არაერთხელ მომხდარიყო. საგამოძიებო ორგანოები ამტკიცებენ, რომ ეჭვმიტანილმა ისარგებლა არასრულწლოვანთა ასაკითა და მოწყვლადი მდგომარეობით. დაზარალებულები 12 წლის მოზარდები არიან. აღნიშნული მუხლი ერთ-ერთ ყველაზე მკაცრ სანქციას ითვალისწინებს — თავისუფლების აღკვეთას 20 წლამდე ვადით.

ცნობილია, რომ ეჭვმიტანილმა სკოლა საკუთარი სურვილით ჯერ კიდევ ზაფხულში დატოვა. სასწავლებლის დირექტორმა ადგილობრივ გამოცემას განუცხადა, რომ მოსწავლეებს მასწავლებელი კეთილგანწყობისა და ყურადღების გამო უყვარდათ და მის მიმართ საჩივრები არ ყოფილა: „პრობლემები არ ყოფილა. ყოველთვის ცდილობდა დახმარებოდა სუსტ მოსწავლეებს“, — აღნიშნა დირექტორმა.

ასევე ცნობილია, რომ ეჭვმიტანილი არის რუსეთის სახელმწიფო პედაგოგიური უნივერსიტეტის კურსდამთავრებული, რომელიც ქვეყნის ერთ-ერთ წამყვან პედაგოგიურ უმაღლეს სასწავლებლად ითვლება. ამ გარემოებამ საზოგადოებაში დამატებითი რეზონანსი გამოიწვია. სოციალური ქსელების მომხმარებლები და სპეციალისტები აქტიურად განიხილავენ სკოლებში კადრების შერჩევის, კონტროლის გაძლიერებისა და ახალგაზრდა პედაგოგებისთვის ფსიქოლოგიური მხარდაჭერის აუცილებლობას.

თავად აფინა სიმეონიდისი ბრალს არ აღიარებს. მისი თქმით, მის მხრიდან არანაირი უკანონო ქმედება არ მომხდარა და მიმდინარე საქმე ცილისწამებად აფასებს. ეჭვმიტანილი ამტკიცებს, რომ ერთ-ერთ მოზარდს ყურადღებაზე უარი უთხრა, რის შემდეგაც შესაძლოა ცრუ ჩვენება მიეცა. საგამოძიებო ორგანოები აცხადებენ, რომ დაცვის ეს ვერსიაც დეტალურად შემოწმდება და საბოლოო დასკვნები მხოლოდ გამოძიებისა და სასამართლო განხილვის დასრულების შემდეგ გაკეთდება.

სასამართლოს გადაწყვეტილებით, ეჭვმიტანილს წინასწარი პატიმრობა მინიმუმ ორი თვით შეეფარდა. არსებული მონაცემებით, პატიმრობის ვადა 2026 წლის თებერვლამდეა განსაზღვრული. სამართალდამცავი ორგანოები ცალსახად უსვამენ ხაზს, რომ განაჩენის გამოტანამდე ქალი უდანაშაულოდ ითვლება.