ქალმა, რომელიც საშვილოსნოს გარეშე დაიბადა, უკვე მეორე შვილი გააჩინა - მშობლები
ქალმა, რომელიც საშვილოსნოს გარეშე დაიბადა, უკვე მეორე შვილი გააჩინა
ამერიკელი ქალი, რომელიც საშვილოსნოს გარეშე დაიბადა (საშვილოსნოს აგენეზია), მეორედ გახდა დედა. ამის შესახებ WHIO-TV იუწყება.
ამანდა გრუნდელმა თავიდანვე იცოდა, რომ საშვილოსნო არ ჰქონდა და წლების განმავლობაში ეგონა, რომ შვილების ყოლა მისთვის შეუძლებელი იქნებოდა. მოგვიანებით იგი ჯონ გრიუნდელზე დაქორწინდა და წყვილი ამ რეალობას შეგუებული იყო. თუმცა 2020 წელს ამანდამ გაიგო, რომ საშვილოსნოს ტრანსპლანტაციის პროგრამაში მონაწილეობა შეეძლო, რომელიც Cleveland Clinic-ში ტარდებოდა.
ოპერაცია წარმატებით ჩატარდა. ტრანსპლანტაციიდან დაახლოებით ექვსი თვის შემდეგ ამანდამ ინ ვიტრო განაყოფიერების (IVF) დახმარებით პირველივე ცდაზე შეძლო დაორსულება. 2021 წელს წყვილს გოგონა, გრეისი შეეძინა — ეს იყო მისი პირველი მშობიარობა და ერთ-ერთი წარმატებული შემთხვევა აშშ-ში საშვილოსნოს ტრანსპლანტაციის შემდეგ.
სამედიცინო გუნდმა გადაწყვიტა, რომ გადანერგილი საშვილოსნო დროებით კვლავ სხეულში დაეტოვებინათ, რათა ოჯახს მეორე შვილის გაჩენის შანსიც ჰქონოდა. როდესაც გრეისი დაახლოებით 18 თვის გახდა, წყვილმა მეორე ორსულობაზე დაიწყო ფიქრი. ამ ეტაპზე ამანდას სამწუხაროდ მუცელი მოეშალა.
„ჩვენ ამ ბავშვის გასაჩენად ძალიან ბევრი გამოვიარეთ,“ — ამბობდა ამანდა.
მიუხედავად სირთულეებისა, ამანდა კვლავ დაორსულდა და 2025 წლის ნოემბერში, ორსულობის 34-ე კვირაზე, მას ვაჟი, ლეონი შეეძინა — ეს უკვე მისი მეორე მშობიარობა იყო. ახალშობილმა რამდენიმე დღე გაატარა ნეონატალური ინტენსიური თერაპიის განყოფილებაში, თუმცა მალევე გამოჯანმრთელდა და ამჟამად თავს კარგად გრძნობს.
„ეს იყო რთული, დამღლელი, წარმოუდგენელი და ამავე დროს სასწაულებრივი გამოცდილება,“ — ამბობს ამანდა.
მეორე მშობიარობის შემდეგ ექიმებმა გადანერგილი საშვილოსნო ამოიღეს, რაც ამგვარი სამედიცინო პროგრამების სტანდარტული პრაქტიკაა — ორგანო ხშირად დროებით ინერგება მხოლოდ ორსულობების უსაფრთხოდ ჩასატარებლად, რათა ქალს აღარ დასჭირდეს ხანგრძლივი იმუნოსუპრესიული მკურნალობა. ამანდა აღნიშნავს, რომ განსაკუთრებული მეთვალყურეობის ქვეშ იმყოფებოდა და გულითადი მადლიერებით იხსენებს დონორს, რომელმაც მის ოჯახს დედობის შესაძლებლობა მისცა.
საშვილოსნოს ტრანსპლანტაცია დღემდე იშვიათი და მაღალი სირთულის პროცედურაა. მსოფლიოში უკვე რამდენიმე ათეული ბავშვია დაბადებული გადანერგილი საშვილოსნოს დახმარებით. კლინიკა მკაცრ ეთიკურ და სამედიცინო პროტოკოლებს იცავს — სწორედ ამიტომ, ამანდას ისტორია მედიცინაში მნიშვნელოვან და იმედისმომცემ მაგალითად მიიჩნევა.
